“Falam Bawhlung Puai” Ihsin Zirnak (1)

Home » Cahram » “Falam Bawhlung Puai” Ihsin Zirnak (1)

By vcth on January 18, 2010.

Lungbawk Brother

A kum cu 1990 hrawng asi hmang. Falam ah phunkhat ka rak kai lai fang asi. Hlan ihsin Falam ah kumtin (Furcaan) bawhlungsit zuamawknak a um ringring cu za te theih asi. Kan saya/sayamah pawl khal in mah le veng tha pek dingin kum tinten final ni cu tuan deuh in tlawng in ṭum ter ṭheu. Kei khal bawhlungsit zoh dingin kan inn sangkaa in inn sungah ka zal cu ka hei hlawn duak ih rualpi pawl thawn bawhlungsit final zoh ding ah ka rak pok ve. Thang Hre, Charly Cung le Mangpi pawl thawn si hmang. Cutin bualrawn lam pan in kan pok.

A hmun kan va thleng. Pakhatnak cuhawk ti cu an ṭang nasa. Zoh an nuam zet. A zoh tu khal kan tam. Cu lai ah kan veng (Farṭhawk veng) in Pa Lian khal a rak sit ve. A nih tla cu mi hnakin a ṭang cuang a bang. A thlan hripi thawn kawl khatlam in khatlam a thleng vohvo. Ṭang veve ti cu caan cem tiang zo hman in an neh aw theilo ih a chingpu sit ding an si thlang. Cumi karlak ah cawlh caan an pek ih Pa Lian khal cu a rualpi pawl kiangah ra to phah in Tanphaya ti a in rero. Vengkhat ti cu a zohtu pawl khal hmunkhat deuhah kan to tlang ih kan kiang ah cun a ra cawl.

Cutin kan to rero laiah a rualpa cun Pa Lian cu hi tin thu a sut. “Pa Lian, neh na duh ngaingai maw?” A kiang to pawl kan dai thluh. Nauhak khal in a thusut mi cu a mak kan ti deuh. A rualpa cu mi aa nawn zoh in ka hei zoh. A cal le a ngolh fawn. Calngolh cu an fim an ti nan si khawh, ka thinlung te’n cu vek lamlam sut rero” ka tiih an biakawk mi cu ka rak ngai. Pa Lian cu tha bang nawn in a rualpa cu a hei zoh ih “Duh ee” tiin tawite’n a hei sawn. A rual pa cun voithum tiang rori a sut lala ih Pa Lian cu an neh theilo thintawi thawn, a hmai khal a sen ṭheh ih sup aw thei nawn lo in, “ka duh lo ah hi tin ka thlan hripi pawt ko ka ṭang rero ding na ruat maw si?” ti ah a hei ti. Cule, “ziangah maw?” tiin a rualpa cu a hei sut sal.

A rual pa cun, “Cu tiih neh na duh taktak a si le, nangmah suak awla midang in lo sawng hai seh” a ti. Pa Lian cu nauhak hman in a thinheng ti cu a mithmai zoh in kan thei. A hmai tla a sen ṭheh. Asinan, zianghman cu a let nawn lo. Ziang a sim duh ti tla nauhak cun kan rak thei cuang lo. Mangbang nawn in ka to ih bawhlungsit an thoksal ih ka zoh men.

Cutin, kum tam nawn a liam. Kei tla Delhi lam ihsin ramleng ka ra suak ve. Pawlkom tete khal ah ka tel phahphah. Nunnak ah zir suah mi tete khal a um vivo. Kan ram a ṭhat tikah politic tuah ciamco ding cu ka tumtahmi asi cuanglo nan, kan ram hrangah thu ka ruat phahphah ṭheu (a caancaan ah fam the). Kan ram a ṭhansoh theilo dan le pawlkom kan neih sun mi tete pawl an caklo leh duhthu an sam lo ṭheu mi pawl ka ruat tikah, ziang ruang bik ah a si pei? timi ka thinlung ah thusuhnak a rak suak.

Tulai cu, santhar a siih, mipi khal kan fim thluh. Pawlkom siatsuah duh tu le pawlkom ṭhatlonak tuah tu cu theih an ol tuk. Bualrawn lai ih kuk relh vek asi ko. An thup aw thei nawn lo. Cu lawng si hrih lo, pawlkom hnakin mah hmin than ter a duhtu le mai hlawknak rak hawl tu khal theih an theih. Phar le thakpherh thuh a theih lo an ti bangin thuh theih asi lo.

Santhar asi, fim san asi, asinan ziang ruangah kan pawlkom hi duh vekin a caklo si pei? timi thusut nak cu ka lusung ah a tang ringring ko. Asinan tu ahcun, ka theifiang puppi. Mirang ṭong in kan vun sim a sile, “I c da moon.”

Kha mi 1990 lai ih Pa Lian rualpa ih a ṭongmi, Pa Lian leh kei ih kan rak theithiam lo mi kha a tu ah fiang zet in ka hmu ngah thlang. Pa Lian cu an lam ih neh dingah a thazang zate suahin a ṭang zet ko nan, midang ih hmuhnak ahcun an neh theilonak kha amah, Pa Lian ih bawhlungsit thiam tuk lemlo ruangah a rak si riangri. A poi ti lo cu simding dang ka thei ve nawn lo.

Thuanthu ih simduhmi: Voi tampi cu, thil ṭha kan tuah si hmang tiin, kan fimnak, thiamnak, cahnak, sumsaw le tikcu caan tampi pe in hna kan ṭuan rero lai ah, kan hnaṭuan mi hin a mah hnak ih ṭha sawn a cang thei dingmi a dawnkhamtu a si ding ti hi kan rak thei ṭheu lo.

Na ruahnak

2 Responses to “Falam Bawhlung Puai” Ihsin Zirnak (1)

  1. salai   January 19, 2010 at 6:42 am

    PaLian tluk fang ttheh kan si ko hih.

  2. cer   January 19, 2010 at 6:57 am

    Cal kau deuh cu an rak fim cing cing a si cu.