68

Home » Cahram » 68

By vcth on July 17, 2013.

B.A (Thang), Salai

Mr. Luis cu kan bank ih analysis ṭuanvo neitu a si. Director pa in thu ṭhencetnak pawl a tuah hlan ah Mr. Luis in ziang hmuahhmuah zohfelnak (analysis) a tuah sak ringring a ṭul. Cui bank cazin pawl a zohfel lai ah cun Mathematics (tinchia) tampi a hmang nan report a ngan tik ah cu Math cu a hmang lem lo. Report a ngan mi pawl, zohfelnak le research a tuah mi pawl a ṭhatuk ih amah ih sinak ṭuanvo hi kan bank hrangah a thupi nasa.

Luis cu khawitawk a feh khal le analysis le research tuah ringring mi a si. Voikhatah Super market pakhat kan feh ih, coffee kan in. Minung lut suak kha a zoh ih, nazi pakhat hrawng rei hnu-ah, himi market hi rei lo ah an sung thlang ding a ti. A sim vekin, rei lo ah an rak sung ngaingai.

Voikhat ah hnaṭuannak thu thawn ramdang kan va feh. Cumi khua ih minung pawl ih sumleut (income) kha analysis a tuah cih. Ka va zingzoi tikah cun, Luis’h zumvek in a si ngaingai. Luis in ‘zin par ih a feh rero mi motor pawl zoh in analysis ka tuah mi si’ tin in ti.

Luis cu mi nuam pakhat asi. A hnaṭuan leh a sumlut tla a ṭha nasa. Analysis lawng tuah a siih.. thu ṭhencettu ngaingai tla a silo ih, hnaṭuan ṭuankhung le bicih tuk pawl cu a si lem lo. Asinan, tuhrawng Luis ka zoh tikah a thin nuam lo hmel nasa. Capoh sim thei ringring mi pakhat a si nan, a ṭong mal nasa. Amah kan biak le tla thei lo vek, aa vek nawn, lungfim mumal loin in zoh rero men.

Nikhat hnaṭuan thu thawn a zungkhan ah ka va feh ih, ka suak zik te ah…Bizu sungih hmanbawng pakhat ka rak hmu. Cumi hmanbawng sungah mirangca in 68 timi te kha cahnah pakhat parah ngan in, hmanbong te a si. Ka zoh rero ih ka theithiam lo.

Ka khauruah a har rero timi kha Luis in a thei ih, to sal aw in ti. Cumi hnu in…….. Voikhatah hnaṭuan thuhla thawn India ah a va feh. Hotel pakhat ah a um. Nikhat ah Hotel sangkate ihsin lamzin a zoh rero laiah, nauhak pate pakhat, kutdawh pate pakhat kha a rak hmu. Amah daan ten analysis a tuah thlang. Voi zait a dil hnu ah paisa a hmu thei timi kha a zoh rero. A tam sawn cu nauhak pate kha, zoh hman an zoh lo. Nazi pakhat lai analysis a tuah hnuah a phi a ngah. A tlangpi thu in, voi 68 a dil hnu lawngah voikhat a ngah ti a si.

Hnaṭuan kan sut (apply) tikah voi 68 apply tuahhnu ah voikhat hrwng lawng interview in ko sehla ziang tluk in kan beidong pei. Hi kutdawh pa hi a thih tiang kumkhua in lamzin parah kutdawh a ṭuan ṭul ko ding. Himi thu a ruat ih a thin nuam lo nasa. Zohman ih ziang siar lo mi, zoh paih lo mi Kutdawh hnaṭuan hi kum 10 hrawng ṭuan sehla timi a raut tikah, a raut ngam lo.

Luis in a fapa kha, kutdawh hnaṭuan nikhat hrawng va ṭuan hnik aw tin a fial. Zaanlam a fapa a rak thlung ih, a fapa in “kutdawh ka ṭuan tikah ka thinnuam lo bikmi cu ka rilrawng mi a silo. Minung kan si nan zohman mithmai ṭha pek lo, biak duh lo mi minung” ih kan can kha a na ka ti bik a ti.

Cui sin, Luis cu Hotel ṭha ah rawl a va ei nawn lo. Nunnom, zingkhan (Luxury) thil pawl a lei paih nawn lo. A feh ringringnak hmun cu mifarah pawl umnak lawng a si thlang. A cang thei tawk in a zoh khen. A man caan tinten mifarah pawl hnenah SAL, RIANTU vekin a va bawm.

Ka thei thiam zo. Mi farah pawl an duh mi hi, ci-al, ci-thlum, sangreu te lawng ngah duh mi an silo, minung pawlih upatnak, cohlannak te tla an duh ve timi Luis in a thei thiam zo. An hnen a va um caan ah, mifarah pawl kha minung an si vekin upatnak ngah ding a duh sak ve. Mifarah pawl an ṭul mi thil pawl kha a paisa in a lei sak. Mifarah pawl an hmang mi Pakan sia pawl kha a hlawn ih Pakan tha a lei sak. Mifrah pawl an it nak tangphah sia, fihnung ummi pawl kha a hlawn ih a thar a lei sak.

“Mifarah pawl kha, a tuarpi ding, zawnruahnak nei pi ding” tin mi tampi in kan ti ringring. Asinan, Luis in cu mifarah pawl kha upat (respect) ding an si ti in theih ter. Mifarah pawl an ih ṭul mi cu duhdawtnak mithmai pante le minung an si ve ti upat peknak te a si. Himi ruahnak te hi nambat te pakhat in a rak ngah. Cumi nambat cu 68 a si. Nambat pawl ih thupitnak cu Luis in a rak ruat ringring mi si.

A rak hman.

Cui nambat in a nunnak kha a thleng ṭheh.

68.

Lee Chia Tung (Taiwanese) ih 68

Na ruahnak