A Awn Mi Sangka

Home » Cahram » A Awn Mi Sangka

By vcth on July 9, 2013.

B.A (Thang), Salai

Robert Lee ih “The Old door” sirhsan ih ngan mi:

A inn hmaiih sangka cu ong tik le khar tikah a tet nasa, cuhleiah ‘cuicui’ tin a awn ringring bet. Sangka Patta tla a tlap, thir-ek a kai ṭheh zo. A sangka tlang zanthing pawl tla a hlun, an tar nasa zo. Cuti a si ruangah sangka cu on, khar tinten a awn ringringnak a si.

On duh tikah ban tha thawn nasa nawn in on a ṭul. Cuhman ah kau zet ih on theih a silo. Amah mi pakhat lut, suak theinak fang lawng a si. A khar sal tik khal ah a harsa nasa. Hih sangka hi hiti a sinak a rei phah thlang.

Old door

Zaankhat cu a lennak ihsin a tlung. A keel vekin a sangka cu tha thawn nasa zetin a ong. A ruahnak hnakin a on a rak ol tuk ih a tluk riangri. A mang a bang. A tet, on a harsa zet ringring mi sangka ziangtin ol ai ten on a thei, a khuaruah a har. A ngaingai ahcun a um lo sungah a inntek pa in a rak rem sak mi a si.

Cutikah a thin a heng. Amah cu har zet ih on a ṭul mi sangka kha a zongsang zo, tet nawn ten tha hmang phah in on kha a kelleh zo. Curuangah a sangka ol ten on theih, khar theih mi parah a lungawi lo. A thar ih rem kha a lungkim lo.
+++++++++++++++

A ca hi siar bet lo in thu ka ruat lawk. Sangka sia rem sak mi hi a ṭha lo maw? A hlan ah har zetin on/khar ṭul mi a tu cu ol ten a ong thei mi hi a ṭha sawn lo maw? Ziangruangah a lungawi lo? A lungkim lo?

Himi ah cangan tu pa ih thu ruat daan hi kan ruat a ṭul thlang.

A ca ngan mi ka siar bet ih……….
A lungawi lo vek a cang mi hi thil thar a duh lo ruangah a si pei maw tin amah le amah tla a sut aw. Leilungpi ah mi phun pa 2 an um- cumi pawl cu- thil thar a duh mi le thil thar duh lo mi tin an um thu kha a sim. Minung kan zaten a caancaan ah a thar kan duh ih, a caancaan le a hlun kan duh caan a um. A caancaan ah a thar le a hlun voikhat ah kan duh caan tla a um timi tla a ngan.

Cangan tu pa in a thar hmuahhmuah ka duh lo timi cu a si theilo. ‘President pa ih Pursunnak Policy thar ka duh ko. Jerusalem Khua Thar din thu ka lungawi. Kum Thar tla lungawi zet in ton ka duh. Nunnak thar (new life) timi tla ka duh ko.’

‘Cuvek thotho in a thar lawng a duh mi khal ka si ve cuang lo. Ka nauhak lai kan khua ih lamzin pawl hi ka ngai zet, pi 100 kau mi lamzin pi, a tettawh zetmi zin hi ka duh lo. Asinan, keimah le keimah thusutnak pakhat ka tuah. Pi 100 lamzin pi ka duh lo mi le khua hlan lamzin te ka ngai mi hi ka thinlung taktak a si maw????’

Khuahlan lai lamzin te a ngai mi hi a thinlung taktak a silo. A ngai mi hi nikhua ṭha lai, feh nuam lai fang caan lawng a siih nikhua sia caan, ruah sur caan lamzin ciarbek pawl cu a duh lo, a ngai lo.

Minung kan nunnak ah tla Robert ih sangka vekin kan si ṭheu. Rober ih cahram te cu— minung pawl ih nun psychology/thinlung ruahnak kha a lang ter duh mi a si.
A tu cu— sangka ol te on thei mi parah a lungawi, a lungkim thlang.

Na ruahnak