A cem zo mi kum Sawmbi (Decade)

Home » Cahram » A cem zo mi kum Sawmbi (Decade)

By vcth on December 23, 2009.

B.A (Thang), Salai
Ziang le ziang lo in kumkhat cu a rak cem zik thlang lala ual. Kei tla kumthar a thleng zik thlang ih, kum 2009 kum sungah ziang pawl ka rak tuah timi ka ruat phah rero. Cutin Internet ih Times website ah “The Decade from Hell” timi article ka rak hmu. Hell ram sungah kum sawmbi tin kan sim thei ding ka zum. Cumi thutlangpi ka hmu lawngah kum 2009 cem hi kumkhat cem lawng silo in Kum zabi 21 ih hmaisabik Kum sawmbi (decade) tla a cem ual tin ka rak ruat suak sal.
A tu hrawng a rak cang mi leilungtlun sumpai tlaksiatnak (economic crisis) pawl, terrorist pawl ih thuhla pawl, Natural Disasters pawl, Vanduainak pawl, leilungpi ah mangbang um zet mi damlonak thar pawl, pulhnat pawl thawn kan tong aw ruangah “A buai zet mi Kum Sawmbi (decade) pakhat a si” tin cangan tu pa in hmin a rak pek.
Kum sawmbi ih hmaisabik a si mi kum 2000 kum kan thleng ve ten, hmaisabik January nikhat ni a thoknak 2 minutes a luan ve ten Japan ram ih Onagawa timi Nuclear zungpi ah alarm aw pi a rak suak ciam co ih Y2K virus buainak kan rak tong thok. Cumi lai-ah computer technician pawl le Scientists pawl cu an rak buai nasa.

Cuhnu kum khat 2001 ah voikhat hman kan ruat ban lo mi 9/11 siatnak pi a rak cang lala. American pawl le leilungpi hrangah ziangtik hman ih kan hngilh thei lo ding mi minung thihnak kan rak tong. Cui thil ruangah mipi 3000 lenglo an rak thi. Cumi thuhla ruangah American in Afghanistan le Iraq ah do awnak a suahpi ih mipi leh ralkap tampi an thi.

Kum 2002 ah, Indonesia ram ih Berli tikulh ah bum a puak ih mung 200 luan an rak thi lala.
Kum 2003 ah Taiwan (Chinese) pawl in an ram ah minung le minung ol zet ih a suan aw thei mi SARS damlonak hrik (virus) an hmu thu an rak than. Cuhnu ah Asia ram ih Tourism hnaṭuan pawl a ṭumsuk zet.
Kum 2004 cem zik te ah leilungpi lau ṭheh ter mi Vanduapi (Natural Disaster) pakhat kan rak tong lala.
Cumicu…India tifingriat ihsin Sunami timi Quake pi le tisuarpi ruangah Asia le African ih ram 12 ih mipi tampi’n an rak tuar. Himi Sunami ruangah mipi (200,000) luan an rak thi.
Kum 2005 ah North Korea ram in Nuclear thilri pawl an nei zo timi kha an rak than. American le leilungpi in an rak thinphang zet.
Cumi hnu rei lo ah Indonesia ram ah minung suan thei mi H5N1 natnak an hmu timi an tarlang. August 29, 2005 ah USA ram ih Southeast Louisiana ah Hurricane Katrina timi thlisia a rak hrang ih mipi 1500 lai an rak thi. Thehle, US$ 100 billion man lai thilril pawl a siat ṭheh. Cumi cu USA thuanthu ah a tum bik mi Vanduainak (disaster) pi a rak si.
Kum 2006 ah Yi-Nan leh Petroleum man pawl a rak kai nasa. Leitlun record thar rori a rak si.
Thehle, Israel le Hizballah pawl Lebanon ah ral an do.
Kum 2007 ah kan Kawlram ah Phunki pawl ih san-dah-pyah mi Saffron Revolution timi a rak cang.
Kum 2008 ah kan kawlram ah voikhat hman a cang dah lo mi Nagis thlisia a rak hrang. Nagis thuhla hnu rei lo ah China ramah Cichuam linghninnak a rak cang lala. Mipi tampi an thi, thilri tampi a siat. Cumi hnu rei lo ah India ram Mumbai ah terrorist pawl ruangah mipi 170 luan an rak thi lala. Kum cam zik hrawng ah USA ram ih Stoke Sharing Market an rak buai thok rero thlang.
Kum 2009 ah cun 2008 ihsin a rak thok rero mi American ram ih Sumpai tlaksiatnak (Economic Crisis) pi cu leitlun sumpai tlaksiatnak (Global Economic Crisis) in a rak cang. Thehle, World Health Organization (WHO) in ( H1N1) timi damlonak hi leilungpi ah ttihnung um tuk mi damlonak pakhat a si tin an sim.
Ziangkhal lole, cu vekin thuhla ṭha lo pawl thawn kan rak buai mi kum 10 cu rei lo ah a cem thlang ding. Cumi kha ca ngan tu pa in “The Decade from Hell” tin a rak sim. Ziangkhal lole a siabik le ṭha lo bik mi thuhla pawl sung ihsin tungdinnak le thazang laknak thawn leilungpi le bulpak pakhat cio cu kan feh vivo a ṭul ko.
Rei lo ah kumthar a si thlang ding. Kumhlun ih a rak cang mi thuhla sia pawl ihsin zirnak lak in hmai a ra ding mi kumthar ah thazang thar thawn pakhat cio le leilung pi hrangah kan nun ding mi kan ṭuanvo a si ko. Leilungpi ah raldonak pawl, minung pakhat le pakhat that awnak thuhla pawl, Vanduainak pawl, Natural Disaster pawl kha mal thei bik in mal hram seh timi thlacam nak thawn……………
(Note: December (7) Times Magazine Issue- Andy Serwer ih The Decade from Hell siar mi parah let sal mi si)
Na ruahnak