ASEAN in Pi Aung San Suu Kyi dinpi

Home » Thuthang » Ramsung » ASEAN in Pi Aung San Suu Kyi dinpi

By vcth on November 14, 2017.

Philippine ram, Manila ih tuahmi Avoi 31nk ASEAN tonkhawmnak ah ASEAN ram hruaitu pawl in Rakhine ram thubuai ah Pi Aung San Suu Kyi ih duhnak vekin an fehpi tiah theih a si.

Pi Aung San Suu Kyi ih dil vekin statement ah Rohingya ti tongfang pakhat hman an hmang lo ih hlei ah nitlaknak lam media pawl ih sim le than vekin ‘miphun ci-hmitnak’ ti vek tongfang tla an hmang lo.

ASEAN cun ‘Vietnam ram ih tualto harsatnak (natural disasters) tuar pawl bawm ding, Philippine ih Islam ralhrang ruangih harsatnak a tuar pawl bawm ding le Myanmar ram Rakhine ramkulh ih mibur pakhat le khat buainak ruangih harsatnak tuar pawl bawm ding’ tiin Myanmar ram thu ah tongfang mawi zet a hmang.

ASEAN ram tam nawn cu nitlaknak lam media pawl ih selnak a tongmi ram an si. Thimnak ah Philippine President ih rittheihsii a do daan, Thailand ram ralkap in thuneihnak an lek ih rei tuk an uk daan, Myanmar ram ih Rakhine ram buainak thu ti pawl ah nitlaknak lam media in nasa zetin an soisel.

Nitlaknak ram tampi in cu Rakhine ram buainak thu ruangah Pi Aung San Suu Kyi an siosel nasa. Pawlkom hrekkhat tla in cu a pek cia lawmman tiang hman an long sal.

ASEAN ram pawl khat le khat dinpi awnak in nitlaknak ram pawl ih ASEAN par ih thuneih silhkhahnak a dem ter deuh ding zum a um.

Tuitum ASEAN meeting ah Aung San Suu Kyi ih thu ASEAN hruaitu pawl ih an thlun daan zoh tikah Aung San Suu Kyi parah upatnak an nei zia a lang. Amah Aung San Suu Kyi hrang siseh, Myanmar ram hrangah siseh nehnak pakhat ngah vek a si.

Na ruahnak