BA Thang (Salai) le VCTH Camkhat

Home » Interview » BA Thang (Salai) le VCTH Camkhat

By vcth on January 22, 2014.

 

GFYO ih sungtuan 2 le Falam Youth Conference cangsuak ding in calsuang ih hma a laktu BA Thang (Salai) cu VCTH in FYC thu mallai suhtonnak kan nei a si.

V – VCTH hmin in cibai kan lo buk. Hmaisabik ah hmeltheihternak malten?

BAT – Kei cu Falam Peng, K. Haimual khuami Salai Ram Ling Hmung le Tamu Peng, Phailen Khuami Mai Hling Za Lam te ih fapa upabik ka si. Falam ah ka suak ih Rangoon ah ka thanglian. Yangon Institute of Economics ah 2nd year tiang tlawng ka rak kai dah. Thailand ah tla kum tawkfang ka um dah ih, tuhi Europe lam ah ka um.

V – FYC ih a tawthoktu le cangsuak ding in hma a lak biktu pakhat na siih, ziang in hi conference tuah suak ding in a lo lungtho ter (inspire).

BAT – 2008 April thla ah Chin Literature and Culture Committee (Universities-Myanmar) ih Seminar Falam ah kan tuah ih, cumi Seminar hrang sumpai ngah dingin cangvaitu pakhat dinhmun in Thailand ihsin tlungin ka va kai dah. Cumi lai ihsin himi vek tuah thei dingin ka rak ruat dah. Asinan, thuhla a phunphun ruangah kei tla ka rak cangvai thiam lo.

2013 kum thok ah- GFYO sungah thu ka bur ih in lungkim pi cio ih kan ṭang tlang mi a si. Ahleice in kanmah sungah (mino le mino, upa le mino) networking le hmeltheiawknak kan nei a mal zet ih, tu vek occasion kan tuah lawngah pakhat le pakhat kan thei aw vivo ding tiah ruahsannak kan nei. Pakhat le pakhat tanyawzin kan nei dingin hmuton-awnak kan nei tam a ṭul si pei cu. 🙂

V – FYC hrang timtuahnak ih harsaknak nan tonmi pawl in sim thei pei maw?

BAT – 2013 hi kan hrangah Bad Year a si ti sehla a sual tuk lo men ding. Saikhumphai thuhla, Zalai khua, Lianrih khua le Falam ih leimin, Kalay ah tilian pawl thawn 2013 hi kan bad year a rak si deuh hmang. Siih, mipi telnak le kan duh mi a si fawn ih, sumpai lam ah thinphannak tete kan rak nei. Asinan, tu ah thaten kan ṭheh suak thei ih lungawi a um zet. Cule, Steering Committee ah tla a lengih thei aw cia dah lomi kan tam nan, kan remcang zet. Pathian zarah kha-tin harsatnak pi kan tong lemlo.

V – Tuiṭum FYC ih hlawknak na hmuhmi pawl?

BAT – Minimum in kan sim sehla, tuvek mino (300) lai hmunkhat ah tongawk theimi hrimhrim hi a man tuk zo tiah ka ruat. Hmunkhat te ah ni (5) sung hitin kan pawlkom aw theimi hrimhrim lungawi a um zet. Hlawknak lam in tile- Falam Youth Network (FYN) tiah ramsung, ramleng in networking body pakhat kan tuahsuak thei. Falam Medical Family (FMF) timi te tla himi ih a rah pakhat a si.

Young star tampi kan hmu thei. Ram le miphun hrangah hnaṭuan duhtu tla a tam sinsin in ka hmu. Ka hrangah- ‘Love is Time’ a siih, kan duhdawt mi minung siseh, miphun siseh, khua le ram siseh kan duhdawt ahcun caan kan pek cuang ding. Cunah, a hlan hnakin an Love is Time deuhtu a tam cuang ding tiah ka zum. Chatting lam ihsin “U BA, ziang kan tuah bet pei?“ tiah in suttu a tam deuh cuang. Khami momentum pawl kha thi lo dingin kan tuah sak cu a ṭul.

Upa le mino karlak ah tla link pakhat kan nei thei. Kan poinak bik pakhat hi- Generation Gap le pakhat le pakhat kan zum ngaingai lomi a si. Tuiṭum ah kan MP hrekkhat tla cu program pawl ah thatho zetin in telpi ih  lungawi a um zet. MP Pakhat tla cu Hakha ah meeting a nei ih riak ding asinan, a rak tlung sal ih kanmah hnen sawn ah in rak telpi.

Crown Education pawl ih in hlawmmi ramleng tlawngkai dan pawl, timtuah dan pawl tla in thathnempi zet. A lecture caan cem zo nan, a kiangah mino tampi va to in thu an sutmi pawl ka hmu ih ka lungawi ngaingai. An tlawngah paisa pek ṭul lo in, mi (5) lai cu thaten kan lo train sak ding ti kan relmi tla a um. CYO-Falam pawl in rak ngaihtuah dingin kan rel. Anmah tla an phur zet ih, a hran te in Kalay ah Workshop pakhat tuah bet an duh.

Cule, thuzirhtu pakhat a simi- Blogger Nyi Lynn Seck ih simmi ruahnak tha pakhat tla cu tu GFYO sungah kan GS, Salai Rih Lian ih hohanak in committee pakhat kan din ih, kan cangvai thlang ding.

V – Hmailam ah hi Conference tuah bet vivo nan tum maw?

BAT – FYC ih Statement kan suahmi ih no. 1 nak ah “Hih Conference hi- Mino pawl pakhat le pakhat karlak ah a tul tukmi le in thathnempi tiah kan hmu ih tuah bet vivo ding” timi te a tel. Kan tuah bet ko ding.

V – Mipi hnen ih thucah duhmi?

BAT –  FYC Report tla ka ngan ve rero ih ṭheh zik te thlang. Himi Conference cangsuak dingin sumpai in siseh, thlacamnak in siseh, thazang thawn siseh a phunphun in in tanpitu nan zate tlun ah tampi kan lung a awi. Himi FYC hi kan goal a siloin, kan starting point lawng a si sawn ih, ṭanpi thazang peknak tampi a ṭul. Hmailam ah tla tu vekin hnaṭuan tlang thei dingin kan zuam cio pei.

FYC BA Thang

BAT, Van Cung Lian

Na ruahnak

3 Responses to BA Thang (Salai) le VCTH Camkhat

  1. Lianlian   January 22, 2014 at 11:33 am

    Upa pawl hmun nan pek thiam ih lungawi a um ngai.
    Kumtin tuah thei uhla, a tha sinsin ding.

  2. Henry   January 22, 2014 at 12:05 pm

    Ka Rual… Na ti tha tuk..