Bawm Cawk Lomi Farahnak

Home » Cahram » Bawm Cawk Lomi Farahnak

By vcth on April 13, 2010.

Francis Cung Bik

Kan dung March 1 ihsin Life Impact International timi Kawlram farah nauhak pawl a bawm rero mi pawlkom pakhat ah thla 2 sung hna ka ṭuan. Life Impact International Thailand cu Measot base a siih Kawlram farah hngakṭah 30 hrawng an zoh khen, cuvekin India, Kawlram sung le Africa lamah tla hna an ṭuan. Kan inn kiangkap le khuasung ka sukso tinten logo a phunphun tar mi Mawṭaw pawl ka hmu ringring. Aw, hi pawl cu NGOs mawṭaw pawl an si hi ti ka thei. Cutin ka kiangkap Humanitarian, Human Right Organization pawl thu ka ban tawkin ka hlet hlai.

Leitlun khua pakhat ih NGOs a tambiknak khua pawl hril sehla Measot khua tla a tel ve ding ka zum. Kan Organization vek Christian Organization tete an tam nasa. Cuvek ṭhiamṭhiam in NGOs picang pawl tla an kim ṭhepṭhep UNICEF, IOM, IRC, World Vision tvp. NGOs a tum ti lo a fate ti lo an zate ih an tumtah mi cu Kawlram le Thailand ramri ih um farah harsa pawl bawm ding hi a si. An tumtah vekin an bawm nasa, an ṭuan nasa.

Kawlram le Thailand ramri ih farah harsa pawl hi a tlangpi thu in 2 million vuakvel hrawng an si ding tiah hlethlai tu pawl in an ti. Mi tampi cu ramri ihsin Thailand sung khuapi deuhnak Bangkok, Phuket, Pattaya, Chiang Mai tvp ah hna an ṭuan. Cui hnaṭuan te thawn a cawm aw thei ṭunṭo tu pawl cu harsa cazin ah kan telh lo. Farah harsa kan ti tikah hnaṭuan ṭhiṭha nei lo, ei in ding hrang a vakvai rero tu pawl kan ti duh mi a si.

Kan dung zarh ah Sky Blue tiih an kawh mi hnawm penpi ah kan feh. Cui hnawm pen cu tlawng pi vek maw tipi thuanthum vek tin ka ti sawn ding ti ka hril thei lo. Ka mit ih hmuh bannak in a deih lo. Cui hnawm pen kiangah cun inn sungsang 200 lai an um, mi pum in 500 hrawng an si. Hnawm pen ih hnawm pawl an sar, zuar a theih sal mi an zuar cu tin pum an cawm aw. A tlun lam ih ka tar mi Organization pawl tla cui hmun cu an feh ṭheu, an bawm ringring ṭheu nan an nunnak cu a thleng aw thei ngaingai lo. Cutin an si ringring ko. An rak si ringring. Hmailam ah tla cu ti si ringring ding percentage a tam ko.

Khawsungah a caancaan ka leng ṭheu. Minutes 2 voikhat ti tluk in Kawlram nauhak hnawmpung ih palang sia, hnawm bawr thawn ka hmu ringring. A caancaan ah zin hlo in ka inn zin ka hawl caan ah Kawlram mi farah pawl umnak ka thleng ngah ṭheu. Umnak thlam te an tuah ih (Slam veng) cutin inn sungsang rual a um mi tla ka hmu ngah ṭheu.

Humanitarian, human right le NGOs pawl in sumsaw tampi, fimthiamnak suah in an ṭuan rero nan hih pawlkom pawlih dawh ban lonak hmun ah farah zozai tamtak an um lai. Hih NGOs pawl hnaṭuannak in Kawlram mi kan pemawnak (migrant), kan farahnak pawl a dam ter thei ngaingai lo in ka hmu. Hih natnak cu ramsungih kan farah harsatnak ihsin a rak zun mi a si, curuangah hih natnak ih a hram cu ramsung ihsin a si tin ka hmu. A hram ihsin dam ter kan ṭual.

Kan rampi acozah, rampi pursumnak le fimthiamnak pawl in hi mi parah tam zet ṭuanvo a nei. Ka ram tuvek dinhmun a si ringring ah cu Pemawknak le farahnak cu thu buai pakhat a si ringring ko ding. Khawi hmun thlen khalih Kawlram mi ka si tiih hmai hngal zetih sim ngam lo dinhmun, rammi sinak ih uangaw lonak pawl cu a si ringring lai ko ding. Khatlamah cozah ih ṭuanvo a si ti tahratin zianghman ṭuan lo in zoh ringring tla a ṭha lo. Tu ihsin kan ti thei tawkin nawp aw cia uhsi. Ral ring ten ka fei le nam tim cia uhsi. Kan hmai ih sa a suak caanah kap man dingin. Ni nikhatah farahnak pawl an kiang ni, uangaw takin rammi sinak kan sim aw thei ni ni tleu mawi a tlang leh ko ding. Zumnak, ruahsannak le timtuah awnak thawn lungdong loin ke kar uhsi.

Na ruahnak