Ben-Nevis Tlang Kainak

Home » Hmun Le Hma » Khual Tlawnnak » Ben-Nevis Tlang Kainak

By vcth on October 17, 2013.

Salai Van Cung Lian (UK)

Kan leitlun ah minung hi kan duh mi le kan paih mi hi kan bang aw cio lo. Kei hi Laitlang ih ṭhanglian ka si vekin tlangpar kai paih zet pawl ka si. Ka thlennak ramkip ih a sangbik an timi tlang pawl ah kai thei ka tum ringring ṭheu. A caan ahcun ka rual pawlin “na va paih ve aw” in ti san men ṭheu. Asinan, tlangkai timi hi tlangkai paih mi hrangah cun a sunglawi zet mi, mah le mah zuam awnak pakhat a si tin ka hmu. Cun Tlang kan kai tikah thinlung ah paihzet le ngamzet a ṭul bet ah harzet in kan kai ih a zim kan vun tlen ahcun hlawhtlingnak ih a pek mi, sim theih lo diriam le lungawinak a um ṭheu. Himi feeling te hi um menmen in khan saa theih a si lo. Bawhlung kan sit ih kan goal fang maw, camibuai kan ong fang maw, tlan zuamawknak ih pakhatnak kan ngah fang maw, kan duh mi bawhlung team ih an neh fang maw ti vek lawng ah khan saa theih a si.

Ka umnak UK ram hi tlangsang pawl a um phah zet. Cuih lakah Ben-Nevis (4,409 ft) tlang timi hi tlagnsangbik a si. Himi tlang hi Scotland ramsung Highland timi area ah um. UK ram ahcun tlang hminthang bik a si vekin kumkhat ah tlangkaitu 100,000 an um. Tlangkai timi hi theihcia vekin ṭih a nung zet. Himi tlang ah hin a liamcia kum 5 sungah tlangkai tu minung 13 an nun an rak liam dah zo. Mihrekkhat cu (Avalanche) timi vur pawl in a silh that ṭheu, cun mihrek khat le an tla that, cun, mihrek le lungto ril minih a khawng that hai tivek an si.

Ben-Nevis tlang hi kaidan lamzin 4 lai in a um. Tlangkai tu zaraan cun Tourist route an timi zin in a kai mi an tam. Asinan, kei hi Tlangpar ih a ṭhanglian mi ka si, tlangkai experience tampi ka nei tikah tourist route lamzin men ih kai ka tum lo. Aharbiknak zin in kai ka tum. Hih tlang hi ke thawn kai men theih a si lo ih, tlaingkainak ih hman mi hreitlung, cramptom (boot ih bun mi ice palnak thir zum) timi le hridai pawl thawn kai a ṭul mi tlang a si. Kan zung ih ka hnatuan pi pa thawn cuih a harbiknak lamzin in kai ding ah kan rak tim tuah. Asinan , kan zung ih kan rualpi pawl hnih cun April thla khuasik caan (UK ram ahcun khuasik caan a si lai) ih tlangkai cu ṭih a nung kai hlah uh tiah in rak kham nan kan kai duhnak thinlung in a neh sawn ruangah in rak kham thei lo. In ṭhih deuhdeuh, a ṭihnung an ti deuhdeuh le kan kai paih sinsin.

Ka umnak khua hi England ram sungih Stockton-on-tees timi khua a si. Cuih ka umnak ihsin Ben-Nevis tlang cu Scotland ram sungah a va um tikah motor thawn nazi 6 lai va feh a ṭul. Cuih tlang tangih a um mi khua hi Fort William khua ti a si ih Tourist Centre zet a si .Kan zung ih ka rualpa thawn cu ka umnak khua ihsin Fort William khua lam pen in motor mawng sawng aw in kan feh. Tlang karlak zin tete an tam hlei ah khuacuannak a rem ngaingai. Tlang lak zin tete pawl kan pahtlang ih Scotland ramsung kan lut tikah Scotland a mawi dan hi cu rel ding a um lo a si. Pathian zaangfahnak in Holland, Norway, Denmark, Sweden, France le Switzerland ram pawl hi ka rak tlawng dah nan Scotland ram hi a mawi hlei cuang. Switzerland ram hi rammawi pakhat a si ko nan Scotland ram hi ka duh deuh. Ziang ah tile an tlang um dan le an khua le loo tete hi kan laitlang thawn bang awknak tete tampi a um in ka hmu. Tlang karlak zin tete pawl cu kan pahtlang hnu ahcun Fort William khua cu zaan 10pm ah kan vun thleng. Lamzin ah sakhi, sabek, thiahhlei ti pawl tam pi kan hmu. Himi khua ih Hostle pakhat ah kan riak. Kan riahnak Hostle hi kan kainak ding tlang tang rori ih um mi a si. Cun, mahten rawl suang theih cih a siih a man tla a ol bik .Kan Hostle ihsin tlagnzim tiang hi Tourist Route lamzin in feh ahcun peng 8 a hlat ih tlangkai ṭhang pawl hrang ahcun nazi (8) lai an rei .Kan kai tumnak lamzin hi CMD route ti a si ih peng 12.75 a hlat ih 1558m (5112ft) kai a si.

2012 April 14 zingpit nazi 7:00 ihsin breakfast kan ei ṭheh hnu ah Hostle ihsin kan so thok. Angki hlum, mawca, tlagnkainak ih hman mi boot, crampon ti pawl le Ice-axe, hridai pawl, lukhum, tidai le suncaw, GPS, Map pawl ti ṭhepṭhep in kan timhtuah hnu ah tlang kai cu ka pok vuahvo. Kan vun kai thok ahcun kan hmai ah group 3 hrawng kan hmu hai. Cutin tlang a sangnak lam pan in kan kai vivo. Ka rualpa hi ka taan phah tikah taan awk tuk lo ding in nuam deuh in kan kai. Kan baang nawn caan le kan cawl phah in a kai ve mi pawl thawn kan biakaw phah ṭheu. Cutin, nuam tete a sangnak lam pan in kan kai rero. Kan kainak lamzin hi mi kai an mal zet ruangah mi thlun ding a um tuk lo. Kanmah ten kainak lam zin hawl phah Compass hmang phah in cu ti kan kai vingvo.  Lamzin kan hawl dan cu, kan map parah compass kan ret ih khawi lam si North timi kan hawl hmaisa, cun kan feh duhnak lam ah compass kan ret ih cutin khawi lam feh ding timi kan thei thei. A hnu ahcun Kan pahnih lawng kan si ih ṭih hman a nung zik lam, thli le a hrangzet, a dai le a dai zet. Ka rualpa cu mithmuh can in ka tan phahphah ruangah ka hngak phahphah theu. Ka rualpa cu Muslim kha hmul sau zet a siih, a rucksack cu a tipuan angki thawn a khuh ih, kianghrol te thawn a so vivo ka zoh cu mibang lak ahcun capo tuhruat in Osama Binladin, Afghan tlang tluan ih a vak laimi video pawl in mang ter.

Tlangtang ihsin tlangtlun kan pan rero ko nan a zim cu thleng ih thleng ti um dah lo. Map tlun ih ka tar mi point 2 to 3 hi kan thleng in kan thleng thei lo. Kan mithmuhnak in a zim a bang miah kan thelng tinten tlagnzim dang a rak um cingcing. Kan baang phah thawn beidong a um zet ṭheu. Tlang nih mi a bum an ti mi hi kan thei cio ding ka zum. A zim kan hmuh mi hi a zim ngaingai si lo in, cui zim kan thleng tikah cem thei loin a zim dang a um cingcing. Thinsau zet, duhnak tumpi thawn kai lo ahcun a ol zet. Ka rualpa tla cu tlangzim kan thleng dah lo ih kan baangzet thawn keimah par lamlam ah a thinheng. Kei hmai in ka feh tikah kan theng zik maw tiah I sut cingcing. Kei nih le a thatho deuh seh tiah, thleng zikte tin ka bum cingcing. Tlangzim dang a hmu lala in ka parah a thinheng, kan elawk phah, cutin kan boot ah hlingneimi kan bun ih ice-axe hreitlung thawn kan kai vivo. Ni khua le tu le tu a thleng aw. Caankhat te ah ruahsur, rial a tlak ih rei lo te ah thli nasazet in a hrang, rei lo teah Ni a rung tlang lala. Kan kai vivo ih a zim thawk nak (point 2) kan thleng. Cui zim kan thleng in cu kan hmuitin mi a zim cu lang tikah ka rual pa in cu hihi maw kan fehnak ding, a nai te si ual a ti nan kan feh taktak ahcun thleng ih thleng ti um dah lo. Vur le khuk cancan in an thuk ih kan ke kan khainak hman ah kan bang tuk. Cun kan ke palnak ding hi a hnget khoh le khoh lo hreitlung in kan test hmaisa ta. Cek hmaisa lo in a kuarnak ah tlak in mithi an tampi theu ruangah ral ringzet in kan kai. Ka rualpa cu a baangtuk ih thaten a karnak ding cek lo in ka ke neh I thlun, cun a hrek hrawng kan thleng ah a palnak a cim ih lungto kar lak ah a ke hlikhlok (ankle) a merh awk ih cutin duhvek in a feh thei nawn lo. A mah le a pa zet, Emergency ka ko ding ka ti nan a duh ve lo, cutin nuam teten kan kai tlang vivo.

Kan kainak lamzin hi ṭih a nung zet. Tlang ka kai mi hmuahhmuah lakah a challenging bik mi tlang a si. A cancan cu ke palnak ding hawl ah ka buai. Ka hreitlung lawng in ka awk awk can a tam pi. Nuam teten kan feh ih kan dungah mi hrekkhat in in rak man. Kan cawl phah, suncaw kan ei phah in nuam teten kan kai ih zaan lam nazi pa 3 ah a zim kan thleng. A zim kan thleng in cu rial a tlak ciam co ih suncaw khal ṭhaten ei theih a si lo. Thli le hrang, ruah le sur, rial le tlak, ziang vek view khal hmuh theih a si lo. Cumi lakah cu ka lai coat ka keng mi te cu ka hruk ih ka zuk awk ta thotho. Himi tlang hi Laimi lakah a thleng hmaisabik ka si ko ding tin ka zum. Ka rualpa cu a zim ka thlen hnu nazi hrek hrawng ah a rak thleng. A tlun cu a rawn zet, inn te an sak nan a sung lut thei a si lo. Ka rualpa cu kee bai nawn ten a rak thleng in cu kan lawmawk rero ih kan diriam zet.

Tlang zim ahcun mero le a pit thluh tikah kan hmai pi 10 fang lawng kan hmu thei.Tlagnzim a thlengtu kan mah pa 2 lawng kan si cumi fang te ah. Tlung lam cu a ol deuh mi ‘Tourist route’ in tlung kan tum ih kan fehnak kan hmu thei nawn lo. Vur in a khat thluh tikah kan fehnak ding lamzin kan hmu thei nawn lo. Khoilam North si ti khal kan fiang nawn lo tikah ka rualpa thawn kan el awk. Kan zumnak a dang veve, kanmah zumnak a hmanbik in le kan ruat awk. Culai ah keneh ka hmu ih cui keneh kan thluh vivo nan a hnu ahcun kham kiangah kan thelng. Kan kir sal lala ih a zim ah kan suak sal. Cutin kan vaivuan ih a hnu ahcun kan thin a phang thlang . Nikhua a tha cing ko ding tin a tlangzim te ah kan hngak rero. Nikhua le that ti um dah lo. Vanthatnak ah mi pa 2 Tourist route in a rak kai mi kan hmu ih lamzin a fehnak ding in sim. Lamzin hmuhnak ah lung tete an rak phun nan mero a pit tuk ih kan rak hmu thei lo mi si. Cui lungphun tete cu pi 20 hlat tluk ah a um vivo ih kan thlun vivo. A tang deuh kan thleng in cun khua a vang deuh thlang mi a rak so kan tong phah phah. A rak so pawl khal in “a tlun kan thelng zik maw” tiah mi an sut cingcing. Thleng zikte tin, thazang ka pek hai. Cu mi lakah kan ton mi nupa te pakhat cu mangbangzet in an pa a kai paih nawn lo, an nu cu thinlung makzet in kai rero, an pa a hnuk phah rero, ka hnih an suak leh lam.

Mero tang kan thleng in cu tlangtluan pawl kan hmu thei sal ih kan hnangam zet thlang. Cumifang ah ka rualpa a ke na mi a thei awk sal. Cui hlan cu kan thinphangnak thawn a ke na mi tla a hngilh si hmang. Tourist route cu lamzin thaten cek mi a si ih map zoh tul nawn lo in zin thlun vivo a si ih thu kan rel phah vivo. A nih hi Mathematics thiam zet mi a si ih David Hilbert le Einstein thu kan rel phah. Einstein general relativity a rak suah hlan deuh ah problems tam pi a rak nei mi kha Prussia university a rel ih David Hilbert in .. hmmm kei mah nih ka solve thei ding tin an rak zuam aw thu. Cule lamzin ah UK ih Mc.Donald interior design tuahtu pa kan tong ih, ziang ruang ah UK ih Mc.Donald pawl hivek look kan ti pei cu, urban look, an concept pawl in sim vivo ih a nuam zet. Cutin nuam teten kan suk vivo ih zaanlam na zi 8:30pm ah dam ten kan Hostel kan thleng sal . Kan ke, kan kawng, kan el, ka hnawng pawl a na thluh. Rawl hman ei thei lo tluk in, zaan tla thaten itthat theih a si lo. Nazi 13 sung tlang kai ticu a rak ol lo zet . Ka rual pi pawl ti vek in ‘kan va paih ve aw’ ka ti awk ve. Asinan, tlangkai timi hi a tlun kan thleng tik ih harsazet in ka zuam ih ka hmuitin mi hmun ka thleng timi lunghmuinak hi man ih leithei a rak si lo. Zuamnak le harnak tuar hnu lawng ah ngah theih mi a si.

Tlang kan kai tikah zin tampi a um. Cuih zin cu mah le cakdan, experiences par ih hril theih a si. Cun nuam teten lungdong lo in kai rero lawng ah a zim kan thleng thei a si . Minung kan nunnak khal kan kai rero mi tlang kan nei cio . Choice tam pi kan nei, Pathan in kan mah le tawk cio kan nun ah in thiamnak in pek. Cuih kan tlang cio kan kai tum tikah zing tin kan kai ding? Zing lamzin in kan kai ding ti hi hril thei cio a si? Kan hmuitin mi ah cu a shawh pek lo in cet lo bang lo in kan kai vivo si le kan hmui tin mi ah kan thleng thei. Minung kan hmuitin mi hmun thleng ding ah ol ten a thlengtu hi kan um ding ka zum lo. Zumnak, mah le mah zumawknak, harsatnak tong ta loin kan hmuitin mi kan thelng thei lo timi hi tlangkainak in I zirh. Tlangkai lawng in maw na thei tin in capoh thei. A thei men men mi le mah ih tong taktak mi an bang aw lo. A tlun thleng ding ah thinlung lamah (mentally) kan cak zet tul, timi khal ka nunnak ah I thathnem pi. Minung cu kan thlengnak hmun ah satisfy timi a um dah lo, Cuihnak in sangsin thleng ding ah kan tum sinsin. Himi tlang ka ke tang ah ka ret thei zo, hi hnak ih sang sawn khawi mi tlang si ka kai ding tiah ka ruat. Ne ta ah Scandinavia (Norway, Denmak, Sweden le Finland) ih tlangsang bik “Gald Hoppigen” timi tlang ka kai thu ka rak ngan leh ding.

[nggallery id=7]

[lWNtNGAfc_8]

Na ruahnak