Biaknak Hawltu

Home » Cahram » Biaknak Hawltu

By vcth on February 5, 2011.

Lungbawk Brother

A tu a nung mi hi keimah ngaingai ka si ko maw? Tu ih hi tin thu a ruat rero tu hi keimah taktak a si ko maw?

Ozzie cu a zumnak kha a mah te’n hawl suak tumtu nauhak tleirawl te a si. Jews sungkua ihsin a ṭhanglian ih Jews biaknak tlawng ah a rak kai. Nikhat cu, “Pathian in Lei leh Van, thil ziang kim hi niruk sungah a sersiam thei asile, Fala thianghlim sung ihsin naute a suak ter thei lo ding maw?” tiin an sayapa (Rabbi) a sut. Ziangahtile, Jews biaknak in Zisu suahnak an zum lo. Fala thianghlim sung in naute a suak thei ding an zum lo. Faate neih ding ah cun nunau leh mipa um tlang a ṭul, an ti. Cumi zumnak cu Ozzie in a pom thei lo. A thinlung sungah theihbet duhnak lawnglawng a rak um.

An biaknak cu a do lo, asinan, a ruahnak thawn a kaihaw lo mi a um tiin a ruat. Pa a nei nawn lo ih a nu thawn lawng an um. A nu cu zumnak lam ah a hngetkhoh zet in a t’ang tu a si. Tleirawl pa te khal a nu ih biaknak ruangih a tuahmi cu a lungkim pi mi a tampi. A nu in Sabbath ni a ul tikah pawntam lo te’n a um. A zumnak khal an biaknak in tampi a kaihruai. Asinan, tleirawl lai ihsin a thinlung sungah theihfiang duhnak a rak um. “U.S ‘Daanhrampi’ (Constitution) sung ah “milai hmuahmuah hi rualrante’n sersiam kan si” ti a si fawn, ziang ruangah Jews pawl hi ‘Thlanmi’ (Chosen people) kan si thei?” a sayapa a sut. A sayapa cun Political equality leh Religious legitimacy tiin phunhnih ah ṭhen tahrat in a sim ciamco. A sayapa sim mi cu a ngai rero ko nan a lungkim thei cuang lo. Pathian cu ‘ziang tin kim a tuah thei, fala thianghlim sung in naute a suak ter thei, cule, milai kan zate’n bangrep in sersiam kan si’ ti ah fehpi a duh.

Nauhak danglam te cu a si hrimhrim. A sayapa leh a nu cu an zir mi leh an theihmi lawng an rak zum. Pathian thu siseh, Biaknak siseh an mah te’n an hawl lo ih, theihbet duhnak khal an nei lo. A umcia mi parah an zumnak a hram an rak bun. Cucu an danglam awknak bik a si. Kan zumnak a hrampi hi a hman maw? A dik maw? An mah te’n theih an tum lo. Asinan, tleirawl pa te cu a zumnak kha zalen zet in a hawl suak tum. Ka hmailam cu keimah ih kut sungah a um, duhhril theinak ka nei a si, ti a zum.

Asinan, a pi leh pu san ihsin an rak hmang mi biaknak, an fehpi mi zumnak pawl dokalh zawngin ruahnak a rak nei ruangah, a mah le mah kha thu a sut awk thlang. “A tu hi keimah ka si ko maw? Hitin thu a ruat rero tu hi keimah a si taktak maw?”

Na ruahnak

3 Responses to Biaknak Hawltu

  1. David Ceu   February 5, 2011 at 9:14 am

    Dear, Brother

    Leitlun dan ah cun naute suak ding cun nunau le mipa thisen tong aw lo in a ngah lo. Curuangah Zisu hi mipa le nunau thisen tonawknak tel lo in a suah thei ngaingai pei maw? ti ah mi tam pin an ruat. Asinan mipa le nunau thisen tonawknak tello in leitlun ah milai a rungsuak mi an um ih cu cu Adam{Leidip le Thaw in} le evi{Adam ih hnakruh in} an si.
    Mi hrekkhat cun nunau le mipa thisen tonawknak ruang ih nau te suak hi amah pathian ih tuahmi a si. Curuangah Zisu khal mipa le nunau thisen tonawknak tel lo ih a suah ahcun Pathian in a mai dan lala a kalh a si kei cu an ti. Asinan pathian cu milai dan in a temtawi ban ve lo. Thimnakah thihnak khal leidan ih um mi asi. Asinan Pathian in mithi a kaihthawh tikah amai dan a kalh tinak a si lo. Curaungah Zisu’i suah dan cu lei dan ih tah cun zum a har zet ngai. Curuangah Mary khal in cang thei in a theilo. Asinan Pathian harah thilcang theilo a um lo ti a si kha{Lk.1:34-38}.

    Hminsin: Hi hi ka lo let a si lo ih midang khal ih siar ding ah ka ti men hokhaw. Ngansual mi a um le ngaidam ka lo dil.
    David Ceu

  2. math games   February 10, 2011 at 7:11 am

    thanks

  3. jn   February 10, 2011 at 4:41 pm

    ttha tuk aw, kan ttong le ca in hi vek sair ding tthattha tampi um vivo hram seh tiah saduh ka that…