Bill Gates

Home » Cahram » Bill Gates

By vcth on August 1, 2013.

Francis Cung Bik

Bill Gates cu leitlun mino tampi ih uar zet mi le milian larbik pakhat a si, a hleice in pursum pu pawl hrangah cu an siangpahrang te pakhat a si. Tuni leitlun Computer zaten zikzik ah Microsoft ih tuah mi software pakhat tal cu a hmang lo kan um lo. Gates cu Microsoft a dintu a si hlei ah leitlun milian bikah kum rei pi a si tu tla a si. 2008 kum ah a rank a tlak lawk nan Forbes magazine ih March 11, 2009 leitlun milain bik pawl rank peknak ah a pakhatnak a sisal ih Warren Buffett in a pahnihnak in a thlun.

Bill Gates thu

Gates cu Oct 28, 1955 ah Seattle, Washington ah a suak. A pa William H. Gates ,English-German, cu sihnii (Lawyer) a siih a nu Mary Maxwell Gates, Scotch-Irish, cu tlawng sayamah le United Way Charity ih Hotu(Chairperson) a si. Gates te innsungsang cu mizaran, nung thei an siih Bill Gates le a nau nu pahnih tla cu tlawng ṭha ah an kai thei. Bill Gates cu a nauhak lai ihsin Computer tham le tok a paih zet, tlawng ah amah vekih computer paih mi rualpi Paul Allen ti mi a nei (neta ah Paul Allen cu Microsoft a dintu le Bill Gates ih Business partner a si).

1973 ah Lakeside tlawng in high school a ṭheh ih Harvard University ah phunsang tlawng kai a thok. Bill Gates cu tlawng ca kha a thinlung sungah a um lem lo, caan a nei tinten tlawnginn computer a hmang ringring. 1975 Kum ah MITS in Intel microprocessor 8800 (Altiar 8800) an suah. Cui MITS Altiar 8800 cu Allen thawn an hmuh tikah an thinlung sungah program thar tuah ding le company thar din duhnak cu a alh hluah hlo.

Gates le Allen cu MITS (Micro Instrumentation and Telemetry Systems) ah an raulpi pawl thawn computer thawn pehpar aw in (a hleice in cafang hram ṭoh mi program) an tuah rero thu an sim. Cule MITS thawn kutkai aw in ṭuan tlang ding an sawm. A ngaingai ah Gates le Allen in ziang ṭuan mi an nei hrih lo an thluak sung (an ruahnak) ih a cang thei ding ti mi lawng a si lai. Nan MITS president Ed Robert in a lungkim pi ih cutin Gates le Allan cu MITS thawn hna an ṭuan. Harvard University ihsin khuan a dil ih a lang ten MITS thawn hna a ṭuan. Cutin Gates cu a khuan laknak ihsin tlawng ah a kir sal nawn lo.

Cui an partnership hmin cu Micro-soft tin an ko. Neta ah Gates ih ruahnak pawl cu MITS in an lungkim lo mi a um phahphah ih cutin Macro-soft cu MITS thawn an kom aw nawn lo. 1976 ah Microsoft cu register mi company ah a cang.

1980 ah IBM(International Business Machine) in Microsoft cu an computer ih hmang ding in an lung kim. Microsoft company in PC-DOS kha 50,000$ in a rak zorh. 1981 ihsin Gates cu Microsoft company ih President le board ih Chairman a si. 1985 ah Microsoft in Windows an tuah ih IBM in hmaisabik a hmang. Microsoft windows cu a hman a nuam, a man a khung tuk lo, ziang hmuahhmuah a hlan thil suah mi pawl hnak in a remcang cu pawl ruangah Microsoft cu a lar zet.

Gates cu 1994 Kumthar ni January 1 ah Melinda French thawn an nei aw, fanu 2 le fapa 1 an nei. An inn cu Lake Washington ah a si ih 125 million man hrawng a si. Kum tin tax 991,000 hrawng a pe ṭul. An inn area cu 66,000  sq ft vuakvel a kau, pi 60 kau tileuhnak, pi 2500  sq ft kau gym leknak, pi 1200  sq ft kau rawl einak khan, cucu an inn le lo hman mi tla cu an si . 1994 ah lelan (auction) in Leonardo da Vinci ih ngan mi Science cauk pakhat Codex Leicester kha 30.8 million in a lei. 1995-2007 le 2009-tutiang leitlun mi lain bik ih hril mi a si.

1999 ah Bill Gates ih neihnak cu 101 billion hrawng a si ding ti an zum. Kum 2000 hnu in Microsoft company cu an tlak vivo. Gates cu Microsoft lawng siloin a dang company pawl thawn tla hna an ṭuan tlang. Kum 2004 in Berkshire Hathaway insurance company ih share holder pakhat, mi thupi pakhat a si.

Time magazine in Gates cu Kum zabi 20 sungih mi ropi 100 sungah an hrih ih 2004,2005 le 2006 mihip (influence) thei bik tu 100 sungah a tel. Bill Gates cu milain, mitawk ti lawng siloin leitlun farah harsa bawmtu tum bik tla a si. 2000 ihsin Bill and Melinda Gates foundation an din ih leitlun dam lo, vanduai tong mi ram, pawl 28 billion leng lo an ṭanpi zo.

Harvard tlawng ihsin tlawng ṭheh suak lo pa, buaih ( Academic degree) ngah lo pa cu leitlun pursum leilawnnak ih a aungmin biktu, mifarah zonzai a bawm thei biktu le milian bik, mi a hip thei biktu pa ah a rak cang ta.

ps: Bill Gates cu Phunsang tlawng tampi le Pawlkom hrekkhat in upat sunloihnak ah Honorary Doctor an pek.

Na ruahnak