Bualpi Khaw Thu Thlirsalnak

Home » Thlirnak » Bualpi Khaw Thu Thlirsalnak

By vcth on September 9, 2016.

Bualpi Khua

Bualpi khaw thu ah hmuh dan phunphun a um ih tu ni tiangah cozah lam mawhpuh na, mipi lam mawhpuh na ti in online par ah siar ding tamzet hmuh rero a si.

Bualpi thu ah hin ruah ding a um mi cu, hi khua an dinnak hi cozah hlun lai ihsin a si ih cozah thar khal in a lungkim thu a langmi cu Chin State Government Minster pakhatin Bualpi khaw mipi pawl a tlawn ttum ah cozah in umnak cin ramri tuahmi ah an um thei thu, cu lo dang hmun ramri nor nawn lo dingin a sim hai ih an khua hmin khal ah Bualpi siseh tin a sim. Bualpi hi hmunram nuamzet a si ih inn tamzet um theinak khal a si. Hmailam Chin ram hrang khal ah um theinak ding hmun nuamzet a si ih lamzin pehtlaihawknak khal a olsamzetmi hmun a si. Asinan tu ni ah Chin cozah mipi um thei lonak hmun a si, cozah thingram a si ti in a um mipawl cu an inn pawl an nor siat sak thluh tik ah ramsung Chin mipi lawng si loin ramleng um Chin mipi khal mangbang riahsia in a um an tamzet.

Chin miphun hi a nungmi Pathian betu kan sivekin pakhat le pakhat duhdawt aw ding, zawnruah aw ding, bawm aw ton ding ti pawl hi kan thupi a si. Milai dan hi cu Chin cozah in Chin mipi parah a tuah mi zohtik ah thin a nuam thei lo lawng si loin riah a sia! Cozah lam in mipi pawl hnen ah ralrinnak cu vei 3 lai an pek ko, sihmanseh cuti ih an siat ding thotho a si ahcun a pekte ihsin a ttuldanvekin thazang thawn inn pawl sak thei lo dingin khamsehla hivek din hmun khal hi kan thlen lo khal a si men thei. Cozah lam khal in mipi pawl ih ttul mi pawl theihsak in an tul mipawl cu tuahsak thei sehla cu cucu cozah pitling pawl ih tuahdan a si ih mipi khal in cozah hi Nu le Pa vek rori in hmailam khal ah rinsan an tlakzia an thei fiang vivo sawn ding khi a si.

Sikhal sehla tu ni ahcun mipi lam in cozah hi Nu le Pa vek ih rinsan ding cu sim lo, ral vek sawn in a hmu aw tikah kan mah Chin miphun le miphun sungah lungrual lonak tiang a suahpi vivo ding ti hi ruahtlakzet a si. Hi Bualpi thu ruangah mipi tamtak khal in cozah hi an hmu sual vivo a si. Curuangah Chin cozah in hmailam ah mipi hrangah hna tampi a ttuan theinak ding ah mip thazang thotho a ttul ding ruangah mipi pawl ih hmuhsualnak pawl cu thatnak lam in hmala hramsehla cu a tha sinsin dingmi a si.
Thunetnak ahcun Chin miphun in kan ram sung ih mipi ttul mi khaw thar din ding thu ah, cozah zanthing loram thu ah, leisung suak thu ah kan mah Chin mi rori in lairel theinak kan neih lawng ah Chin mipi ih ttulsam mipawl cu zamrangzetin kan tuahsak thei ding a si. Tu ahcun khaw thar din ding khal ah, tlawnginn sak ding khal ah lamzin tuah ding khal ah bahu cozah hnen ah siannak thu pek a um lo ahcun Chin cozah khal in Chin mipi ih ttulsamzet mi khal an tuah thei dah lo ding ih cutin Chin mipi sung ah buainak hi a suak thei ring ring a si. Curuangah hitivek mi sakcia mi inn pawl hi daan lo ih an um hman ah siatsuahin buainak pawl hi Chin cozah khal in hmailam ah tuah lo hramsehla, cuhnak tha sawnin hma a lak thiam ding khal hi mipi lam in kan ruahsanzet a si. Ziangkhalle tu ahcun inn siat tuar mipi pawl hi ei in ding an nei nawn lo, umnak ding an nein awn lo, siivai, puantom tiang an ttul tik ah Chin cozahin zangfahnak , lainatnak thawn kan mipi mangbang ih a tuar mipawl hi bom lohli sehla cu lungawinak mitthli loh thei loin a luang ding ih huatawknak, dokalhawknak le relsiatawknak pawl cu a luangmi mitthli in hmuhbanlonak ram ah a luanpi ding ti cu mipi ih saduhthat a si ti ruahsannak thawn….

By Khumpi

Na ruahnak