Buannel Ram Mawi, Ram Nuam

Home » Hmun Le Hma » Chinram Hmun Ropi » Buannel Ram Mawi, Ram Nuam

By vcth on June 17, 2014.

 

Buannel Tlang

Buannel tlang, Buannel lenmawi, Buannel ramnuam cu Falam peng Hmunluah le Tedim peng Kaptel khua karlak ah a um. Buannel tlang cu tipithuanthum in pi 7,000 tluk a sannak ah a ummi tlang a si.

Buannel cu Chinram ih tiva pibik Run le Tio lak ah a um. Chinram ih tili mawi Rihli ihsin peng 17 tluk a hlat ih, Hmunluah ihsin peng 3 le Kaptel ihsin peng 4 tluk a hlat. A tlang lenkolh a kauh lam hi peng 4 vuakvel hrawng a si.

Kan Ram ah Tlang sang tam tak um hman sehla, Buannel ihsin hmuh hlat le hmuh kauh a theih bik. Khaw thian laiah cun zohtumnak [durbun] thawn zoh sehla cu Pakistan Tikhuah, Mizoram ih Khaw 20 lai le Aizawl, Camphai tiang in a lang thei. Kennedy Tlang zim, Lailun Tlang, Zinghmuh Tlang, Falam Khaw lu Vankau Tlang, Musip Tlang le Kawlvacuan Tlang pawl khal hmuh a theih. Ṭio dunglam vun thlir sehla, mit ih tlin tawk tiang a lang thei fawn.

Hlan ah sa tintian an rak um dah ih, vate ah Utawng siar lo cu an rak um kim an ti. Phul mawi nuam tak a si ih, mual tum taktak thlur thum a um ih, mual tedeuh 47 an um fawn. Tlang zim phul ah cun kum tluan in Bingpi Par, Hawilo Par le Sawkhlei Par, tvk. an par ṭheu. Ṭhal ah pangpar ci 7 hrawng le fur ah ci 5 hrawng an par ṭheu. Hrampi kut zaphak can hrawng hlir p
hah diaidi te’n a um ih, khohkhah le hriam khal um loin ke thawn pal khal sehla nel cetco te hlir an si. A lai ah tiva [sih] cu tingiatngi ten kel ziangmaw zat kel in fim zetin a luang fawn. Thuphuan sungih ngan vek deuh in a laiah nunnak tiva a um hleiah natnak phunphun hrangih damnak thingkung khal tampi an um. Cun, ṭhal nisat laifang khalah a dai riahri thei ringring fawn.

A hmin hi Zinghnam mei in lei a phiah veldan cawi in “Buannel” an ti a si hmang. Zinghnam mei in lei a phiah netno hi “Nel a Buan” an ti. Buan ti cu ‘ciarbek’, nel cu ‘lei’ tinak a si. Chinmi tamsawn cun “Buannel” kan ti thluh. Asinan, Tedim unaupawl cun “Len Nupa” an ti. A san cu Buannel hmun phul tak ah hin a tlar in tlangmual tum tham deuh pahnih an um ih, cucu Lenpa le Lennu tiin an sak. Lenpa cu Kaptel lam deuh ah a um ih, Lennu cu Hmunluah lam deuh ah a um. Fiang takih zoh ah cun ngaihbel theih in Lenpa cu mipa tilbawr le serh pianhmang vek deuh in a um ih, Lennu khal nunau zahmawh bang tak mual pawng, nunau serh pianhmang vek deuh in a um ve. Buannel tlang zim ah lungto thawi’ dawl mi thlan a um ih, hlan ah cun “Tenglam tei’ nupa thlan” an rak ti nan tu ah cun “Evi le Adam Thlan” ti a si. Tedim unaupawl khalin cutin an ko ve.

Tlang zim phul rawn nuam takih Sihti fim, thiang, vut tak, ṭhal ih kiam cuang lo, fur ih tam cuang lo; phul pangpar mawi taktak umnak hmun: Tenglam runthing tum pipi, ngaw mawi le kham sang taktak, khuaipi le sa thar runremnak ṭha taktak umnak hmun; Riakmaw va, hram thiam va tinkim, Sum vabawi, Thliahhniar, Vahai, lei ih tlang vate ci dangdang pawl le ramsa tinkim tuallennak hmun; Pacang ṭha ramtawipawl ih Cawngtinler tuallennak hmun; India le Myanmar ih um Chinmi hmuahhmuah khal ih hmuh an cak cio mi cu “Buannel Ramdai” tiih an kawh ṭheu mi “Chin Ram ih hmun mawi le nuam bik” hi a si.

Buannel ram hi kan pupapawl in “Buannel Ramdai Lung Tilengtu” tiin hla tamtak an rak phuah. Kan sakhua le nunphung hrang khalah thil pawimawh tak a si tlun ah kan hnam pumpi hrang khalah hmun sunglawi a tling a si. Pangpar phunkim, damnak thingkung le nunnak tiva umnak a si vekin rannung le sa tinkim ih Honeymoon hmannak ti theih khal a si. A ram nawmdan, mawidan le ṭhatdan pawl zoh in Pathian tuah mi “Eden Hmuan” thawn a bangaw ti theih a si.

Buannel Map Zoh Na Duh le >>> Hinah Click aw

Sirhsan: FPMY Kum 10 Kim [Tin Jubilee, 1995-2005], Chinland Today

Na ruahnak

2 Responses to Buannel Ram Mawi, Ram Nuam