Cangan Uhsi

Home » Cahram » Cangan Uhsi

By vcth on December 10, 2013.

Francis Cung Bik

Cangan ti hi thil thupi zet a si. Cucu zo cio khal ih lungkim mi a si ko. Asinan kan laimi mino ah hin cangan a zuamtu hi minung an tam tuk lo in ka hmu. Mino pawl ih tuahmi magazine, phunsang tlawngta pawl ih tuah mi magazine, biaknak lam ih tuah mi magazine tete pawl ka thlir tikah mino cangantu hnakin kum upa lam pawl ih cangan mi a tam sawn ringring.

Keimah ka hmuh daan ah mino pawl hi ca kan ngan paih lo ti hnakin a ngan kan ngam lo in ka hmu. Cui ngam lonak in paih lonak, paih lonak in thiam lonak in sauhpi.

Thil hmuahhmuah hi a hram thok hi a har bik in ka thei. A liam cia kum 15 hrawngah hla phuah daan ka rak zir dah. Kan sayapa in hla pakhat cio in phuah ter. Cucu ka hrangah cun thil har tak a si. Sun ni vu ten ka teimak rero nan hla tluankhat hman ka ṭheh thei lo. Cutin hla tawi pakhat phuah dingah zarhkhat caan a rak cem. Cutin sunday school hla tete ka ngan thok, cule solo mal tete ka bei, cutin neta ahcun Chior tivek tla ka ngan, zarhkhat ah hlatawi pakhat si nawn loin zarhkhat ah Choir Anthem pi pakhat tla ka ngan, cutin a rak rem cang vivo.

Cangan tla cutivek thotho a si in ka ruat. Kan ngan ṭhang vivo ahcun a zia a rak um vivo. Cucu cangan lawng tla siloin ziang hmuahhmuah ah a si ko hmang ti aw!

A hleice in Pastor pawl, tlawng saya pawl le Niangnganzii tama pawl hrimhrim cu casiar le cangan teimak a ṭul ngaingai. Ca na ngan ding tikah a silo bik in ziang na ngan ding ti cu na ruat a ṭul, a silo le ca na siar a ṭul. Cangannak in thu in ruat ter, ca in siar ter. Ca siarnak le thu ruatnak cun theihkauhnak a suahpi. Cui theihkauhnak cu mipi hmai ih thu kan sim tikah, tlawngta pawl thu kan zirh tikah a thahnem pi zet. Theihnak a nei lo mi Niangnganzii tama cun ram a hruai ṭha thei lo ding, cuvekin theihkauhnak a neilo mi Pastor tla in a kawhhran a hruai ṭha theilo ding ka zum.

Tuni ih mino cu thaisun hruaitu tiih an rak ti ṭheu bang in tuni ih mino pawl hi kan hmailam caan ih Chinram pi a hruaitu ding pawl cu kan si. Tu ihsin theihkauhnak in siseh, dengfel thiamnak (IT) in siseh kan tat aw nasa a ṭul. Zozo khal in sumpai cem lo bikih kan tat aw theinak hmun cu cangan hi a si.

Cangan Uhsi

Na ruahnak

2 Responses to Cangan Uhsi

  1. LaiPacang   March 6, 2010 at 4:34 pm

    E law… ka rak zuam vivo ke..
    Hivek ih forhfialnak in pekmi par ah tamzet ka lungawi