Chin National Day Thuanthu

Home » Cahram » Chin National Day Thuanthu

By vcth on February 20, 2015.

Thuhmaihruai

Chin National Day ni cu kan umnak hmun tin kim ah sunglawi zet ih hman a si thlang ding. Himi ni ah, kan Chin nunphung, thuam le lam pawl hmuhnak kan nei hlei ah, himi ni hi ziangtin a rak cang ti khal sim ringring a si. Cutin kan sim tik ah, kan sim dan, a bang aw cio lo. Mi tampi cun Chin National Day cu hlanlaisan ih kan rak hman mi “Miuk dan” kha siatbal in danthar a si mi Democracy ah kan thleng ni, mi hrek cun, Falam ih mipi 5000 lenglo tong khawm in thu rel cat a si ruang ah, Chin mi lungrualnak kan lang ter ni, mihrek cun Feb ni 20 nihi kan Chin thuanthu ah thupi mi ni a si rengreng tin khal Feb ni 20 sunloihnak ni, ti vek in a phunphun in sim a si. Cun, hlanlai kan pi le pu pawl in, a sansan ih an rak hman mi, miuk dan hi, rothil pakhat ih kan kilkhawi sawn ding mi a si. Himi dan siatral in dan thar kan thleng ni hi National day tiah ko a tlak lo tiah a ti tu khal an um. Daan thleng ni meimei, National Day ih ko a tlak lo ti tu khal kan um.

Chin National Day

A hmaisabik Chin National Day Coutersy of U Maung Ha

Cun, thuanthu kan sim tik khal ah kan sim mi kum le ni thla khal a bang aw lo. Tahthimnak ah Chin National Day Golden Jubilee Magazine sung ah Pu Vum Thu Mawng ih homi Chin National Union Organization le mirang pawl an tonawk ni hi Robert Siang Lian in 1938 ah a si tiah a ngan. Asinan, Mindat Zuzin in cun 1940 ah a si tiah a ngan. Cun, mipi rasuak zat an sim mi khal a bang aw lo. Pu Vum Thu Mawng te pawl an rak cangvainak ruang ah kaih an tuar ih, cui kaih an tuar ni khal cu mihrek in Feb 20, 1939 ah tin an sim. Mi hrek in Feb 25 1940 tivek in a dang dang in kan sim cio. Cun, February ni 20 ih mipi a ra suak tu khal 5000 an kim thei lo lawlaw, Falam vek khuate ah khawiah an riak ding tivek, mahte ruahnak in a cang theilo tiah a eltu khal kan tam zet.

Hi thu pawl sim fiang ding ah le Chin National Day kan pu le pawl in ziangruang ah Feb 20, 1948 hi an rak hril timi pawl zingzoinak ka rak nei. Nan thei cia vek in, kan mah Chin mi ih ngan mi pawl cu pakhat le pakhat kan bang aw lo tik ah, mirang pawl ih rak ngan ta mi pawl hi zum a um bik ding tiah, hi thu pawl ih London ih The British Library ah le Yangon ih National Archive Department pawl ah records pawl ka va hawl.

Ni bang aw lo mi tete sim fiangnak

Thuanthu kanzoh hlan ah ni a bang awi lo mi tete sim fiangnak nei hmaisa sehla. Chin National Day ni ih kan sim tambik mi cu 1918 Feb ni 20 ah U Vum Thu Maung te ho in Maymyo ah Chin Education Uplift Society (CEUS) an rak din timi hi a si. Himi thu hi Evidence ngaingai in cu ka hmu thei lo. Chin National Day thuanthu a ngan tu le speech a pektu hrekkhat pawl ka sut tik ah, Chin National Day Golden Jubilee Maganzie ta an lak sin mi a tam. Pu No Than Kap ih “A critical analysis of Chin National Day” timi sung ah, cangantu Mindat Zuzin hnen ah hi thu thawn pehpar aw in a rak sut dah nan, khatlam in Evidence ngaingai an hmuh thei lo. Pu Than ih ngan mi sung ah cun himi ni ah CEUS in Chin ram ah Kawl ca zir an cawl ter mi an duh duhlonak an phung tiah a sim. The Chin Education Uplift Society (one of the leaders was Vawmtu Mawng) made a protest against the decision of the British authorities to rescind the teaching of Burmese language in Chinland.

Ka zingzoi thei tiang ah cu, himi hi 1918 ah cu a cang thei ding a bang lo. Ziang ah tile U Vum Thu Maung thu research ka tuah tikah, a nih hi 1900 ah a suak ih, a kum 17 a ti ah Mirang ralkap a lut ih, kum 18 (1918) ah cun Laitlang ah Mirang ralkap thawn ral a do rero lai. Maymyo ih a umnak cu 1922 lam lawng in a si lai. Pu VTM ih kuttang ih hna rak ṭuantu Pu Sein Yaw Aung in cun, hi ni hi 1922 Feb 20 ni ah a cang mi a si tiah i sim. Cunah cu, U Vum Thu Mawng khal Maymyo ih ralkap a ṭuan lai fang a si ih a si ding a awm ang zet. Cun, Chin ram ih Chin (Laizo) ih cazir hmaisabik ih Falam tlawng ah a si ih, 1925 kum ihsin zir thok a si. 1925 ihsin Kawl cazir an cawl ih, English le Chin (Laizo) in an rak zir. Tlawng hmin khal Varnarcular School tiah an thleng. Thlanglam Chin ram ah Cho ca an neinak hi 1935 lawng in a si lai. Cunah, 1918 ahcun, cutin Kawlca zir lo ding ih thu tuahmi a um hrih lo ih, ziangbik si pei protest an rak tuah timi hi evidence ngaingai in ka hmu thei lo. Asinan, hihi cu analysis base in ka sim mi si.

Cun, Chin National Union Organiztion (CNUO) hi 1928 Februay 20 ah din a si tin mi tam pi in an sim ṭheu. Asinan, Pu Vum Thu Maung ih Memoir sungah cun 1934 kum (ni le thla ngan lo) ah kan din thei tiah a ngan.

A dang ni le thla pawl cu Mirang pawl ih rak ngan mi documents pawl ka hawl thei ih, an rak ngan mi ni le thla pawl tla cu.

1) Kanpetlet in Mirang le Chin mipi tonkhawmnak – 1940 February 20

2) Mipi ra suak zat – 1000-1500

3) U Vum Thu Maung homi pawlkom in duhlonak langtertu – 200-300

4) U Vum Tu Maung le a ho pawl kaih an tong ni le, Thuthangca (Thurihyah) in an kaih thu an suah ni 18 April 1940 (Thurihyah).

Document

Mirang pawl ih rak ngan mi records hi a hnget khoh mi records a si tiah kei cun ka pom. Curuang ah, a tlun ah ni a bang aw lo mi tete pawl hi hmailamah himi attach ka tuah mi records in a ṭhathnem pi ding tiah zumnak ka nei.

Chin National Day

Chin Ram Thuanthu Tawi

Mirang pawl in Chin ram in ra uk hlan tiang ah kan mah dan le nunphung ten, kiangkap ih cawhpawlhnak (influence) tel lo in kum rei pi kan rak ding. Tlaisun pawl cun Democracy dan vek in, misenpi ih hrilmi “Fahlam Council” in kum reipi a rak uk hai. Cucu, Kawlram ih Frontier Area Administration Director a rak ṭuan dah tu HNC Stevenson in Tashon Democratic Council tiah a rak ko. Pengdang ahcun hnam le khua kilkhawi theitu ding milai, micak le mi ralṭha pawl in miuk ah an rak hril ih, tesinfa sawng aw dan in kan rak ukawk. Miuk pawl khal cun, an mah pakhat ih thuneihnak ih uk si cuang lo in, vengsuak upa hril in, vengsuak upa pawl thawn thurawn aw hnu in thuṭhen a rak si. Vengsuak upa pawl cu Khuangcawi thei tivek, milian sung in rak hril a si. Chinram zaten political system pakhat tang ah kan rak um lo nan, hnam khat le hnam khat tonawk ih pehtlaihnak cu a rak um ring ring. Cun, sumdawnnak lam khal ah pengkhat le phengkhat ah thilri zuarnak le thlengawk khal kan rak nei. Khua le Khua, Hnam le Hnam khal cu thazang cuhawnak (power) hrang ah kan rak do aw theu.

Lenglam ihsin kan Chin ram in ra do tik khal ah hnam khat le khat karlak ih buainak tete tan in, lungrual ten kan rak do. Chinram lak ding ih Mirang pawl do ding ah, Sizang, Sukte le Kamhau pawl khal hmunkhat ah kom aw ih Mirang pawl thawn nasazet in an rak do aw. Mirang ralbawi. Gen. George White in “ka dodah mi ral pawl ah ngah harbik le neh har bik an si” ti tiang in a rak sim dah. Chinmi pawl do awknak ah, ralthat lamih sunloihnak pekmi Victoria Cross tiang Mirang ralkap pawl in an rak hmu. Tlaisun khua khal ah Tlaisun, Zahau, Hualngo, Khuangli le Falam peng pawl an rak khawm awk. Hakha peng khal ah Zokhua le Sakta khal Sakta ah an rak khawm awk. Cun Zotung le Senthang pawl khal Khawpi khua ah an rak khawm aw ih, an za ten Fahlam pi thawn pehtlaihnak nei in Mirang pawl cu an rak do.

cnd1

Kan Chinram pi miin in rak do tik ah, hnam le peng sung ih kan dang awknak tete pawl tan san in kan Chinram humhim dingah lungrual zet in kan rak do. Mirang pawl in Chin ram an uk hnu ah, an mai hrang ih uknak olsamnak ding ah, Miuk pawl hnen ah thuneihnak tum zet pek in, Miuk pawl hmang in, kan ram in rak uk. Mi uk in mipi hnen ah siah an khong, cui siah pawl cu Mirang pawl thawn a hrek veve in an rak ṭhen aw. Cui siah pek mi pawl tel in Mirang pawl in Tlawng, Sizung, Lamzin pawl in rak tuah sak.

1930 hnu lam ih sin U Vum Tu Mawng ih homi Chin National Union Organization (CNUO) khal in mipi thazang thawn lungrual zet in zalennak ngah thei ding ah cangvaihnak nasazet in an rak nei. Kawlrawn ih zalennak ngahnak ding ih cangvaitu pawlkom pawl thawn khal pehtlaih awknak an rak nei. 1940 February ni 20 niah Mirang lamih thuneitu, Magwe Commissioner, Chinram Zipeng, Miuk, Khuauk pawl le U Vum Thu Mawng teih ho mi Chin National Union Organization pawl ton khawmawknak an rak nei ih Magwe Commissioner Mr.McCraken in, an dil mi pawl pek thei a si lo thu a sim tik ah duhlonak an rak lang ter. Chin ram Zipeng bawi in politics lam cangvaihnak neilo ding in ralrinnak tu le tu an pek. Asinan, an cawl duh lo ruang ah Mirang pawl in CNUO ih hotu pawl cu thawng an thlak. Hotu pawl thawng an tlak nan, mi dang an kai ih cangvaihnak an nor sinsin. Mirang pawl cun a cangvai tu pawl thawng an tlak vivo ih, cutin Chin mi hotu le mipi 135 lenglo an rak kai ih Falam, Hakha, Tedim, Mingyan le Katha thawnginn pawl ah thawng an rak thlak. Mi hrek cu Cooly tla an ṭuan ter.

Leitlun ralpi voi 2 nak Chin ram ah a ra thelng tik ah, Mirang pawl cu India ah dung an sip ih Japan in rei lo te in rak uk. Chin ram ra kai tu Japan pawl khal Chin Hills Battalion, Chin Levies, Pu Vum Te Mawng homi ralkap pawl, Sukte/ Sizang Independence Army pawl le Mirang pawl in an rak dawi suak.

Leitlun ralpi voi 2 nak a ṭheh hnu ah cun, Kawlram pi cu Zalennak ngah din din hmun a rak si thlang. Aungsan- Atlee cachuk hnu ihsin, tlangpar mi pawl in Burma ram sungah an tel duh a si ahcun an tel thei ti a si tik ah, ဖ.ဆ.ပ.လ cun Lai tlang ah ခ်စ္ၾကည္ေရးခရီစဥ္ in U Vum Thu Mawng le palai dang pawl a rak thlah. Cutin, Kawlram zalennak a ngah a si ah cun, Chin ram teh Kawlram ah kan kom ding maw timi thurel ding ah Miuk Pu Hlur Hmung, Pu Kio Mang le Pu Pum Za Maang le ṭonglettu Pu Kawl Sum cu 1946 kum ah, Panglong khua ih tuahmi thurelnak ah an rak tel. An ra tlun hnu, 1946 October thla ah Falam ah Chin ram kulh ih Miuk pawl le thuneitu 52 pawl ton khawm aw in thurelnak an rak nei ih, resolution pa 4 an rak suah. Cu pawl tla cu: 1) Chinram cu Mirang tangah um hrih ding, 2) Tlangparmi adang pawl thawn pawlkom aw ding,3) Chin mi pawl kan ṭhangso ih, kan mah hmailam thu kan mah ten kan lai rel thei ding dinhmun kan si ah cun, Burma ram kan kom ding, Cui din hmun kan si lo ah cun, Burma ram thawn a dang ten kan um ding thu an rak suah. Himi thurel nak tho tho ah, Pu Hlur Hmung, Pu Kio Mang le Pu Pum Za Maang tla cu 1947 ih tuah ding mi Panglong ah feh ding mi an lungkim.

1947 March 3-5 tiang Gangaw peng, Htilin ih tuah mi Chin-Bama Rualremnak (ခ်စ္ၾကည္ေရးညီလာခံ) cu Chin mipi 3000 le hotu thlanglam Chin ram ih sin U Vum Tu Mawng, saklam Chin ram ihsin Zokhua ihsin Pu Za Hu le Kawl aiawh in Dedok U Ba Cho thawn zatekom mipi 10,000 lai thurelnak an rak nei ih, hmailam ah bangrepten (တန္းတူညီတူ) in kan um tlang ding tiah lungkimnak an rak nei ih, Chin-Bama duhdawtawk nak theihternak lung khal an rak phun. 1947 ih tuahmi Panglong conference thawng in Kawlram pi sungah lut in Union of Burma tiih cang suak thei ding ah, kan pu le mi pathum pawl in hmin htoot nak an rak nei.

cnd

Zalennak le Danthleng – Enquiry Commission

1948 January 4, niah Mirang hnen ihsin Zalennak kan ngah ih. 1947 Danhrampi vek in Chin Special Division hrang ah Chin Affairs Council (CAC) kan rak nei thok. CAC cun Chin ram ih ukawkdan thleng ding in hmaisabik ah an rak zuam. Mipi duhnak vek in, hlanlaisan ihsin Mirang san tiang kan rak hmang mi tesinfa sawngawk ih ukawkdan ihsin Democracy dan ih thleng ah Enquiry Commission cu Kumpi Acozah ih siannak in, 1948 kum Feb ni 6 ni ah an rak din.

Enquiry Commission ih tumtah mi cu danthlengawk dingah Miuk pawl ih ruahdan le mipi ih ruah dan thei ding, Miuk dan thleng tikah Acozah ih thuneihnak hnaihnok lo ding dan pawl hawl in Kumpi Acozah hnen ah thuthunlut ding a si. Enquiry Commission cun 1948 Feb ni 12 ihsin ni 18 tiang Tedim, Falam le Hakha peng pawl ah mipi le Miuk pawl ih ruahdan an zirzoi. Cutin, an zirzoi rero lai cu Falam ih Kawlram pi Zalennak sunloihnak puaipi an tuah lai fang thawn a rak deng aw.

Falam Khua ih Mipi 5000 tonkhawmnak

Mi tampi cun, Falam ih mipi 5000 leng lo tonkhawm nak hi Miuk dan dunlonak thurel ding ih kokhawm mi ah an ruat ṭheu. A si hrimhrim lo, Kawlram pi Zalennak kan ngah mi sunloihnak ding ah tuahmi a rak si. Cutin mipi tampi an ra suak tik ah thurelnak khal an nei cih mi a si. Zalennak cu January ni 4 niah kan ngan nan, Rampi President rori le ramuk tu bawi pawl tel ding a si ruang ah Feb ni 19-22 ah an tuah naksan a si. Hi mi puai ah Rampi president Sao Shwe Taik a mah rori Falam ah a rak ra. Himi puai tuahnak ding hrang ah Kumpi Acozah ih budget Rupees/ 21000 an rak pek.

Mi tampi cun Falam vek khua ah mipi 5000 rasuak thei cu a cang thei lo tiah an sim. Culai ih Hakha MP Pu Ro Thang in mipi 5000 kan kim a si tin a rak sim dah. Cun, culaiih Falam Zipeng Pu Tuang Hmung ih kumtin Report sung khal ah, mikhual 5000 lenglo kan nei tin a ngan mi kan hmu thei. Pu Tuang Hmung ih report sung ah Paletwa (culai in Rakhine saklam) ihsin palai pawl an ra thu, thupi zet in a ngan.

Chin thuanthu ah hmaisabik thurelkhawm ih an ra telnak a si. Mi pakhat cu Paletwa ihsin Falam ah ke thawn rori a ra pok. Cuvek tho tho ih, himi puai le thurelnak ding hrang ah Kanpetlet, Matupi, Hakha le Tedim ihsin mikhual an ra suak cio. Falam peng sung ih Miuk pawl khal in, Falam ah pok cio ding in thu an rak suah. Mi hrekkhat cu, politics rel ding ah si lo in, Rampi President Sao Shwe Taik le Chin Affairs Minister U Vum Thu Mawng hmu duh ah an ra suak.

Cui san ih a ra tel tu pawl ih simmi: Cozah hnatuan tu Pu Tuang Hmung ih Report hi kan hrang ah Evidence thabik a si. Kumpi Acozah ih budget Rupees 21000 a suah sak hi a rap thlak nasa. Culaisan ah siapi pakhat hi Repee 20 a rak si. Ralkap pakhat ih thlahlawh hi Rupees 15 a rak si. Budget le um, cuhleiah Chin thuanthu ah Chinmi pawl zalenzet ih thu an rel thei hmasabik can khal a si, cun Rampi President Sao Shwe Taike amah rori hmu ding thawn, mipi 5000 lenglo an ra suak cu mangbang a um lo nasa.

Falam khua ih mipi 5000 Thurel khawmnak

Thurel nak an thok pekte ah cun, Cozah lam ih palai, mipi lam ih palai tin palai teten thu an rel nan mipi pawl an tel vivo. Feb ni 20 niah Fimthiamnak lam, Harhdamnak lam le Transport lam thu pawl an rel. Cun, Enquiry Commission ih zingzoi rero lai mi ukawkdan thleng awk ding thu khal rel a si. Ukawkdan thleng aw ding ah Pu Thawng Za Khai in thu a thun lut ih Pu Sum Mang le Pu Thang Mawng in an lung kim pi. Hi thu hi can pek in an rel ih, a duh lo tu an um. Cuhrangah, meeting Chairman in Vote lak ding ih thu a rel cat. Vote an lak tikah ukawkdang thleng duh tu mipi 5000 an um ih, a duh lo tu 17 an rak um. Cutin, meeting Chairman in ukawkdan thleng ding in thu a rel cat.

Pu Con Bik & Chin Chiefs

Pu Con Bik & Chin Chiefs

Enquiry Commission ih Kumpi Acozah hnen ih pekmi Report

Enquiry Commission cun, danthlengawk ding thu cu Feb 22-26 tiang zingzoinak an nei peh vivo. Feb ni 26 niah Cozah hnaṭuan Wanthock pawl thawn tonkhawm awknak an rak nei ih hmailam in an feh thei dan ding thu pawl an rak rel. Mipi in dan thleng ding an duh thu an hmu fiang nan, a san san ih kan rak hman mi dan hmakhatte ih thleng ding hi thil ol a rak si lo. Cutin, Enquiry Commission in an zingzoinak report cu Kumpi Acozah hnenah 1948 September ni 30 niah an rak pek. Report sung ih an dil mi cu, Miuk dan aiah Democracy dan hamng ding, cule Miuk pawl an sung lo nak ding in bawmnak pek ding pawl a si. Kumpi Acozah khal in lungkimnak a rak nei. Cutin, Chin Affairs Council in 1948 kum October ni 12 ih tuahmi Consstituent Assemby Parliament (တုိင္းျပဳျပည္ျပဳ လႊတ္ေတာ္ ညီလာခံ) ah danthleng ding cu Kumpi Acozah ih nemhnget nak a nei. Cun, Chin Affairs Council ih ngan mi “Chin Special Division Act 1948” khal cu nem hnget a si. Cui ni ihsin thok, Mirang pawl ih an rak tuah mi Chin Hills Regulation Acts 1896 cu a rak thi ih kan mah Chin mi pawl ih nganmi Chin Special Divison Acts 1948 rak hman a si.

Chin National Day hrang ah “Ni” an hril

1948 ihsin 49 tiang, CAC cu danthleng aw ding, dan hmang ding mi pawl tuah, ṭhansonak lam le mipi hnen ih Democracy thu pawl zirhnak ah an can a cem ih Chin National Day hrang ziang khal an rak ruat man lo. 1950 kum ih sin Chin Affaris Council cun National Day nei ding thu an rel thok. Chin mi pawl hi Union of Burma sungah hmun dang dangah um hman seh la, unau suak khat, miphun pakhat kan si ruangah lungrualnak leh ṭuantlangnak a thupi tuk ti mi hi an rak thei. Curuangah Chin Affairs Council cun hmun kip ih um kan Chin miphun cu hmun khat ih kan hlawmkhawm thei nak ding le Politics lamah kan cak vivo theinak dingah “Chin National Day” kan neih a thupi ti an hmu fiang a si.

Curuang ah 1950 October ni 9 ih tuah mi Chin Affaris Council Meeting ah U Vum Thu Mawng in National Day kan nei a ṭul, Cun National day hrang ah ni kan hril ding ih cucu tu niah kan nemhnget ding tiah thu a thun lut. U Vum Thu Mawng cun, ka thu thun lut nak san cu ram tin kim ah National Day an nei cio vekin kan nih Chin mi pawl khal National Day kan nei a ṭul ruang ah a si tiah a sim. Cui thu thun lut mi cu Matupi MP Pu Sang Nim ih a lungkim. U Vum Thu Mawng cun, hi thu hi, Chin Special Division Commissioner thawn nithum sung kan rel zo nan, kan ruah mi ni thum sung in, ziangmi ni bik hi National day ni ah kan nemhnget ding timi cu kan rel cat hrih lo. Kan ruah mi ni pawl tla cu

  • Chin palai pawl Maymyo ih um Enquiry Commission ih feh ni,
  • February ni 20 ih Falam mipi tonkhawm aw in danthlengding thu rel ni,
  • Chin Special Division Acts dan kan hmang thok ni pawl an si.

Capt. Mang Tung Nung cun 1948 Feb ni 20 ni, nazi 11 hi National Day ih tuah ding ah thu a thun lut. Pu Sang Ning in a lungkim pi. Meeting Chairman, U Lian Thum in cui thucu nan lungkim maw tin a sut tik ah, meeting kai cu U Vum Thu Maung, U Lian Thum, U Sang Ning, Capt. Mang Tung Nung le U Tuang Hmung pawl in lungkimnak an nei.

Cuhnuah, U Sang Ning in a rel bet ih, February thla cu thlanglam Chin ram ah Lorawl lakcan a si ruang ah mipi an man lo ding, ni dang ah tuah sehla a ṭha sawn ding tiah a sim. December thla lo le January thla ah tuah sehla a rem cang sawn ding tiah a sim bet. Capt. Mang Tung Nung in mipi tonkhawm aw ding si lo ding National Day (အထိမ္းအမွတ္) hrangah kan hril tum mi a si tin a let. U Sang Ning khal in, thuthunlut ni ka elnak si lo tin a let sal. Cutin, meeting chairman U Lian Thum in Chin miphun hrang ah 1948 February ni 20 ni, zianglam nazi 11 hi National Day hrang ah siseh tiah nem hngetnak an rak nei ih, Cutin Chin National Day timi kan neih theinak a si. Thu an ṭhen hnu, 1951 kum ah a voi 1 nak Chin National Day cu sunglawi zet in Mindat khua ah an tuah. Himi thuan thu in kan hmu fiang mi cu National Day neih a thu pi dan an thei in, cumi hrang ah ni “nikhat” an rak hril suak mi a si.

Chin National Day Ni Thleng

1956 ah Pu Za Hre Lian cu Chin Affairs Minister a rak cang tikah, hlanlaisan kan pi le pu pawl a sansan ih rak hman mi dan, kan hlon ni hi National Day in ret a tlak lo tin, National Day cu February ni 20 ihsin ni dang ah thleng ding in a rak zuam. Cui thu cu Parliament dan vek in thurelnak an rak nei ih MP 12 ih an lung kim ih MP pa 2 in an el. MP 2 a el tutla cu Pu Ro Thang le Pu Hrang Nawl an si. Parliament dan vek in, MP tamsawn ih lungkim a si ruang ah Chin National Day cu February ni 20 ihsin thawn a rak si. 1958 ah Pu Thang Lian cu Chin Affairs Minister a rak cang tikah, Minister a cang ding ih a tiam kam cia vek in, Chin National Day cu Feb ni 20 ah a thawn sal. Cu hnu ah Revolution Council le State Peace and Development Council pawl in Chin National Day ihsin Chin State Day ih thleng ding in an rak zuam nan tuni tiang ah hlawh tling nak an hmu lo ih Chin National Day tiah sunglawi zet in hmang ring ring a si.

Thunetnak

Ramtin kim ah National Day an nei cio. Cui National Day cu ziangruangah National Day an ti nak a sullam khal an bang aw cio. E.g. Norway, Denmark, India, Malta, Poland le Slovakia ram pawl ah si le Danhrampi an nei ni kha National day tiah an hmang. Aurstralia sile Europe ihsin an ram ih hmaisabik lawng a rak thleng ni kha National day tiah sunglawi zet in an hmang. Ram tampi cu United Kingdom, France tivek Colony kutang ihsin Zalennak an ngah ni kha National day tin an hmang. Ireland tivek si le biaknak lamthawn pehpar in St.Patrick Patron Saint day hi National day tin an hmang. Luxemburg tivek ram si le an Siangpahrang ih suahni kha National day tin an hmang. Ramtin kim ah National Day timi an nei thluh ih, ram khat le khat an nei dan le an hmang dan khal a bang aw lo. Leitlun ram tampi cun National day an nei cio vek in Kan nih Chinmi pawl khal, miphun pakhat kan si nak kumkhua a hmun thei nak ding ah, Miphun Ni (National Day) timi neih a tul tiah U Vum Thu Maung ih homi Chin Affairs Council cun thu an rak rel cet. Cui ni hrang ah, kan chin thuanthu ih ni thupi ni thum sung ah, Falam ih mipi 5000 lenglo tonkhawm in, ukawkdan  thelng ding ih an rak lungkim ni, Feb ni 20 cu Chin National Day siseh tiah an rak hril a si.

Chin National Day thuanthu kan zoh tik ah, Chin National Day nei ding ih kan pu le pawl in an rak relcat nak hi hlanlaisan ih kan pi le pu pawl dan an hua ruang ah a si lo. Kan Chinram cu, Miuk dan tang ah kan mah le nunphung ten, zalen zet in kum rei pi kan rak ding thei. Miuk pawl in khua le ram hrang ah a ṭha bik in khua an rak khang. Loram zem awk dan ah si seh, siah khawn dan khal ah si seh, nunphung lam ah si seh, an fimnak ih a daih sun, an ti thei tawk in, a ṭha bik in an rak uk. Leitlun ralpi voi 2 nak hnu, Chinram ih hmailam hrang khal ah Mirang, Kawl le Tlangparmi unau ding pawl thawn nasazet in thu an rak rel. Chinram hrang ah a tha bik in lai in rak rel sak. An mah ih zuamnak um lo seh la, kan hmailam thu cu rel theih a si lo. An mah in zuam nak ruang ah Zalennak khal kan ngah ih, tuni vek Chin National Day khal a cang suak thei nak a si.

Chin National Day cu Miuk dan ih sin Democracy dan ih kan thleng ni tin Democracy dan sunloih ni khal a si lo. Democracy daan hi khuahlan ah Tlaisun pawl ih rak hman rero zo mi a si ih Chin ram hrang ah a thar a si lo. Democracy dan hi kan ram kiangkap ah a rak hmang hmaisabik tu lam kan si.

Chin National Day cu, kan Chin thuanthu ah, Feb ni 20 hi ni thupi zet pakhat a si ruang ah khal a si lo. Ziangruangah Chin National Day um ding in, kan pu le pawl in an rak relcat timi hi thuanthu sung ah kan zohtikah, leitlun miphun tampi cun in National day an nei cio, kan nih Chinmi pawl khal in miphun pakhat kan si nak kumkhua a hmun thei nak ding ah, National Day kan nei a tul. Ziangruangah kan neih a tul tile Chin mi pawl hi unau suak khat, miphun pakhat kan si ih lungrualten kan ttuantlang thei nak ding ah le Politics lamah kan cak vivo thei nak ding hrang ah a si.

Nan zate Happy Chin National Day……

by Van Cung Lian (UK)

References:

  • The Chin Hills by Carey and Tuck
  • Economic of Central Chin Tribes by HNC Stevenson
  • Documents attached mi pawl cu Yangon National Archive Department ih lakmi pawl an si.
  • Chin National Day by Hrangtar Nawnkhar. Hrangtar Nawnkhar hi Yangon, National Archive Department, Chin Files at Historical Research Centre, Yangon le Universitied Historical Research Center, Yangon ih ca pawl reference a lak mi Cabu tha tuk pakhat a si.
  • 1951 Mindat Khua ih tuah mi Chin National Day ih U Vum Tu Maung sim mi Speech from Falam Centenary Megazine.
  • U Vum Thu Mawng a mah rori ih ngan mi Memoir. 1964 kum ah a ngan.
  • U Sein Yaw Aung, Vum Thu Maung thawn hna rak tuan tlang dah tu ih U Vum Thu Mawng thu a ngan mi.
  • Private Archive. British Library ih ka lak mi Panglong Conference thawn pehpar mi paper pawl le tuhlan ih Chin thuanthu hrang ih ka rak khawl khawm mi pawl.
Na ruahnak