Chin Pawlpi Cup ah Kum 3 sung Sekan sawm an si nawn lo ding

Home » Lehpannak » Chin Pawlpi Cup ah Kum 3 sung Sekan sawm an si nawn lo ding

By vcth on November 3, 2017.

Chin Pawlpi Cup a vei 7 nak quarter final ih Sekan mipi pawl Bualrawn sung lut tahrat ih buainak an tuah ruangah Chin Pawlpi Cup thuneitu pawl cun Cup an suah thei leh ding asile kum 3 sung cu Sekan sawm nawn lo dingin thurelcatnak an nei.

Himi hi kum 3 sung Bawhlung sit thei lo dingih Myone hremnak a si lo ih, Chin Pawlpi Cup vialah kum 3 sung sawm nawn lo dingih thu an suahmi a si . Myone lam in Sekan hi an hrem pei maw, hrem lo ding timi thu felfai a um hrih lo. Myone in Sekan an hrem lo a si ahcun Cup dang hmuahhmuah ahcun Sekan an tel thei ding nan, Chin Pawlpi Cup vialah kum 3 sung cu an telthei lo ding tinak a si.

Chin Pawlpi Cup thuneitu pakhat cun, ‘Cup pi hi kan suah dah lo rengreng ih tui’ kum hman hi GCO bomnak ruangih suah thei fang kan si , kum dang ahcun kanmah Branch vial lawng kan lek țheu,’ a ti. Chin Pawlpi Branch timi cu Kalaymyo le Tahan sungih um laimi finkhawmnak a si.

Buainak – Tui’kum Chin Pawlpi Cup quarter final ah Sekan le CP Branch III an tong aw . Referee in Branch III no 14 fawl a la ih, Sekan lam in free kick an ngah . Referee ih fawl lakmi cu Branch III no 14 pa cun lungawi loin Referee a hro ciamco hnu ah, Sekan lam in free kick sit dingih Bawhlung an sawn liarli zo tak cu hmundang ah a va sit țhawn sak . Sekan pa lungawi lo cun Branch pa cu a tulih, țongkam mallai a barh-ta . Branch pa a lungawi ve lo ih, amah tultu cu a hngawng in a tultluk ih, a tluk hnu ah veihnih a sit bet. Cutin Sekan le Branch III Player pawl cu an buai luihlo . Player pawl buai rero cu Sekan mipi pawl in an hmu thei lo ih, Bualrawn sungah lut tahrat in branch III player pawl an va vel ciamco . Ziangtin si maw ,buainak cu an tireh thei, asinan Referee in sit sal dingih kaihruai a ngam nawn lo ruangah lek nawn lo in an cawl.

Upa tamzet sawmkhawm aw in thurel tlangnak an nei ih , Sekan le Branch III cu Chin Pawlpi Cup avei 7 nak ihsin cawlhter an si . Cui hnu ah Sekan khua cu Mipi bualrawn sungih lut tahrat in buainak an tuah ruangah Chin Pawlpi Cup thuneitu pawl cun Cup an suah thei leh asile kum 3 sung sawm nawn lo dingin thurelcatnak an nei a si.

Sekan khua pa pakhat cun “kannih cu kum 3 sung Chin Pawlpi Cup lek nawn lo dingih ti kan si nan, Branch III cu hremnak an pe ve lo,” ti in a lungawi lozia a rel ih, “Chin ihsin cu kan suak thei lo nan , Chin Pawlpi sung ihsin kan suak verver a si,” a ti.

Chin Pawlpi Cup thuneitu pakhat cun “Sekan kan hremnaksan cu Mipi bualrawn sungah lut tahrat ih buainak an tuah ruangah a si . Player pawl buainak cu Referee in a hrem ding ih, a țul dan vekin thil a tithei . Asinan mipi pawl Bualrawn sungih an luh hnu cun Referee in thil a tithei nawn lo ih, buainak a sosang deuhdeuh a si,” a ti.

Source: Sport Run Innpi (SRI)

Na ruahnak