Chin ramkulh ah Airport pathum a um ding?

Home » Thlirnak » Chin ramkulh ah Airport pathum a um ding?

By vcth on October 20, 2016.

surbung

October 16, KLL Amazing Company le Zakada Company in Surbung an hal lai Zuk @ Lungpi Memu

Kawlram ramkulh 7 le ramthen 7 lakih vanzam tual a umlonak hmun cu Chin ramkulh lawng a si. Chin ramkulh ah Vanzam tual pakhat tal um dingin tiah President U Thein Sein cozah san ah Chin MP pawl le tuanvo neitu dangdang in nasa zetin an nor. Cutiih an nornak ruangah 2013 in Kawlram Vanzam lam tuanvo neitu pawl cu Chin ramkulh ah ra in a rembiknak ding hmun an hal. A hleice in Hakha, Falam le Tedim tiin hmun 3 an hal.

Voi 3 lai an hal hnu ah 2014 ah Chin ramkulh ih vanzam tual hrangah hmun a rembiknak cu Falam peng Surbung a si tiah an nem hnget. 2015 ihsin Cozah budget in a hmun cek thok a si. Cozah thar kai hnu 2016-2017 budget kum ah Surbung vanzam tual hrangah Kyat ting 6,000 a tlak tiah theih a si. October 16 ah Japan company 2 a simi KLL Amazing Company le Zakada Company in Falam khawnu/pa thawn Surbung vanzam tual halnak an nei ih Japan Company pawl cun “cozah in kanmah in t’uanter le kum 2 sungah kan t’heh ding” tiah an ti thu tla theih a si.

hakha-airport

Hakha khua view, Vanzam tual tuah tumnak cu Thantlang zin, Ritkuangtlang ah a si

A pahnihnak cu mizan tihni ih thu a si. The Chinland Post in “Japan Company in Hakha ah Vanzam tual an tuah ding ih November thla in an tuan thok ding,” tiah an ti. Thantlang lam, Ritkuangtlang ah tuah ding a siih pi 8,000 sau in an cek ding ti a si.  Hi thu hi ziang tluk in rin a tlak ti cu theih fiang a si lo. Japan Company in October 16 ah rak zoh a siih November thla ah tuan thok ding ti cu ruah ding a um deuh in ka ruat (An tuan ngaingai pei maw ti thu ah).

Lailenpi ih Vanzam fate tumnak ding hmun

Lailenpi ih Vanzam fate tumnak ding hmun

A pathumnak cu Dr. Sasa ho in Matupi peng Lailenpi khua ah Vanzam fate tumnak cu Mission Aviation Fellowship (MAF) bomnak thawn tawlrel a si. Hi vanzam tual cu pi 500 kau, pi 2,000 sau in tuah tum a siih MAF vanzam fate pawl t’umnak ding a si. MAF in 2015 ah Kawlram cozah hnen ah Register tla thaten an rak tuah zo ih hmailam hnatuan peh vivo an tum thu MAF website ah an than.

Hi vanzam tual pawl hi a takin an cangsuak ding maw/suak lo ding ti cu theih lo a si. An pathum in a cangsuak ngaingai a sile lungawi a um zet.

Kei mah ih duh thu sam in cu Chin ramkulh saklam ah vanzam tual pakhat, thlanglam Chin ramkulh ah pakhat um sehla duh a um.

Falam Surbung vanzam tual timtuah rero lai ah Surbung in peng 30 tluk a hlatlonak hmun Hakha khua lutnak lam ih Vanzam tual tuah ding cu a t’ul tukmi cu a siloin ka hmu. Vanzam tual an duh tuk fahran ih an tlin ahcun tuah ding a si ko, asinan a t’ul maw ti lam zawngin ruat ahcun a t’ul tuk lem lo.

Cozah ih lungkim pi mi Surbung vanzam tual hi nasa zetin Chin ramkulh cozah le rampi cozah in hmainor pi vivo ding a si ko. Pakhat theh hlan ah pakhat tiin kan kat vivo le a netabik ah zianghman ngahlo in a ral ding phan a um.

Na ruahnak