Chin thantar (flag) thu

Home » Cahram » Chin thantar (flag) thu

By vcth on November 29, 2016.

Chin Flag 4nak

By Henry Mang

Chin National Day hi ramsung ah zalenzetin tuah thei lo caan tawkfang a rak um ih cumi laiah Phunsang tlawngta pawl cun hlunghlaizetin an rak tuah theu. Atu cun zalenzetin tuah thei dingah acozah in a siang thlang ih kan dung kum ah Chin State huapin Mindat ah, cun Nay Pay Taw, Yangon le Kalaymyo pawl ah khal hlunghlaizetin tuah a si ih Chin thantar cu tar a si thluh.

Ramleng ah khal ram tampi ah tuah a si ih kan dung kum dinhmun ah Malaysia, India le Norway ahcun CNF (CNA) flag tar a rak si ih hmun dang tamsawn ah cun Chin flag tar a rak si. Chinmi pawl in independence kan ngah lo ruangah Chin Flag thu ah cuhawknak le elawknak, buainak tete a um. Curuangah Chin Flag thuhla maltein ka run ngan duh.

Chin Flag 1nak: Chin flag pakhatnak cu background ah tlunlam ah apawl (blue) alai ah asen (red) le tanglam ah ahring (green) a si. Alai-mucer (center) ah ahlum lole abial (circle) cu arang (white) in a um ih cumi sungah vapual (hornbill) zuk a um. Hrekkhat in vapual pakhat lawng, hrekkhat in vapual pahnih, hrekkhat in vapual-lu zuk lawng,,, tiin a phunphun in a um. Cun ahlum lenglam ah arsi (star) in an kulhter ih arsi 7 a um. Himi hi Phunsang tlawngta pawl ih hman theumi a si ih Chin Literature and Culture Committee (CLCC) ih thantar a si. Chin miphun-then ah acozah pompimi in miphun-then (lu-myo-nuai-suh) 7 ah an then ruangah arsi 7 an tuahnak san a si.

Chin Flag 2nak: Chin flag pahnihnak cu pakhatnak thawn an bangrep nain, arsi 7 siloin 9 a um. Himi hi Chin State ah peng (township) 9 pawl ai ah arsi 9 an hmannak a si ih Chin State thantar a si. Background le adang umdan pawl cu CLCC thantar thawn an bangaw thluh.

Chin Flag 3nak: Chin flag pathumnak cu CNF ih tuahmi a si ih background pawl an bangaw nawn lo. Background ah tlunlam ah asen (red), alai ah arang (white) le tanglam ah apawl (blue) a si. Alai-mucer (center) ah arang (white) thotho in ahlum lole abial (circle) a um ih cumi sungah vapual pahnih cu dunglam hoihaw veve in a um. Hihi CNF (CNA) flag a si.

Cangantu ih hmuhdan: Hitiin bangawlo celcel kan hman ruangah Chin National Day (CND) tuah a si tikah thantar thuhla ah lungruallonak a suak. Kan hman duhmi a bangawklo ruangah lungrual ih kan hman theimi thantar pakhat neih a tul. Chin thantar hminpu pawl ka zohkhawm tikah hitiin thantar pakhat lungrualtein hmang thei sehla, tiih ka ruahmi a um. Cumi cu thantar 4nak tiah kann run ti phot pei.

Chin Flag 4nak: Chin flag palinak cu background hrang tlunlam ah apawl (blue), alai ah asen (red) le tanglam ah ahring (green) a si ding ih alai (center) ah ahlum (circle) cu arang (white) a si ding. Cumi sungah vapual nupa cu hmailam hoihaw in sokhleipar ah an fu ding. Himi kan hmantlang thei ahcun Chinmi hrangah lungrualnak pakhat a si ding.

Simfiangnak: Chin flag ih color pawl le a telmi thil pawl cu a tanglam bangin a si.

Apawl (blue): Apawl cu ‘Christian ram’ tinak a si. Chinmi cu 100% zikte Christian kan si ruangah khal a si ih, ‘Pathian ih lamhruainak kan ring’ tican khal a si.
Asen (red): Asen cu “Raltha phun kan si’ tinak a si. Chinmi kan thuanthu kan zoh tikah miraltha phun rengreng kan si.

Ahring (green): Ahring cu “Remdaimi ram” tinak a si. Chinmi in atu tiang ral (enemy) kan nei lo. Chinram ah ral do ding a um lo.

Arang (white): Alai ih ahlum ah arang (white) ih ummi in “Thinlung thianghlim kan si” tinak a si. Chinmi cu kan thinlung a thianhlim, kan dingfel.

Vapual (hornbill): Vapual cu hlanlai ihsin Chinmi hminsinnak a rak si ringring ih hitawk zawn ah vapual nupa an si tengteng ding ih duhdaw aw zetin hmailam an hoih aw ding. “Rinumnak” hminsinnak a si.
Sokhleipar: Sokhleipar (Chokhleipar) cu tlangsang parih ummi a si ruangah “Chinram cu tlangsang parih ummi a si’ tinak a si. Chinram ih pangpar hminsinnak ah kan hmanmi a si ko.

Chin Flag umcia pawl parah simrelnak:

Chin flag 1nak ah arsi 7 ummi hi kan hnaihnok zet. Hmuhdan bangawklonak a um tikah buainak a suak. Adang cu pomcih an si ko.

Chin flag 2nak ah aisi 9 ummi hi kan hnaihnok zet. Peng dang teh karh vivo sehla, arsi kan thanter vivo ding maw? timi thusuhnak a suakter. Adang cu pomcih a si ko.

Chin flag 3nak ah background ih arang (white) ummi le alai ih arang ummi hin, a mawiter lo. Cun, vapual dunglam hoihaw hi an simdan ka theihdan ah cun “Ral kan kilsak aw ding” tiin an rel. Cuti a si ahcun “ralkap thantar” a si ih CNF thantar ti ding hnakin ‘CNA thantar’ ti ding tluk ah ka ruat. Mah-le-mah duhdawtawk ding hnakin ral kiksakawk ding thupitter cu a cang theimi a si lo. Revolution flag ah hman ding a tawk ciah nain, Chinmi zateih kan tulmi thantar a si lo in ka ruat. Vapual cu hmailam hoihaw ding, lole futlang ding an si. Dunglam hoihawk hi kan Chinmi dunhmun ah a thabik in ka ruat lo.

Curuangah Chinmi kan zatein hih Chin thantar 4nak hi CND kan tuahnak cio ah lungrualtein hmang cio dingin ka lo sawm hai.

Na ruahnak