Chinmi lakih Music Zirsangbik, Salai Tawna Ka Tlawn Nak (Part 1)

Home » Hmun Le Hma » Khual Tlawnnak » Chinmi lakih Music Zirsangbik, Salai Tawna Ka Tlawn Nak (Part 1)

By vcth on December 16, 2013.

Salai Van Cung Lian (UK)

Salai Tawna le Salai Van Cung Lain

Salai Tawna cu a thei lo tu kan um lem ding ka zum lo. Music lam ah Chinmi ah zirsangbik lam pakhat a si. Chin National Day tinten kuat kai awk phah in kan lam phah in, kan ong ringring mi “Yakhine yoma taung dan neh set ne deh Chin taung dan” timi hla phuahtu le laihla, kawl hla in awmmawi (hits) tampi a suahtu, Mizo legendary band Vulmawi in band sung ih a tel vetu, hlanlai kawlram hminthang Chin music band ABC (A mawi Bik Chinram) founder, kawlram hlasak le zuknung cang thiam Tint Tint Htun ih let oo saya, kawlram hlasak hminthang bik Lay Phyu phunsang tlawng a kai lai ih cat lo bang lo in rak ngai ringring mi “a hla ka bar” timi hla rak phuahtu, tlang a kai tin ten laitlang a ngai tu, Chinmi/ ram hrang ah tiah a thiam mi music lam in tu ni tiang nasazet in zuam rero tu a si.

Salai Tawna hi kan ram Rangoon University in 1985 tlawng a ṭheh hnu 1991 ah US, Oregon State ihsin BA (Music) degree, Colchester Institute (UK) ihsin MA (music) degree le Zurich University ah Ph.D tiang a lak theitu a si hlei ah leitlun phungsang tlawng hmin thang Arizona state, Limerick le Zurich universities pawl ah khal lecture rak pek dahtu a si.

Salai Tawna hi London ah 2008 le 2009 kum pawl ah ka rak tong ngah ih capo paih zet, laimi thawn um nuam ti zettu le music ah passion nei tak mi pakhat a si ti cu ka rak thei ngah. 2010 Chritmas hlan te ah, Switzerland ram ka va tlawng ih, Salai Tawna cun ka inn na rak tlawng tengteng ding, lairawl ka lo suang sak ding tiah I rak sawm ih Chinworld chief editor- “mi hmuahhmuah ih BA” an timi Thangpi thawn ni khat cu kan va tlawng.

Kan tlawng hlan zan kha Thangpi inn (Zurich) ah ka riak. Salai Tawna cu Switzerland myodaw Bern timi khua kiang ah a um. Bern train station ah tong aw, cun Bern khaw sung mal lai vak cule an inn lam ah lairawl va ei ding cu a si. Cule Xmas kan tuahnak ding Lucern khua ah pan sal ding kan si. Thangpi thawn Zurich in zing ten kan suak ih, Bern train station ah zing lam 9:30am hrawng ah Salai Tawna thawn kan rak tong aw. Salai Tawna thawn hi tlangkai lam ah passionate nei zet mi kan si ih kan hmin tla tlang hmin in kan ko aw. 2008 London a ra lai ah a nih hi “Ai Kawn tlawng” tin ka rak ko ih, kei hi dum nawn, niam nawn ticu “Surbung tlang” tiah i rak ko. Kan vun tong aw cu, ka ṭhang deuh, ka ngo deuh, ka pa deuh maw thei hlah “ee hee .. tu cu Van Kau Tlang na si thlang ual” i rak ti. Tu cu na ngo deuh, na vang deuh, na sang deuh ih vanram na nai thlang “Van kau tlang” bak na si ko i rak ti ih tuni tiang “Van Kau tlang” tin i ko tata.

Cutin Bern khua ih tourist attractions hmun House of Parliament, Sui an ret nak Central Bank, Clock Tower, City of Fountain (Salai Tawna ih kyauk khin lan), Helveticus zuktuh, Einstein a rak um dahnak inn, The Granary, Bear park, Cathedral of Bern, French Church le Townhall timi hmun pawl kan va leng. Lam tluan in capo in sim ih Thagnpi thawn pum dom phah in thi zik in kan hni. A tlun ih hmun pawl cu an mak tuk nan Salai Tawna nih lamzin ah in rak simmi thu pawl a mak sawn ih himi thu malte ka rak share sawn ding.

Salai Tawna hi kan ram Rangoon University in 1985 tlawng a ṭheh hnu 1991 ah US, Oregon State ah music zir ding ah a rak feh. Bangkok in a vanzam to mi ah Kawlram mi mal lai an tel ve. Cu mi lak ah a hmin “Maung Ko Ko” timi pa khal a tel ve. US Immigration passport control section ah an thleng thlang. Kawlram passport sen hlianghli te kai pawl cu an passport hmunkhat ah an up ter ih khan khat ah an to ter hai. An hmin ko in pakhat hnu pakhat khan sungah an ko lut. Maung Ko Ko can a vun kim thlang ih Immigration officer pa midum tak, sangtak, luvam hiohio, tum liai liai tak officer pa nih cun “Maung—Ko Ko” (aw kam nem ten, aw thluai phah in, Yangon lam a chauk pawl ko awk dan phun in) tin a rak ko. Mg Ko Ko in le hipa rori nih “Maung Ko Ko” in tinak, ziang si, a tlangval le ka si fawn lo, duh kawh ten thlum zetin “Maung” in ti a ti ih a rak awih duh lo. Officer pa nih cu “Maung Ko Ko” tin thin heng nawn in ko la la. A nih le awih duh cuang lo. Cutin midum officer pa cu a ko peih nawn lo ih a zung khan sung ah a lut sal. Malte rei lo ah midum officer pa cu a ra suak ih thin tawi tak aw, aw hrang tak in “Who is Mg Ko Ko” a ti ih Mg Ko Ko cun lung awi tak le kut zung tung phah ten “I is, I is, I is Mg Ko Ko” a rak ti. Midum officer pa nih le thin heng nawn in“Oh! Are you Mg Ko Ko” tin a sut ih, Mg Ko Ko cun ṭihzah, upat tak ten “Yes, I are, I are, I are Mg Ko Ko” a rak ti sal. Cutin Immigration in a luat thei ih leng ah a rak suak thei ve  tiah a ti.

In simmi a tam tuk ih lamzin tluan in thi zik te rorin ka hni thei. Cun, lamzin ah laimi hrang ih music lam in rosung lawi a tan duhmi thu pawl, a rak hmuh ton mi music thu, ABC an rak din dan le an hla phuah mi pawl, ram dang ih music a zir dan, ramdang ih lecture a pek lai ah “Michael Jackson break dance hi kan Chinmi pawl ih lam dan” a rak si timi lecture a pek thu pawl tampi in ruah, kan sut ih kan rel tlang. Himi thu pawl le a inn kan thleng tik ih, lairawl in suang sak dan thu pawl Part 2 ah ka rak ngan leh ding.

[nggallery id=9]

Na ruahnak