Chinram Ticket Na Lei Zo Maw?

Home » Cahram » Chinram Ticket Na Lei Zo Maw?

By vcth on September 5, 2013.

“Tuiṭum cu Falam ah zanhnih, Hakha ah zankhat cuisin thlanglam Chinram tiang tlawn vivo a si ding an ti vek maw?”

“Ai, nang cu na vanṭha tuk aw! kan pa cu a thlun in tum lo lawlaw…nan Chinram ah ziang ka tuah ding in ti san men”

“Kannih cu kan sungkim ten tlawn thei kan tum”

“Hello, Norway lam pawl teh tlawn thei nan tum maw?”

“Kei cu Falam ih rak suak ka sinan, Rihli ka hmu dah lo ruangah male!”

“Kan dung kum ai-in a man a khung tuk ee”

“Ka fa le pawlin nan suahnak Chinram hmuh kan duh tuk in ti rero ih cunah, kan man lo nasa nan male”

“The Lailun Khawtin Tour” US, khualtlawn kampani zungpi hmaiah Nimkut (December) thla a thlen le-veten, Chinram tlawng dingih timtuah rero tu le sungkhat unau hrangah ti’n ticket lei dingih rak bawhtu an tam celcel nasa. Hi “The Lailun Khawtin Tour” timi kampani pi hi 2025 kum ah khan Salai Barack Khaw Tin Luai in a rak din thok mi asiih tui kum, 2039 a thlen tiang a hlawhtling in a ti fuh zet tiih mi zozo khalih an zohso zetmi kampani pi pakhat cu asi ve. Hi kampani cu leitlun ramkipih um Chinmi hrangah tin a hleicein tawlrel mi asiih ramsung luhtheinak lawng siloin a fehlam siseh tlunlan siseh visa le khualtawnnak ih a ṭulmi ziangkim, kampani in tawlrel le ṭuanvo laksak thluh a si. Khawvel hmuntin ih um Chinmipawl lawng siloin hmuntin ramtin ihsin naturalist, ecologist le environmentalist pawl khalin an sunsakin an rinsan zetmi kampani pi pakhat rori a si ve mai.

Kampani rak dinthoktu Salai Barack Khaw Tin Luai hrimhrim hi ram le miphun a duhdawt tuk ruangah a neihsun thazang thawn taimak suahih hna a rak ṭuan ringring tu Chin pacang ṭha, patling pakhat rori a si ve, BBC le CNN tivek leitlun thuthang kampani tum pipi pawl khalin hmaitawnthusuhnak a phunphunin an rak nei rero. Hi kampani pi rak dinsuah thei dingin a rualpi Salai Osma Cung Nung le Salai Mandela Biak Uk tepawl thawn an pumpe in an rak zuam tlang lai pawl a vun simsal rero ṭheu. Kum 2007, Malaysia ih an rak umkhawm laiah, kala fala pawlin an rak thihhnawh rero nan, kanmai mi le sa lo cu nupi ah kan nei lo lawlaw ding tiin ti ṭengṭengih,val-u simai khal poi ti loin an hmuitin tumtah an kaih hngetzia tla a relkir uar thei nasa. Leitlun val-u lakah mi neinung bik si ka zuam ding ti tiangin tumtah hngetkhoh neitu Chin pacang ṭha tiin an thehlar thei nasa fawn.

A rualpi Salai Osma Cung Nung le Salai Mandela Biak Uk te pawl le ramthuhla lamin an rak buaipi ve ruangah tu-ah cun thawnginnpi sungah kharhkhum an si zo. Hite pahnihih rak zuamnak ruangah hitivekin hmun dang ram dangih um Chinmi pawl hin zalen zetih ramsung an luhsal rero theinak asiih a rualpi pawl thu a ruahsal le a relsal can le a thin a nuam lo thei zet ṭheu. A cang thei tawkte cun a rualpi te pahnih an luatsal theinak dingin a zuampi ve rero. Khawvel thuthang latu pawl hnen khalah a tithei tawkin hite pahnih hrangah a phunphunin a aupi ve rero. UN khalin rampi daihnak le zalennak hrangih pum rak peaw ngamtu Salai Osma Cung Nung le Salai Mandela Biak Uk te pahnih ra suahsal theinak dingah tiin cozah ṭuanvo neitu pawl hnenah a phunphunin an rak ngen ve rero hmang.

Ṭumkhat, BBC in hmaiton thusuhnak an neih lai-ah “Khawvel mipi hnenah ziangvek thucah le na miphun pawl hnenah ziangmi forhfial na duh?” tiin thusuhnak an nei-ih Salai Barack Khaw Tin Luai cun, ziangdang rel hnuaihni loin,“Chinram Ticket Na Lei Zo Maw?” a ti fukfo mai an ti cu teh.

Salai Ayete (Vankau)

Na ruahnak

One Response to Chinram Ticket Na Lei Zo Maw?