Christmas lawmnak ah thihcilh bomb phuah, mi 9 thi

Home » Thuthang » Leitlun Thuthang » Christmas lawmnak ah thihcilh bomb phuah, mi 9 thi

By vcth on December 18, 2017.

Pakistan ram, Baluchistan province, Quetta khawpi ih Bethel Memorial Methodist Church ah Christmas lawm in Pathian an thanthat lai ah ISIS ralhrang pahnih in thihcilh bomb an phuah ih zumtu 9 an thi ih zumtu 56 hriamhma an tuar tiah theih a si.

Thihcilh bomb phuahtu ISIS pahnih hi kum 16 le kum 20 an si. Mi pakhat in bomb 15 kg a phur ding tiah an zum.

Bethel Memorial Methodist Church, Quetta ah zumtu minung 400 lenglo cu Christmas lawm in Biakinn ah an khawm.

Khawm lai ah ISIS ralhrang pahnih cu biakinn lam an pan. Pakhat sawn tu biakinn hruang a kaan. Culaifang ah Biakinn security kiltu pawl in an hmu ih an kap. Hruang a kaantu ISIS pa cu sangka a ong lohli ih a rualpa pakhat a ra lut. Cutin security le ISIS pahnih cu tawkfang an kap aw. Pakhat cu security in an kap ngah nan pakhat sawntu cu an kap ngah lo ih cutin biakinn sungah a bomb thawn a tlan ih a thihcilh bomb a phuah suak.

Security pawl in rak pakhat rak kap ngah hlah sehla cu thih le hloh hi hnakin a tam sinsin ding.

Balochistan Inspector General Police (IGP) Moazzam Ansari cun, “tulai cu Christmas kiangkap a siih ISIS pawl in Khrihfa pawl hi an bet deuh cuang. Curuangah hi biakinn tla security sang deuhin kan retnak a si,” tiah a ti.

Hi bomb phuahnak ih a teltu ISIS ralhrang hrekkhat cu an luat ding tiah zum an si. December 17 zing Bethel Memorial Methodist Church ih a ratu hi minung pahnih lawng an si lo ding tiah zum a si.

Source: Reuters, Christian Post, Geo Tv

Na ruahnak