CNF upa pawl Falam CND ah thusim an co lo hi a poi zet maw?

Home » Thlirnak » CNF upa pawl Falam CND ah thusim an co lo hi a poi zet maw?

By vcth on February 21, 2017.

Chin ramkulh cozah ih hohatnak in 2017 Chin National Day cu Falam khawpi ah Falam khawpi kum 125 kim, Falam sizung kum 100 kim, Falam senpi inn kum 100 kim le Run Inn Tlun Kum thawn cem in sunglawi zetin hman a si.

Falam ih tuahmi Avoi 69nk Chin National Day ah Myanmar rampi President U Htin Kyaw amah rori tla in a telpi. A hmaisabik Chin National Day cangsuaknak 1948 ih Falam ih mipi tonkhawmnak ah tla Myanmar rampi President hmaisabik U Sao Shwe Taik in a telpi. 1961 ih Falam Chin Miphun Ni ah rampi vuangyi chuk U Nu in a rak telpi. 1961 hnu in cu U Newin ho in rampi thuneihnak an long ih Chin Miphun Ni ah rampi level bawi upa in an telpi nawn lo.

Vuangyi Chuk U Nu, Falam ih Chin Miphun Ni a hmang lai (1961)

Tuitum Falam ih Chin Miphun Ni puaipi ah “Chin National Front upa pawl cu sawm an si nan thusimnak an co lo ee” tiah CNF thapektu mihrekkhat an vuihram nak online ah hmu ding a um hnuaihni. Asinan anmah CNF upa pawl cu mifim an siih thil um daan an thei thiam ding zum a um.

Tuitum CND caan hmannak ah thu a simtu hi rampi President U Htin Kyaw, Chin ramkulh Chief Minister Salai Lian Luai le inntek ai-awh in Falam khawnu/pa ih hotu U Hrang Lawm Thang pawl an si. Culo cu program dangdang in caan hmang a si.

Tuitum Falam ih Chin National Day ah CNF upa pawl thusimnak an co lo hi poi zet maw? Falam ih Chin ramkulh CND ah sawmmi an si vekin lungawiten an telpi cu thil mawi zet a si. CNF tha a pektu mipi in CNF in hmuntin ah, puai tin ah hruaitu, VIP dinhmun in, Sayakyi tuan ringring dingin kan ruat ah cu kan palhnak a um men ding.

Chin ramkulh hohatnak ih tuahmi CND ah CNF upa pawl in thusimnak an ngahlo ruangah a poi tuknak a um lo, riahsia ciamco ding a silo. Anmah an thupitnak hmun a tampi ih cui hmun pawl ah a thupibik dinhmun in hmun an lak ko.

Na ruahnak