Colonel Hrang Thio le 1949 ih Ramsung Ralpi Thu – Part (1)

Home » Cahram » Colonel Hrang Thio le 1949 ih Ramsung Ralpi Thu – Part (1)

By vcth on June 10, 2014.

Hrang Thio

Thuhmaihruai:

Pa raltha Hrang Thio upat sunloihnak ah, Falam ih bualrawn thabik cu Hrang Thio bualrawn tiah, Hrang Thio upat nak ah kawh a si. Hrang Thio cu 1949 kum ih a cangmi, ramsung ralpi ah Karen National Defence Organization (KNDO) pawl do nak ah a nunnak a rak liam. A thih lai ah cun cuilai ih hminthang Chin Rifle Batallion (1) ih Commanding Officer, Lieutenant Colonel rank ih ramhrang ah a nunnak a rak liam. A thih hnu ah, a mah ih sunloih u pat nak ding ah Colonel rank ah an kaih sal. Ka nauhak lai ah Hrang Thio cu minung si lo in, bualrawn pa khat a rak si. Ka pa in Kawlram thuanthu, 1949 lai ih ramsung ralpi thu le Hrang Thio thu pawl ka nau hak lai ah in rak sim theu nan thupi ah ka rak ruat lem lo. Ka upa deuh hnu ah Hrang Thio ti cu bualrawn siloin mi raltha zet ralbawi pakhat a rak si thu, kiang le kap hnen in ka rak zir ngah. Asinan a thuhla felfai in ka rak thei lo. Kan dung kum tawkfang in Chin thuanthu le Chin miphun rak hotu tha pawl ih thu pawl cahram in ka ngan thok ih Colonel Hrang Thio thu tla ngan ding in timhtuahnak ka rak nei. Hrang Thio thu thawn pehparawin, Pu Ceu Nawn ih ngan mi Theih Hliah Manlo Hrang Thio, Falam Canbary tlawng kum 75 kim magazine, Falam BEHS (1) kum (100) kim magazine, Falam khuapi kum (100) kim magazine le Lairam Milangsar Pawl le Pathian Kutneh Mawizia cabu sung pawl ah a thuhla hmuh ding a um nan, tulai santhar mino pawl in Hrang Thio thu kan thei tuk lem lo. Hicauk pawl cu, cabu hlun deuh pawl an si ih tla a si men ding. Mihrekkhat, a hlei ce in thangthar nonawn pawl hrang ah Hrang Thio cu bualrawn pi a si lai men ding ka zum. Hrang Thio thu a thei duhtu mino tampi an um ding ka zum.

Hrang Thio thuhi a tlun ih kasim mi cabu pawl sung ih ka rak zingzoi tikah, a thuanthu nganmi cabu le cahram pawl hrekkhat ah a thu mallai an bang awk lo nak a um. Asinan an bang awk lo nak pawl tla cu, a thupi zetmi thulu pawl cu an si lem lo. An mah ih rak ngan cia vek in ngan sal ding le ka duh lo. Ziangtin dang lam deuh in ka ngan thei pei tin ka ruat tik ah, Hrang Thio thu thawn pehpar aw in a fiang lo mi thu tete le 1949 ih a cang mi ralpi sung ih kan thei duh mi tete pawl thawn kom in ngan seh la mipi in an siar duh ding tin ka rak ruat.

 

Mihrekkhat in Chinmi pawl cu kan tlangparmi pi Karen pawl a phatsantu, 1949 ih ramsung ral in Karen le Chin karlak pehtlaihnak a tha lo ter tiah an ti. Chinmi cu kana a tuk, kan hrang ih thatnak rak tuah tu, Karen pawl rak do lo ding kan si nan, tin ka nauhak deuh lai ah I sim dah tu khal an tam pi. Cuhlei ah Hrang Thio cu cozah lam in a do pi nak san cu, Rampi tlangbawipi U Nu in ka fanu ka lo pek ding tin a ti ruang ah cozah lam ah a ttang tivek titi leng tla a um ruri. Cun mino hrekkhat cu 1949 ramsung ral thu rel an peih lem lo, ziangah tile Karen unau pawl phatsan vek in kan ruat, ningzakza vek in kan ruat. Cu vek thiamthiam in Chin Battalion pawl in ziangruangah Karen pawl an rak do ti a thei duhtu tla an um ih ruangah himi fiang lo nak tete pawl, simfiang nak ding ah zingzoinak karak tuah ih, himi cahram ah Hrang Thio thu le Hrang Thio ih ramsung ralpi ih a tel nak, Ziang ruang ah ramsung ralpi a rak cang nak? Ziang ruang ah Hrang Thio le Chin Rifle Batallions pawl khal in Cozah lam tang in KNDO pawl an rak do timi pawl ka rak sim fiang ding.

Hrang Thio ih Thuanthu:

Hrang Thio cu Pu Bawi Kulh le Pi Do Thluai te ih fapa upabik a si. Amah cu 1919 kum ah, Falam thawn peng 2 hrawng a hlatnak Thanhniar khua ah a suak. A pa cu mirang kut tang ah lamkhawng/ lamzohtu a rak si. Hrang Thio cu kum 10 a ti in Laizo ih Hramthok Tlawng ah, a duh lo na cing in an rak kai ter. Phun 4 a ong hnuah, Falam Vernarcular Middle School ah Phun 6 tiang a kai. Cui hnu ah Ngawn ram ih um, Hmunpi khua ah tlawng Saya a tuan. Tlawng Saya thlahlawh a ngahmi tenren zetin a khawl ih, rang pa 3 a lei. Cui rang pawl thawn Falam ih dawr tuah tu pawl hrang ah thil phur in sum a rak hlawh.

Nikhat cu an khua ah Con lam pakhat a um. Cui puai ah milian fanu Lian Hoi thawn an rak tong aw. Cutin Hrang Thio cu Lain Hoi thawn an rak thit awk. Lian Hoi cu milian fanu a si ruang ah mo man khung zet a si mi Leiram K-1,000 man le tangka fai in K-60 a rak pek. Cutin Hrang Thio cu nupi a nei hnu ah mirang ralkap ah a lut. Cui san Lairam ah cozah hnatuan nei lo pawl hrang ah lothlo lo aibak hnatuan ding a rak um lo. Ralkap an lut a si le, lakhah tha ten an pek hlei ah, ramdang ih fehthei nak caan tha khal an rak nei. Cun, ralkap lut hi fimthiamnak zir nak ah tla an rak hmang. Curuang ah Hrang Thio khal cu May Myo (Pin Oo Lwin) ih Burma Rifle Battalion (2) ah ralkap a rak lut ih thla khat ah kyat 9 a rak hlawh. Kum khat ralkap a tuan hnu ah suahsemnak khua a tlung ih an nu in fanu te a hring. A si nan, vansiat ah a fanu te in thla rei lo ah a thih san.

Hrang Thio ih Mirang Ralkap a tuannak:

Hrang Thio cu Burma Rifle (2) ah ralkap a lut hnu reilo te ah senhnih a ngah. Leitlun ralpi voi (2) nak ah General Aungsan le Japan pawl in Kawlram an rak lak ruang ah Hrang Thio cu mirang pawl thawn India ram ah an sip. 1943 mirang in Japan do dingin an timtuah tikah Hrang Thio cu sen thum ah reng an kaih. 1943 kum thok lam ah mirang Chindit Battalion cun Japan pawl an do nan a hluh suah lo ih India lam ah an kir sal. Cui doawknak theh hnu ah Hrang Thio cu miring Governor Commission in bokhat ah reng kaih a si. 1944 ah Chindit Battalion cu an zuam sal ih Japan pawl India nisuahnak lam, Chin ramkulh le Kawl ram ihsin an dawi thei. Cui doawknak ah Hrang Thio cu nasa takin a ttang ih phur zetin a donak ruangah miring pawl ih pekmi Kawlram raldonak ih miraltha tacik (Burma Gallantry Medal) timi cu 1945 ah pek a si. Cuhlei ah mirang kuttang ih bawi pakhat ah cohlang a rak si.

1945 Kandy Conference:

1945 ah Burma ralkap hmailam thu rel dingin Sri Lanka ram Kandy khawpi ah Conference an nei. Cui Conference ih lungkimnak vek in Aungsan ih rak homi Burma National Army (BNA) le mirang kuttang ih rinum zetih hna a rak tuantu tlangparmi ralkap pawl kom aw in, Kawlram Ralkap pi din ding in lungkim nak an rak nei. Cui an dinmi Kawlram ralkap pi ah ralbawi 2,000 le ralkap 5200 tluk in Battalions 15 din a si. Cui Battalion 15 sung ah Kawl Ralkap Battalion pa (6), Chin Battallion pa (2), Kachin Battalion pa (2), Karen Battalion pa (3), Chin Hills Battalion le Gorkha Battalion tla an si. Cui Kawlram ralkap ih hotu le hotu sang cu General Smith Dun (Karen) le Brigadier Saw Kya Doe (Karen) tla an si. Kawlram saklam le thlanglam si-hta-nah-chuk (စစ္ဌာနခ်ဳပ္) ih ral bawi pawl tla cu Brigadier Ne Win le Brigadier Aung Thein (Mon) tla an si. Vanlam (Air force) lei uktu ah Col. Shi Sho (Karen) a si i Tilam (Navy) lei uktu ah Lt. Saw Jack (Karen) an rak si. Chin Battalion zate ih hotu ah Colonel (Bohmukyi) Dal Za Kam a siih sungtuan ah Major (Bohmu) Khen Za Mung tla an si. Kandy ih lungkimnak vekin mirang ram ih Sandhurst Royal Military Academy ah ralbawi niam deuh pawl zirnak nei ding ti a tel ih Chin battalion ih sin Hrang Thio le midang pawl tla England ram ah fehin zirnak an rak nei.

Hrang Thio ih Ralkap Sinak (Zalenmi Kawlram: 1945-1948)

1945 April ih a thar ih dinmi Chin Batallion/Rifle 1 le 2 cu Falam le Tedim ah hram toh a si. Chin Rifle 1 cu Falam, Hakha, Thantlang le Matupi lam pawl thawn kom khawm mi Batallion a si. Chin Rifle 2 cu Tedim pawl an tam bik. Hrang Thio cu Chin Rifle (2) ah Quarter Master timi Batallion piih tulsam mi thilri pawl zohfel tu a rak tuan. Cu lai ah Kawlram saklam Shwe Boo kiangkap ah dokalhnak, suamnak, firnak ti pawl thaten a rak do neh thei ruangah Major (Bo-hmu) reng ah reng kaih a si. Cun, Hrang Thio cu Chin Rifle (1) ih Company Commander (CO) reng ah tthan a si. 1947 February thla ah, Chin Rifle (1) cu Rakhine ram ih Mujahit dodaltu pawl do dingin Sittwe ah hmun an khuar. Mujahit pawl cu a tuih Rohingya tin kan theih mi pawl ih hohami a si ih, Rakhine ram saklam le Bangaladesh ram kom in an mah ten Muslim ram din an duh ruang ah cozah an rak do. 1948 ah Chin Rifle (1) cu Yangon ah an ko sal ih Hanthawati, Pegu, Tuanti le Thanhlin lam ih dodaltu pawl an do. 1948 Kawlram zalennak a ngah tikah Hrang Thio cu a kum (29) a ti ah, Lt. Colonel (Duh-Bohmu Kyi) ah a reng a kaiih Chin Rifle (1) pi Commanding Officer (တပ္ရင္းမွူး) ah a rank a kai. Kawlram zalennak an ngah tikah Chin Rifle (1) cu Yangon ah hmun an khuar. Chin Rifle (1) ih hotusang 2nd in Command cu Major. Po Kung a si ih Capt. (Colonel) Van Kulh (BGM, BAR) nih Adjutant a tuan. Lt.Colonel Son Khaw Pau le 2nd in Command Major Thual Khup ih homi Chin Rifle (2 ) cu Shwe Bo ah hmun an khuar. Lt. Colonel Son Khaw Pau cu a kum (26) a ti ah himi din hmun a thleng thei. Cun, Lt. Colonel Lian Cin Zam ih homi Chin Rifle 3 (Chin Hills Batallion) cu Mikthila ah tiin an si.

Lt.Col Hrang Thio ih Nun Daan le Ziaza:

Hrang Thio thu kan sim tikah, bawhlung sit a thiam dan thu, a ral that dan thu le nehnak ngah ding in zuam duhnak thinlung a neih dan thu pawl, a thei tu pawl in an sim ring ring. Colonel Van Kulh in a cauk “BC 3666 Zeya Kyaw Htin Colonel VAN KULH, BGM & BAR (Rtd.)”  sung ah “Colonel Hrang Thio (BGM) hi mingo, mi dawh, mi chuakthiam ngai a si. Pumpululh chuih a thiam ngai mi a si. Ral kah nak lei hoi hna ah cun, a ral a tha tuk” tiah a sim. Thlanglam Kawlram ralkap rakuk tu Brigadier Kyaw Zaw khal in a mai thuanthu ngan mi cabu (Auto Biography) sung ah “Hrang Thio cu bawhlung sit a thiam zetih a ral tla a tha zet Chin miphun a si” tiin a ngan khum. Colonel Khen Za Mung khal in, Chin World thawn interview an tuah nak ah “Hrang Thio tluk ih paraltha in ka sansung ah ka hmu dah lo” tiah a ti.

Hrang Thio cu mi pawlkom a thiam zet. Bawhlung sit pawl tla amah in a tawlrel theu. Batallion le Battallion, senbenpawl le officer rank pawl tivek in bawhlungsit nak a rak tuah theu. Amah cu mi nun tha le mi tluangtlam a si. Bawi upa le cozah lam bawi pawl khal ih upat le rinsan mi a si. Chiinmi Za Hu khal Phunsang tlawng a rak kai ter ih a rak cawm. Za Hu cu nehhnuah Chinram Zipeng zung ah hna a tuan. Chin Rifle (1) tang ih ralkap a rak tuan ve dah tu Pu Za Thluai khal in Hrang Thio cu Burma Army Football team zong ah centre forward a si. Ti lio le a dang lentecelh zong a zuam ngai. Laimi siangngakchia ca cawng pawl fakpi in bawmh khawh a zuam hna. Rangoon khua phan tlun-inn ngeilo pawl caah tlunnak ding hmun a kawl piak theu hna” tiah a sim. Hrang Thio cu Chinmi a sinak parah a lungawi, a hngalpi zetih Chin nunphung khal, can tha a nei tin ten a khai sang the utu a si. 1948 ah Chin kumthar puai (Fanger puai) cu an Battallion ah an tuah ih rampi President, Vuangyi pawl le ralbawi upa pawl khal a sawm. Cui Fanger puai ah Chin nunphung, Chin lam mawimawi pawl miphun dang bawi upa pawl hmu ding in a hmuh. 1948 December ah Christmas Carol singing cu amai battalion in an feh in President inn, Vuangyi pawl inn le ral bawi pawl inn ah hla saknak rak nei. Cutin 1948 tiang cu nuam zetin caan a rak hmang.

Karen-Burma miphun buainak (1949 ramsung ral hlan thu)

Leitlun ralpi voihnih nak a tho tik ah, Karen pawl cu Mirang pawl kuttang ah rinumzet in an rak um. Aungsan le Janpan pawl in Kawlram an lak tikah, Mirang pawl cu India ram ah an kir. Mirang pawl an um nawn lo tikah Karen pawl cun, Mirang pawl in nikhat ah in rak bawm sal ding timi ruah sannak thawn, an mah ten meithal an rak kai ih BNA le Japan pawl an rak do. Karen pawl um nak, Karen khua pawl khal hruang an kulh ih, an kiangkap ih um Kawl khua pawl thawn pehtlaih nak an rak nei nawn lo. Himi thucu Kawlram ih zalennak a ngah pekte ih, Kawlram ralkap rakuk cu General Smith Dun in a cauk “Memoirs of the Four-Foot Colonel” timi sung ah “Karen pawl cu mirang pawl an rak rinsan tuk, mirang pawl India lam ah an sip mihi an hrang an sunnak tumpi tin an hmu. Cutin, an mah te mei thal an kai ih Aung San ih Burma National Army (BNA) thawn buai nak an rak nei phah phah. BNA pawl khal in meithal a kai mi khua pawl hnen ihsin an meithal pawl an long tum. Cutin, Karen pawl in an meithal an ap duh lo tik ah Karen le Kawl kar lak ah that awk nak tiang a rak suak. Cutin, Karen khua in Kawl khua pawl a sim ih, kawl pawl an that. Kawl pawl khal in Karen khua pawl an sim ih cutin miphun khat le khat that awk nak a rak suak. Khua tam pi cu urkang a si ih, minung 1000 leng in an thi” tiah a ngan.

Himi Karen le Kawl buainak thu cu Kawlram pi rakuk dah cu U Nu khal in a cauk “Tartay Sanay Thar” sung ah “1942 hrawng ah Mirang pawl cu Inida lam ah an sip ih BNA le Japan pawl in kawl ram an uk. Cutin BIA pawl in Karen khua pawl hnen ah meithal an long, paisa an long, thilri man khung pawl an firsak. Myaung Mya peng ah Karen khua pawl hnen ihsin meithal long an tum. Karen pawl khal in an meithal cu an rak ap duh lo, ziang ah maw an rak ap duh ding, dan um lo laifang a rak si. Curuang ah Karen le BNA pawl do awk nak a rak suak ih cui buainak cu Karen le Kawl khua pawl ah a peh vivo. Karen pawl tamnak hmun ah Kawl pawl an tuar, Kawl pawl tamnak hmun ah Karen pawl an tuar. Cutin, Kawlram sung ih Karen le Kawl duhdawtawzet, buainakum lo in kum rei pi an rak um tlang nak cu a siat ral thluh zik” tiah a ngan.

KNU/ KNDO Dinnak

Karen pawl cu Mirang pawl in kanmah ten ram in pek ding tiah zumnak tumpi an rak nei. Cui hrang ah Panglong Conference khal ah, a va ngai tu men ah an tel. A sin an, an zum vek le an duh vek in thil a rak cang lo. Kawlram zalennak a ngah tik ah, kawlram ih danhrampi cun Karen State din ding in a lung kim pi. Asinan, cui ram cu khawi tia a si ding ti vek pawl mipi hnenih thusutnak le lungkimnak (referendum) tuah hnu ih neih ding a si. Zalennak kan ngah pek te ah cu Karen thu pawl cu Karen Affairs Council in a rak kai. A thok ah cu a rem cang zet, buainak ngai ngai a rak um lo. A si nan, can a hung rei deuh, Karen le Kawl kar lak ah buainak a hung suak in cun, Karen in Kawl a zum tuk nawn lo ih, Karen pawl cun Karen ram ngah ding au aw nasazet in a thang vivo.

Cutin, Kawl le Karen kar lak ih buai nak, mitamsawn a si mi Kawl pawl lak ih sin humhim awk nak ding le Karen ram ngah ih mahten lairel ding pawl thu pawl dil nak ding ah Karen pawl kom pawl a si mi Karen Central Organization, Burma, Karen National Association, Karen Youth Organization and Karen National Association pawl komkhawm in Karen National Union (KNU) timi an rak din. KNU an din hnu ni hra ah, KNU ih meithalkai ralkap a si mi Karen National Defence Organization (KNDO) timi an din suak. An din ve ten, meithal a nei hmuah hmuah in KNDO sung ah an lut. KNU cu mirang ram ih tlawng theh, danlam ih hnatuan (lawyer) Saw Ba Oo Gyi cu hotu ding ah an hril. KNU le KNDO ih dil mi cu, kawlram Delta (ျမစ္၀က်ြန္းေပၚ) kiangkap le Kawlram tang lam hmuah hmuah Karen State ih ret ding hi a si. Kawl cozah cun Karen State din ding cu an lungkim nan, cui KNU/ KNDO ih dil mi cu an lungkim lo ruang ah buainak, zumawklonak pa khat le khat kar lak ah a rak suak sin sin.

Peh lai ding ……

(Cangantu Salai Van Cung Lian (UK) cu Kalaymyo um Pu Thawng Bil Lian le Daw Mawi Sung te ih fapa upabik a si ih England ram ah Civil Engineering in thlawng a theh hnu ah, England ram tho tho ah Civil Engineer tuan rero lai tu a si.)

by Van Cung Lian

Na ruahnak

4 Responses to Colonel Hrang Thio le 1949 ih Ramsung Ralpi Thu – Part (1)

  1. stephen thawm lian   June 10, 2014 at 2:06 pm

    Salai van Cung Lian,

    Na ti tha zet.

    Thang thar no nawn pawl ih theih tul zet mi thuan thu roling asi.

    2Part na peh zom ding mi kan hnak hlap zet.

    Upat nak thawn,
    Stephen Thawm Lian.

  2. denylian   June 12, 2014 at 7:34 am

    Part 2 run ngan zang uh

  3. vcth   June 12, 2014 at 9:24 am

    a ra cing ding. Finalize ding malte a tang.

  4. Anonymous   April 23, 2016 at 7:35 am

    A tha tuk