Colonel Hrang Thio le 1949 ih Ramsung Ralpi Thu – Part (3)

Home » Cahram » Colonel Hrang Thio le 1949 ih Ramsung Ralpi Thu – Part (3)

By vcth on July 5, 2014.

Salai Van Cung Lian (UK)

Part (2) ihsin a peh ….

Insein Ralpi thoknak le KNDO donak

1949 Feb 10 ni ah Brigadier Kyaw Zaw cu Insein Front ah a rak thleng. Insein ral do ding ah kumpi Acozah lamin Chin Rifle Batallion (1), Kachin Rifle Batallion (1), le Sittwe ihsin a zanzan ih cah mi Burma Rifle (5), Kachin Rifle (2) ihsin company hrekkhat le UMP Batallions pawl an si. KNDO pawl khal Feb ni 2 ni ihsin Insein an lak thluh ih, Acozah ralkap pawl thawn doawk ding ah an timtuah ve. February ni (19) ihsin Burma Rifle (5), March thla zarhhnihnak ihsin Chin Rifle Batallion (2) le Chin Rifle (3) ih Company hrekkhat khal Insein raldonak ah an rak tel.

February 13 ni ihsin thok, Chin Rifle (1) le Acozah ralkap pawl in KNDO pawl an nor thok. Cutiih an donak ruangah, KNDO pawl cu U Taw pakan cetzung, Rubber Garden le Sawbensin Garden ihsin U Sekkan phungki tlawng lam ah dung an sip. Cui phungki tlawng cu Burma Rifle (5) ih ralkap 100 lenglo in an do nasa nan an hluh suah lo ih hlei ah thih le hloh, hliamhma tuar an tam zet. U Sekkan phungki tlawng cu tlangpuk parah a um ih a kim vel in tlakrawh dawl mi a um ruangah, ralkhamnak hmun thazet a rak si.

Cuti a si ruangah, Chin Rifle (1) ih Commanding Officer (C.O) Hrang Thio in thupruk ih do dingin Second Lieutenant Thai Cawn thawn khua an khang. Hrang Thio cun Thai Cawn kha, “Na duhmi ralkap le hriamhrei hril aw la, kan timtuah ciavek in na va do hai ding” tiah thu a pek. Thai Cawn, Sergeant Run Ling, Lance Corporal Hmung Ci le a dang ralkap 2 thawn, cui phungki tlawng cu, sunlai rori ah an va nor. An va do zik ah Acozah ralkap pawl lam in pawhzawhnak nei awk ter in, KNDO pawl cu do cing lo ding in an rak um. Curuangah KNDO pawl khal cun, do cing an tum lo tin pawhzawh deuh in an rak um ve. Thai Cawn te cu lothlo pawl vekin lungzi sia le angkisia thawn, meithal le bomb pawl an angki sung ah thup in sunlai rori ah tlawng dung lam ihsin an va kai.

Tlawng an thleng cun, KNDO pawl cu rawl an rak ei, mihrek an rak it that, mi hrek cu phe an rak let. Phelek tu pawl hnen ah, Thai Cawn in bomb a deng, cun Stengun in a kap hai. Run Ling khal in a rawlei lai mi pawl lak ah le it that tu pawl hnen ah bomb pa hnih a deng ih Stengun in kap ciamco ve hai. KNDO pawl cu meithal hman lak man lo in an tlan. A tlan mi pawl cu an dawi ih, KNDO lam in an tlan phah ih, dunglam zawng in an kapmi cerek in Hmung Ci ih lu ah a rak ngah ih, Hmung Ci cu a nunnak a rak liam. Cutin, Hrang Thio ih timtuah saknak le Thai Cawn te ih ralthatnak ruangah U Sekkan phungki tlawng cu an rak lak thei.

KNDO pawl cu U Sekkan tlawng thawn hla lo PWO Bangalo ah an sip. Cui, KNDO pawl ih sakhan cu thirhling thawn an kulh ih, Acozah ralkap lam in an nor tum tikah, KNDO pawl cun ṭheng par ihsin Sniper thawn an rak kap. Cutiin an hmun khuar a daan a ṭha zet ruangah KNDO pawl ih sakhan cu Acozah ralkap in an rak do thei lo. A va do in a thi tu kawl ralkap pawl ih ruak hman laktheilo dingin, Karen Sniper man pawl in an rak kap hai. Hrang Thio cun a rinsanbik mi Thai Cawn le Run Ling a ko ih a thupruk ih do sal dingin timtuahnak a nei sak. Tuiṭum cu an itthat lai caan, zamṭim caan hril in an do. Thai Cawn ih hrilmi Ralkap 4 in, zan an it that lai ah an thirhling an tan. Run Ling in hmasabik a lut ngah, Thai Cawn te an tan rero lai ih a awn kha KNDO ralkap pakhat in a thei ih a tho tum zawn ah, Run Ling in a hngawng ah nam in a sun. Cupa ih a thi zik auaw ruangah KNDO pawl an tho ih meithal an lak zawng ah, Thai Cawn in Sten gun thawn a kap hai, ralkap pakhat in bomb a deng. Meithal awn an theih ve ten, Chin ralkap pawl khal in dung in an ra bawm. Cutin, KNDO pawl cu Sawbya Kyi Kone lam ah an sip sin.

Hmun dang doawnak pawl le Yangon Acozah:

Insein ralpi a canglai fang ah Kawlram hmun dangdang ah tla ral a rak tho ve. A tlun ih kan simzo vek in Pyi khawpi le Taungo khua cu Insein ral a thok hlanih sin KNDO pawl ih kutsung ah a um zo. Bo Naw Sai ih ho mi Kachin Rifle 1 ih ralkap hrekkhat le Karen Rifle 1 khal cu kom aw in February 20 ni ah Mitthila khua an lak. Mitthila ih khualtlawng phur Dakota vanzam pa hnih an lak ih, ralkap a khat in an phur ih May Myo kiang Acozah ralkap umnak Anesakhan ah an va zam. May Myo ih ralkap pawl ih rinlo lai ah an thleng ih cutin May Myo cu February 21 ni ah ol ai ten an lak thei. Cutin May Myo ih General Ne Win ih meithal a rak lawn mi le Engineer ralkap sung ih a rak thunmi Karen ralkap pawl thawn an kom aw ih Madalay do dingin an pok. 1949 March 11 ni ah Mandalay tla an lak suak. Bo Naw Sai hoha mi Kachin ralkap hrekkhat le Karen Rifle 1 cu KNDO thawn kom in Yangon ih KNDO pawl thawn kom in Kawlram ramdinkhawm Acozah cu dosuak an tum. A kham tuding Acozah ralkap an um lo tluk a si, kumpi Acozah khal a kuai zik.

Kumpi Acozah pi cu Yangon Acozah tiah capoh thungai in an rak ti. Vuangyi tampi tla an hnatuan an bang ih U Nu kha Communist party le KNDO pawl thawn kom aw in Cozah thar din ding a forhfial. Cui thu cu a thuanthu cabu, Tartay Sanayta timi sungah, “Zinglam nazi 8:00 ah U Kyaw Ngein le Bo Newin in in ra tong. Bo Newin cu zianghman a tong lo. U Kyaw Ngein in Cozah hnatuan ihsin kan bang tin na thei zo ding, ziangruangah ti lo simfiang tla a tul ding ka zum lo. Na duh le tapung (dodaltu) hotu pawl ko in cozah thar na din thei in ti. Asinan tapung pawl thawn kom aw in ziangtik hmanah cozah ka din lo ding, a cang tawk kan cang ding” tin a ngan.

Sawbua Kyi Kone Doawknak le LC. Hrang Thio:

Lt.Col Son Khaw Pau cu a kum 26 ah Lt.Col rank a rak ngah. A hoha mi Chin Rifle 2 cu Ta-thone peng KNDO le MNDO kut sung in an lak theh hnuah, cui kiang kap humhim in an um nan, Insein raldo ding ah tlun lam in thu a thleng. Ta-thone khua humhimtu ding ah Ta-thone Sitwunthan pawl an ap hnuah, Mawlamyaing vanzamtual ihsin ralkap vanzam thawn, an battalion zaten, ni 3 sungah Insein an thleng. Cuitin Chin Rifle 2 cu Sawbua Kyi Kone lam ah, March thla zarh hnihnak ihsin, ral hmai thar khuar in an um. Chin Rifle 1 tla KNDO pawl nuam teten an nor thei vivo.

Hithu pawl cu, Tetkatu Sein Tin ih nganmi Aungsan Turiyah Thai Cawn cabu sungah, “Sawbai Kyi Kone kiangih hmun a khur mi Chin Rifle 1 ih Company pa 2 le Chin Rifle 3 ih Company pa 2 cu KNDO pawl thawn Insein in Mingalardone airport fehnak zin kaingih thlanmual fate kiangah an do aw. (Company pakhat ah ralkap 90 hrawng an um) Nikhat cu mina phur ding tuanvo ka nei ih dowaknak lakah ka tlan ka zuang. Doawknak a nasa zet lai ah C.O Hrang Thio le a dang company commander pa hnih Jeep thawn an ra thleng. Cui an thlen cu ka hmu veten Commanders pawl hinah ih um dingah tih a nung thu ka sim. Cutik ah, C.O Hrang Thio in ‘nangmah hman hi tin na vak rero ih zianghman na cang lo, kan hrang bul ah ziang tih nungnak a um,’ tiah in sawn. Cutin Thai Cawn tla mawtaw parah a kai. Hrang Thio cu doawknak pawl hla ral in zoh le thu hngak a diriam lo ruangah, amah rori Frontline ah ra in a rak hoha duh. Cutin ruah vekih a sur mi cerek lak ah cui Jeep thawn an feh. Vansiat ah cerek in mawtaw mawngtu a kheng ngah. Hrang Thio tla a ke ah cerek in a hnor, nan a roh tuk lo. Cu hnu ah Acozah le KNDO lak ah ni 3 sung thurelnak an nei nan an rem cang lo.” Cutin Cozah le KNDO karlak ah doawknak a peh vivo.

Banian Cetzung Doawknak:

Insein le Aungsankhua lakih Banian tuahnak cetzung ah KNDO pawl hmun khuar in an um. Cui hmun cu Insein an long salnak ding hrangih hmun thupi pakhat a si. Hi cetzung Acozah ralkap in an lak thei hlan lo Insein tla an lak thei lo. Chin Rifle 1 ih Capt. That Hu in cui cetzung cu a do nan a hluhsuah lo. Hrang Thio cun a rinsan bikmi a milai a simi Thai Cawn le Run Ling cu a thupruk in do dingin a ron. Thai Cawn le Run Ling in cui cetzung luhnak thir sangka pi cu, thir ih kham mi motor thawn va pahbal an tum. Motor tuahnak workshop ah an feh ih, jeep pa khat cu thir in an kham thluh. Cui motor thawn, cetzung ih sangka pi cu an va pah. Voikhatnak ah a ong aw thei lo, bomb le cerek awm cu an thei, dung an sip, an pah sal, cutin voitampi an tuah hnu ah sangka pi cu a ong aw. Motor par in an dawp ih Stengun thawn KNDO pawl an kap. Cetzung sangka a ong aw veten, Chin ralkap pawl khal in an ra nam ciam co hai. Cutin, Hrang Thio ih raldo dan a ruah thiamnak, Thai Cawn le Run Ling ih ralthatnak le Chin ralkap pawl ih pumpeknak ruangah cui banian cetzung pi cu an lak thei. Hi Cetzung an lak thei hnu, April 22, in cu Insein cu Acozah kut sungah a thleng sal. Insein doawknak cu ni 112 a rei ih doawknak pi 15 a rak um.

Chin Hills Battalion Thuanthu Tawi le Doawknak Pawl:

Chin Rifle 3 ih theih mi Chin Hills Battalion cu mirang in Chinram an uk hnu 1894 ihsin Palik ralkap (Milatary Police Batallion) ihsin thok mi  a si. 1949 kum cem lam lawng ah ah Chin Rifle 3 tiin hmin an rak thleng. Chin Rifle 1 le 2 cu Kandy conference ih lungkimnak hnu ihsin, santhar Burma Army sung ih tlangparmi Batallions an si. Cui santhar Burma Ralkap battalion 15 sung ah Chin Hills Battalion tla an thuanthu kilkhawi mi cui hmin in an tel. Chin Hills Battalion cu Kawlram ralkap lak ah kum upa bik a siih 1894 in Chin ramkulh le Naga tlangtlaun lam ah hnam doawknak diatertu le mipi humhimnak rak pek rero tu an si.

Leitlun Ralpi voi I nak lai ah hi battalion ihsin ralkap 56 cu France ram ah raldo an feh ih minung 42 an nunnak an liam. 1942 Leitlun Ralpi voi II nak ih Japan ral pawl dotu ah tla thupi zetin an tel. Hi Battalion ih Company pa 2 cu Shweli lilawn an kil him laiah, ral ih kulhnak ihsin an rak luat. 1943 mirang pawl India ih an kir hnu khal ah, netabik a tangtu battalion an si. 1945 ah Japan pawl Chinram ihsin kir dingih a dotu tla an siih, Minbu ramkulh ih Irrawaddy tiva tlun ih lilawn pawl, Allied ralkap pawl ih an hmang sal thei dingih hmainor in rak dotu an si. Cu hnu ah Chin Hills Battalion Anti-Tank Regiment tiah a hmin tleng a siih 3” le 87” tank siatnak meithal kaitu an si.

1946, October 10 ah Kawlram Counciller of Defence: General Aung San in an battalion hmunkhuarnak Meikhtila ah a va hal hai. Aung San ih tlangpar mi ralkap pawl a hal hmaisabik mi an si. Aung San ih a hal phah in ralkap pawl an raldonak pawl thusutnak a nei, cuhnu ah Battalion pi thawn an zuk tlang. Sub Major Ngin Zam (OB, BGM) thawn pumpak in an zuk awk hnuah Ngin Zam thawn hitin thu an rel.

Gen. Aung San: Nan battalion sung ah miphun (races) ziangzat nan um?

Major Ngin Zam: Miphun (races) pa riat kan um, cupawl cu Siyins, Hakha, Khuangsai, Hualngo, Senthang, Zahau, Kamauni le kawlram suak Gurkha pawl kan si .

Gen. Aung San: Miphun tampi nan um ih ziang tong nan hmang bik?

Major Ngin Zam: Thupek awknak ah cu Mirang kan hmang. Asinan Battalion sungah cu Urdu kan hmang bik.

Gen. Aung San: Nan ralkap pawl kawl tong an thiam maw?

Major Ngin Zam: Kan battalion ih ralkap thazang cu 800 kan si. Cumi sung ih 60 hrawng lawng nih Kawl tong an thiam.

Gen. Aung San: Nan ralkap pawl Kawlrawn ih ni satdan nan tuar thei ko maw?

Major Ngin Zam: Tufang cu thlatang a si ih Laitlang vek a si. Ralkap pawl hrang ah zianghman a poi lo.

Gen. Aung San: Ralkap paziat sizung ah an um?

Major Ngin Zam: Tufang ah cu ralkap 12 sizung ah an um ih, pakhat cu besia zet dinhmun a si.

Gen. Aung San: Mirang pawl in eiding (rations) thaten an lo pek ko maw?

Major Ngin Zam: Yes Sir! Kan tul mi hmuah hmuah Supply Depot ihsin in pek thluh.

Gen. Aung San: Bogyi! Mirang pawl an ram ah an tlung sal dingih, zalennak kan ngah thlang ding. Battalion hmuahhmuah kan mah milai pawl in an hoha ding. Tusun ih ka lo tong ngah hi ka lungawi tuk. Cule, nan battalion ih sulhnu, nan dingfelnak, nan honesty, tuanvo thaten nan tuannak (dutifulness) pawl ka hmu tikah ka lungawi, hevek in pehzom tum ringring uh. Zalenmi Kawlram in nan mah vek dingfelmi le titsa nei mi ralkap hi kan ram thangsonak ding ah kan tul. Kaht le khat hna kan tuan tlang tul, kan zum aw tul, cun lungrual zetin kan um tul. Kan mah thuthu ten kan nung a si le, zalennak ih a sullam kan tep thei lo ding. Nan battalion ih culture, traditions pawl kilkhawi in, fighting spirit sang zet ah nan ret ringring a tul. Nehhnu ah ka lo rak hal sal hai ding. Nan ralkap smart zetmi le disciplined zetmi pawl ka hmu ngah ih ka lung awi tuk.

Cutin, Aung San cu zanlam 16:45 ah a suak sal. Aung San cu thah a tuar ruangah battalion cu a rak leng ngah nawn lo.

1947 ah Kyaingtone ah ral an do. 1948 ah Communist pawl donak ah an hmin a thang. Pagan kiangih Ngatayouk khua ih doawknak ah ral 60 an that ih 80 a nung in an rak kai.

1948 ah Chin Hills Anti-Tank Regiment cu Lt.Col Lian Cin Zam ih a ho ih, Meikhtila ah hmun an khuar. 1949 January 15 ni ah Kaya pengih Padaung buainak daiter ding ah, an battalion zate zikten Loikaw lam ah an pok. Loikaw ah hram an khuar ih ralpawl umnak Hpalaing khua lam ah Company pakhat (ralkap 90) cu rualrem nak (Good Will Mission) hrang ah an rak feh. Hpalaing khua cu Loikaw ih nitlaknak lam peng 20 tluk ih um mi khua a si. Cui ni ih thilcang mi thu cu London ih um British Library ih Shelfmark number (MSS EUR/E250) Chin Hills Battalion thuanthu cakhawmmi sung ah, hitiin ngan a si; “Tet-khuai (Company) pakhat cu Capt. Lian Khua Pau ih ho in remdiahnak tuah dingin (Good Will Mission) in Hpalaing lam ah an pan. Loikaw ihsin peng 11 hrawng an thleng tikah KNDO pawl ih thupruk ih do an rak tong. Cui, doawknak cu nazi pa 5 tluk a rei ih a hmun ah Chin ralkap 29 (ralbawi pa 2 tel) an thi. A tangmi ralkap 49 cu KNDO pawl in an rak kai. Hriamhma a tuartu pawl tla RC Siangbawipa in a dil hnu lawngah Loikaw sizung ah an kuat. Cuhnu ah Yangon, Mingalardone sizung ah an kuat.” Hriamhma tuartu pawl sung ihsin minung 12 cu neta ah an thi. Kaih a tuarmi pawl tla cu U Nu le Brigadier Saw Kya Doe ih tawlrelnak in thlah an si sal nan an meithal pawl cu an long thluh. Hithu cu Col Tin Maung ih ngami တိုင္းျပည္ကႏုႏု၊ မုန္တိုင္းကထန္ထန္timi sungah “Loikaw ka thleng hlan zarhkhat hrawng ah Chin company pakhat cu KNDO ih thupruk in do an rak tong ih mitampi an thi. A si nan, Chin Hills Battalion pi a um ih, Loikaw ih ummi ka company pa hnin cu bawm ding ah ka kuat tul ding ka zum lo” tiah a ngan. Col Tin Maung cu Burma Rifle (6) in hotu sang a si ih, 1949 January thla thok ah a company pa hnih hawl in Meikhtila ah a rak feh, a company pawl cu Chin Hills Battalion thawn Loikaw ah an rak feh thu a thei vete, Loikhaw ah a dawi hai mi a si.

Chin ralkap pawl cu KNDO pawl ih thah an tuar ruang ah an thin heng zet, dosal an duh nan, tlunlam in dungkir ding in thu a rak thleng tik ah Acozah par ah khal an rak lungawi lo zet. Hi thuhla Chin ralkap dang pawl in an theih tikah an thin a tok zet. Hrang Thio khal a thin a rak heng zet tiah Capt Than Tawng in Pu Rodinga hnen ah a rak sim dah. Battalion hotu Lian Cin Zam cu February thlalai hrawng ah Col Tin Maung thawn Gen. Ne Win in Yangon ah a ko hai. KNDO pawl in Meikhtila lak an tum thu pawl a sim hnu ah Meikhtila ah Chinralkap hrekkhat thawn a feh sal. Cutin, Chin Hills Battallion ih ralkap hrekkhat cu Meikhtila ah, Company pa (2) cu Loikaw ah le a dang Company pawl khal cu Insein raldonak ah an rak tel.

Bo Naw Sai ih homi Kachin ralkap le KNDO pawl in Meikhtila cu February 20 ah an lakih Lt. Col Lian Cin Zam khal cu cu Meikhtila ah KNDO pawl ih kaih a tuar. Loikaw ih Company pa 2 khal cu Thazi khua ah humhim ding ah an ko. Thazi khua cu Chin Hills Anti-Tank Regiment ih Company pahnih, Loikaw ih hmunkhuar mi tho tho, Burma Rifle 6 ih, Col Tin Maung company pa hnih le Gorkha Battallion ih Company pakhat in KNDO ralkap 3000 laicu an rak kham. Thazi khua cu Kawlram nisuah, nitlak, saklam, thlanglam tlangleng zin tongawnak a si vekin hnun thupi zet pakhat a si. KNDO pawl in Thazi an lak thei hlan sung cu saklam ih an ralkap pawl tlang leng thawn Yangon lam ah rang zet in an suk thei lo ding. Curuangah, Thazi khua lak thei dingin an zuam.

KNDO pawl in Thazi khua cu an lak thei lo ruang ah, Bo Naw Sai a thin heng zet. March thla lai hrawngah Bo Naw Sai a mah rori in Thazi lak diang ah Maymyo ihsin a rak suak. “Thazi ah suncaw ka va ei ding” tiah hngal zetin a au. Thazi khua humtu Acozah ralkap pawl cu nasanzetin an tuar nan Thazi khua cu an kilhim thei. Thazi khua ih ralthu um dan report pek ding ah Major (Colonel a cang leh) Khen Za Mung cu General Ne Win in a ko. Col Tin Maung in, Khen Za Mung hnen ah Ne Win hnen ah Company pakhat in dil sak bet aw tiah a cah. A cah ta vek in, April ni 5 ni ah ral bawmtu ding Chin ralkap Company pakhat an ra thleng. April ni 7 ni ah KNDO le Kachin ralkap pawl in Thazi cu netabik nornak an nei, a si nan an hlawh tling lo ruang ah dung an sip. Cui ni ah ralbawmtu ding ih a ra thleng mi Chin ralkap le Thazi khuasung ih a taar mi ralkap pawl lungawi zet in an tong awk thei. Thazi khua doawknak ah Chin ralkap 39 rampi hrangah an nunnak an liam. KNDO pawl Thazi ihsin an sip hnu rei lo te ah, Meikhtila ih Lt.Col. Lian Cin Zam hnen in Mitthila ih KNDO pawl khal an um nawn lo tiah ca a rak thleng. Cui thu an thei ve ten, Chin Hills Anti-tank Regiment ih hotu sang Major LWC Hitch Cock (mirang kahpia) ih homi Company pa 2 khal cu Meikhtila lam an pan. Thazi ih doawknak thawn pehparawin, Col Tin Maung in a cabu sungah, “Gorkha le Chin ralkap pawl ih lungput le rinumnak cu ziangtik hman ah ka hngilh dah lo ding,” tiah a ti.

Bo Now Sai le KNDO pawl cu Taungngo ah an komaw sal ih Yangon lam an pan phah ah Daik-U khua an lak. General Newin cu Meikhtila ah a mah rori a va feh ih Burma Rifle (6) hotu Lt Col Tin Oo hnen in Company pa hnih cu Chin Hills Anti-Tank Regiment hnen ah a pek. 1949 June thla zarh 2nk ah Chin Hills Anti-Tank Regiment ih ralkap pawl cu Meikhtila insin, vanzam trip 30 in Yangon Mingalardone ah an thleng. Mingalardone ihsin ralkap mawtaw thawn Daik-oo ah feh ih Bo Naw Sai homi Kachin le KNDO ralkap 1000 lai thawn hmaiton in an do aw. Chin ralkap pawl cu Kadot-Phayargyi ah khal KNDO thawn nasazet in an do awk. Cutin, Chin Hills Anti-Tank Regiment le Burma Rifle battalion ih ralkap pawl cun KNDO le Bo Naw Sai homi Kachin ralkap pawl Yangon thleng lo dingin an rak kham thei. Cui doawknak ah Chin Hills Anti-Tank Regiment le Burma rifle 6 ihsin ralkap 225 an thi. Bo Naw Sai ho mi Kachin ralkap pawl cu Taungngo ah an kir sal. Cun Taungngo ihsin Kaya ramkulh, Taunggyi, Lasho, Kuatkhai, Namsam tiin an kir vivo.

1949 kum cem lam ah Chin Hills Anti-Tank Regiment cu Chin Rifle 3 tiah thleng dingin thu a um. Cui thu thawn peh aw in Lian Cin Zam in ca number 381|0-1, Aug 4, 1949 bun mi casung ah dokalhnak ca a rak ngan. Cui ca sungah … hi battalion sungih ralkap zeten le ralbawi zaten hmin thleng ding kan duh lo a si. Chin Hills Battalion/ Anti-Tank Regiment cu miring san lai ihsin in pekmi hmin a si, nan ramdinkhawm Acozah parah rinum ten kan um ko, battalion kan sinak kum 55 a rei zo mi sulhnu kan thlun duh a si”  tiah a dokalh nan a hluh suah lo. Cutin kum 55 a rak hmun zo mi thuanthu cu siat bal in Chin Rifle 3 tiah hmin an rak thleng. Col. Lian Cin Zam tla 1952 ah March 27 ah Burma rifle battalion 15 ah an thawn. Col Lian Cin Zam cu 1956 ah Ralkap sizung ah a thi . A ruak cu Kalaymyo ah phur ding a siih cozah in an vanzam hman an saing lo ih rualpi Burma Oil Company ih vanzam in an phur.

Peh lai ding …

Colonel Hrang Thio

Photo Credit @ Pu Nun Uk

Hrang Thio

Photo Cradit @ Pu Ceu Nawn

Gen.Aung San inspects Chin Hills Battalion Anti-tank Regiment

Gen.Aung San inspects Chin Hills Battalion Anti-tank Regiment

Na ruahnak