Colonel Hrang Thio le 1949 ih Ramsung Ralpi Thu – Part (2)

Home » Cahram » Colonel Hrang Thio le 1949 ih Ramsung Ralpi Thu – Part (2)

By vcth on June 19, 2014.

Colonel Hrang Thio

Colonel Hrang Thio

Salai Van Cung Lian (UK)

Union Acozah Kumpi Dodaltu dang dang pawl

Kan Kawlram pi cu 1948, January ni 4 niah mirang hnen ihsin zalennak kan rak ngah. Zalennak kan ngah pek te ah, harsatnak le buainak in a rak khat. Zalennak hman cu leiba in kan rak lak. Mirang in Kawlram ih Japan pawl a do sak nak man hmuah hmuah £52million lai cu mirang hnen ah pek sal ding a rak si. Kawlram sungah Karen, Mon le Rakhine pawl hrangah a felfaimi ramkulh nemhngetnak a um hrih lo. Karen hrang ah khal Karen State din ding in danhrampi in a lungkim pi. Asinan, Karen State cu khawitiat a si ding, khawitawk hmun pawl Karen State sungah an tel ding ticu mipithusuhnak le lungkimnak (referendum) tuah hnu lawng ih thu then ding a rak si. Mirang ral le Japan ral ih nuai theh pekte a si tik ah, sumdawnnak khal a rak har sa zet. Ramsung khal ah meithal kai in buaitu an rak tam zet. Kawlram zalennak a ngah hlan ihsin KNDO, MNDO (Mon National Defense Organization), Red Flag Communist, Rakhine Communist, Rakhine Mino Pawlkom, Mujahit pawl tiin Kawlram hmuntin ah miethal kai in an rak um zo. Ramukdu pawlkom a si mi (AFPFL) Anti Facist People’s Freedom League (ဖ.ဆ.ပ.လ) sungah tla ramkhel thu ruahnak bangawklonak tamzet a rak um.

Zalennak kan ngah hlan ihsin General Aung San homi AFPFL sung ah buainak tum zet a rak um zo. 1946 kum ah ah Communist Party of Burma (CPB) sungah mirang Union Acozah thawn pehpar aw in ruahnak a bangaw lo ruangah Takhin Tan Htun hohami Thantar rang (White Flag) tiin le Takhin Soe hoha mi Thantar sen (Red Flag) tiin an rak then aw. Thakhin Than Htun cu AFPFL sung ah um in hna a rak tuan peh. Thakhin Soe ih homi pawlkom (Thantar sen) cu July 1946 ihsin Union Acozah dodalnak an rak thok. Takhin Tan Htun hoha mi Communist party (thantar rang) pawl tla AFPFL sungah an tang nan, AFPFL hotu Gen. Aung San le mi dang pawl thawn an pehtlaihawk nak a siat sin sin. 1946 July le September thla lam ah All Burma Trade Union le Takhin Tan Htun hohanak in AFPFL ih mipi par ah namnuainak duhlonak langternak ahle lothlo tu pawl harsatnak lang ter ding ah hnatuanlo in sandah an rak piah (strike). Takhin Tan Htun cun, cui sandahpiah nak a tuah ruang ah Gen. Aung San cun, AFPFL ih sungtuan in a cawl ter hlei ah mirang pawl ih tuah mi Kawlram Acozah Council (Government Executive Council) sungah ah khal a telh nawn lo. AFPFL ih sungtuan dinhmun a si mi Takhin Tan Htun cun, lehrulnak ah tiah, hnatuan lo in sandahpiah nak a peh zulh vivo. Curuangah 1946 November thla ah Thakhin Tan Htun le a homi CPB (White Flag) cu AFPFL member sinak ihsin an suah. 1946 ah suah an si nan ramhnuai ih dodalnak cu 1948 March in an thok. Thakhin Tan Htun ih hohatnak in 1948 ah British company pawl duhlonak langternak sandahpiah nak an nei. Sandahpiah pawl ih duh nak cu mirang pawl ih uknak an duhlo ruangah le lothlo pawl ih harsatnak thei ter duh ruangah a si. Cutin hnatuan lo in, sandahpiah tu pawl cu Acozah in ralkap tha hmang in a nuai hngai. Mitampi cu hriamhma an rak pu. Cun British company ih hnatuantu pawl hnatuanlo in sandah an piah tik ah, dat-si, zinan pawl a har sa. Cetzung pawl in le thil an suah nawn lo tik ah, ramsung ah buainak a rak thleng. Cutiin an buainak a sosang vivo. Acozah le Communist party karlak ah remdaihnak tuah dingin an zuam nan a rak remcang lo. Cui sandahpiah nak an theh hnu ah culai ih AFPFL hotu le Kawlram Prime Minister U Nu in March 28 ah CPB hotu pawl kai dingin thu a suah. Cui sin thok in Burma Communist party (Thantar rang) cu ramhnuai in dodalnak an thok.

CPB pawl ramhnuai ah an um tikah CPB pawl parih duhdawtnak a rak neitu ralkap pawl hnen ah lungawilo nak arak suak. Political ideology lam ah zumdan dang lam hman seh la, ralkap, rualpi hlir an rak si. Cutin AFPFL sungah tla Burma Socialist Party le (PVO) People Volunteer Organization (ျပည္သူ႔ရဲေဘာ္တပ္ဖြဲ႔) buainak nasa zet a um. PVO cu Gen.Aung San ih rakdin mi meithalkai pawlkom an rak si. Cutin AFPFL sung ih an buai lai ah, KNDO pawl khal Karen State ngah ding in, nasa zetin an rak cang vai. Curuang ah an mah Kawl le Kawl kar lak ah lungrualnak tuah a tul tin, communist pawl thawn Left Unity Alliance (လက္၀ဲညီညြတ္ေရး) timi lungrualnak tuah ding in AFPFL, PVO le Socialist pawl in an rak zuam. Left Unity Alliance ih an tumtahmi cu communist pawl thawn rualrem ding, mirang Acozah le Kawlram Acozah pehtlaihnak mal vivo ding le ramsung thu dun le daan pawl tuahnak ah communist pawl lem nak ah, an duhnak thlun in tuah ding ti pawl a si. Remdaihnak hrangah Left Unity Alliance ih thusuah 15 cu U Nu in mipi hnen ah a rak than. Cuimi lungrualnak ziangtin kan tuah ding timi thusuah mi cu PVO sung ih hrekkhat in an rak duh, a hrek khat in an rak duh lo. Curuang ah PVO khal, then 2 ah an then aw ih PVO (White) pawl cu Communist pawl thawn kom aw in ramhnuai ah an lut ve. PVO dang pawl cu AFPFL hnen ah an rak tang. August 18, 1948 ah Burma Rifle (1), Burma Rifle (3) ih a hrek tluk le Burma Rifle (6) ih ralkap mallai cu Communist thawn kom aw in ramhnuai an an rak um. Burma Rifle (2), (4), (5) zaten le Burma Battalion (1), (3), (6) ih ralkap hrek khat pawl cu Union Acozah lam ah an ṭang. A dang tlangparmi Rifle Battalions pawl a simi Karen, Kachin le Chin pawl tla Union Acozah lam ah rinum ten an ṭang.

Ramhnuai um Communits le a ho pawl Donak

Communist party thawn ramhnuai ih a lutmi Burma Rifle Battalion (1) cu Pyi (ျပည္) khawpi an lak. Cumi pawl do ding ah Union Acozah ralkap pawl a si mi, Karen Rifle Battalion (2) le Kachin Rifle Battalion (1) cu Pyi khawpi, Communist pawl kut ihsin lak sal ding ah thu an pek. Cui Rifle Battalion pa hnih cun Communist pawl le a ho Burma Rifle Battalion (1) pawl nasa takin an do ih Pyi khuapi cu an lak thei sal. Culai fangah KNDO le MNDO pawl ih cangvaihnak khal a nasa sin sin. Culaifang ih thu pawl cu Win Tinh Htun ih nganmi “အေမွာင္ၾကားကဗမာျပည္” timi cabu sungah “August ni 3 niah Tathone (သထံု) lam ih KNDO pawl in Tathone (သထံု) peng an lak. Karen ralkap pawl cangvaihnak le KNDO ih cangvaihnak cu tisuar bangin nikhat hnu nikhat a sang vivo. August ni 4 ni ah Karen ralkap hrekkhat, KNDO le MNDO pawl in Mawlamyaing (ေမာ္လျမိဳင္)khawpi an lak suak” tiah a ngan khum. Mawlamyaing (ေမာ္လျမိဳင္)khawpi lak sal dingah Union Acozah in Kachin Rifle Battalion (2) le Lt. Colonel Son Khaw Pau ih hoha mi Chin Rifle Battalion (2) an thlah.Cui tlangparmi Battalion pa hnih cun KNDO le MNDO pawl an do ih Mawlamyaing cu an lak thei sal. Mawlamyaing le a kiangkap humhminnak hrangah Chin Rifle Battalion (2) ih Kachin Rifle (2) hnen ah tuanvo a pek hnu ah, Chin Rifle (2) cu Kyaikkhami, Tathone le Tanintayi kiangkap pawl cu KNDO le MNDO pawl kuttang ih sin an lak thei sal. 1948 September ni 17 ah, KNDO pawl cu Pathein khua ah thurel khawmnak an rak nei. Cui an thurelmi ih ah mahte uk aw mi Karen ramkulh ngah ding thu dilnak an nei. Cun KNDO hrekkhat ih hriamhrei kai ih dodalnak an lungkim lo thu thu le Kawl le Karen miphun kar lak ih buainak pawl an duh lo thu tla an phuang.

Union Acozah in communist pawl a do tikah Yangon ih um Union Acozah ralkap pawl tla raldo ding in a thlah. Curuangah, ralkap uktu Gen. Smith Dun in KNDO pawl cu khaw kiltu ah le Communist pawl donak ah khal a rak hmang. Hi thu thawn pehpar aw in Gen. Smith Dun in a cabu “Memoirs of the Four-foot Colonel” timi sungah hitin a ngan “Karen Rifle Battalion (2) cu Pyi le a kaingkap zohkhen dingin tuanvo pek a si. Yangon ih a langte rak ko mi Kachin Rifle Battalion pa khat khal cu Tathone le Mawlamyaing kiangkap ih dodaltu pawl do dingin thlah a si. Himi lai hrawngah Karen le Kawl miphun buainak khal a sosang zet. Culai fangah KNDO ralkap pawl khal nikhat hnu nikhat an ṭhang vivo. Ralkap mipum 10,000 leng an nei. Cuilangfang boruak ah KNDO cu, raldonak hrangah khal siseh, remdaihnak hrangah khal siseh hmang theih ding din hmun an rak si. Curuangah Union Acozah ralkap pawl an um lonak hmun pawl ah KNDO pawl cu khaw kiltu ralkap si ding in culai ih Prime Minister le Defense Minister a simi U Nu hnen ah thu thunlut nak ka rak nei. Cui thu thunlutnak cu U Nu tla in a rak cohlang ih KNDO pawl cu Yangon khaw kiltu ah ka rak hmang”.

KNDO pawl hnen in zumnak ngah thei ding ah tin Gen. Smith Dun in Tawntee khua cu communist kut sung ih sin lak sal ding ah a rak fial hai. Cui thu thawn pehpar aw in Gen. Smith Dun in, “An hnen in zumnak ngah thei dingin tiah, Twantee in communist pawl do dingin ka rak fial. Union Acozah hnen in bawmnak ngahlo in an mai riahcaw thawn an pok ih cutin Tawntee cu an rak lak thei. Cuhnu ah Tawntee khaw kil ding in thu ka pek,” tiah a cabu sungah a ngan. Twentee khua cu Delta region le Yangon khuapi a peh tlaih awk nak khua a si. Twentee cannal ih sin lawng pehtlaihnak a rak um, lamzin, tlangleng zin dang a rak um lo. KNDO pawl cu Twantee an do neh hnu in hriamhrei pawl Yangon ah an kuat. 1949 ah hriamhrei kim kai mi Karen KNDO ralkap 10,000 leng lo cu Yangon hram an khuar. Cutiih Karen ralkap pawl hram an khuar cu Kawl mipi in an rak duhlo.

1949 Ramsung Ralpi a Thoknak

Kawl le Karen miphun buainak, KNDO ih mahte uknak ngah ramthen nasazete in dilnak, KNDO ih Yangon kiangkap ih hmunkhuarnak, Delta kiangkap ih Karen pawl hnen in hriamhrei, Karen Rifles pawl hnen ih sin an hriamhrei meithal lon tum nak, Loikaw, Tathone le Mawlamyaing lam ih KNDO le Union Acozah ralkap pawl do awk nak pawl ruangah KNDO le Union Acozah karlak pehtlaihnak a rak siat sin sin. Cui pawl tlun ah, ramsung ralpi cang dingin lam a rak ontu riahsiaza, Acozah palik pawl in Tanintayi le Myik kar lak ih ummi Palaw khua ih Karen mi (300) lai cu 1948 December ni 24 zaan ah Christmas hmuak in an khawm lai ah, thah an tuar thu cu khal General Smith Dun in a cauk sung ah a ngan. Cui thu cu ramsung zaten ah a thang lohli ih Karen pawl hrnagah thinnatnak maktak a si. Culai ih Primi Minister U Nu a mah rori, cui Palaw khua ah feh ih a va veh vai, a si nan Yangon a thleng hnu ah “Palik pawl ih thiltuahsual nak (mistake)” a si tiah a sim tikah, thah a tuar tu inn sungsang pawl cu an thin heng sin sin. Karen le Kawl lak ah remdaihnak tuah thei nawn lo in din hmun a rak thleng. Ziangtikah ralpi a cang ding timi lawng khat lam, khat lam in an hngak.

1949 kum thok ih thil um tu daan cu Win Tin Htun in “အေမွာင္ၾကားကဗမာျပည္” timi cabu sungah, “1949 ah KNDO pawl Insein kiangkap ah an cangvai thok. Karen tam deuh umnak hmun pawl ah ral hruang pawl an sak, lei khur pawl an lai. Cuti dinhmun a si ruangah Ministry of Home Office ih thunei U Kyaw Ngein in dinmi Sittu Wunhtan (Burma Police Act 1948 tang ih, palik ayan hrang ih rak din mi) pawl in Bank pawl le Sumpai khalnak inn pawl an va kil. Cutiih Sit Wunhtan palik pawl an thlah cu KNDO lam in an duh loih an pahnih karlak ah doawknak a rak cang phah. KNDO upa lam le Union Acozah pawl remdaihnak hrang tonkhawmnak tla an nei ruri nan an remcang lo. January ni 16 ni ah Bo Saw Jake (Karen) ih hohatnak in Burma tiralkap (Navy) ta lawng pa (2) lak in Union Acozah doding in an timtuah. KNDO ralkap 2,000 tluk khal in Pathein khawpi an lak. Taung-ngu ih Karen Rifle Battalion (1) khal in Union Acozah dodal in Taung-ngo cu January 27 ah an lak. January 30 ah Insein kiangkap a simi Tamine, Kha-wai-chan, Sawbuagyi kung pawl ah doawknak a thok. January 31 ni ah Kawlram thunei tu pawl, General Smith Dun le KNDO pawl, dodalnak thawn pehpar in thurelkhawmnak an nei,” tiah a ngan.

1949 January 31 ah Kawlram santhuanthu ih roling Insein ralpi a thok. Cui ni ih thu Gen Smith Dun in“1949 January 31 ah Yangon ih Karen pawl umnak hmun ah danlo ih ngah mi meithal pawl hawl ding thu a thelng. Chin Rifle (Chin Rifle 1) in cui hmun pawl ah meithal cu an hawl. Meithal zun 7 an tong ih zuun 5 cu license nei an si. Cui sun cu tluangten a cem nan zaan cu a linglet in thil a cang. Jan 31 zaan tim ah Kawl ralkap (UMP) Union Milatary Police (ျပည္ေထာင္စုစစ္ရဲတပ္ရင္း) pawl cu Karen pawl umnak hmun an kulh thluh ih, an kap. Cutin nazi 2 sung Inn tam pi mei a kang hleiah nauhak le nunau pawl tampi an thi. Sun a rung thleng cun, Thamaing ih Karen quarter cu buainak a sangbik a thleng lai fang a si. Karen tlangval pa pakhat cu Mingaladone a hnatuan nak lam a feh lai ah, UMP in canglo ding in an auh. Cui tlangval pa cu bus parah a kaitum zawn ah, meithla voi (3) an puah. Cutin, Bus khal a tlan vurvo. Cuih, voi (3) a kap mi awn cu, hmun dang ih um UMP pawl hrang ah kahnak signal ah an ruat, ih Karen quarter pawl cu an kap ciam co. Cutiih thilcang cu Karen ralkap pawl in an unau pawl run dingin a rang thei tawkin Tamine lam ah an ra”tiah a ngah.

Cui ni ih thu cu Brigadier Kyaw Zaw khal in a mai thuanthu cabu sungah“Thuthang vekin Insein ralpi cu January 31 zaan ah a thok. Cui zan ah Major Soe Yah, Lt. Nguint Win, Lt. San Hla Baw, Lt. Kyaw Din pawl ih ho mi UMP Batallion pa (4) pawl in Tamaing le Karen quarter cu an kulh ih, meithal thlak dingin thuanpek. Cutin, meithlak thlak duh lo in Kaikkala ihsin Insein lam ih tlangleng siat pawl um nak tiang doawknak a suak. UMP in Naaga, Thurihyah, Shwepyiee tiih kohmiသံခ်ပ္ကာကား pa (8) in an do thok. Feb ni 1 ah cu Kayinkung ah an do awk ih KNDO pawl khal in nasazet in an do ve. Cutin, Karen dodalnak cu a thok suak”tiah a sim.

Kawlram ralkap hmauhhmauh hotu General Smith Dun cu KNDO pawl Yangon kiangkap ih hmunkhuar ding in a tawl rel tu a rak si. Cun, KNDO pawl Yangon kiangkap ah buainak an suak ter lo ding tin Union Acozah hnen ah thukamnak a rak pek. Cutin, KNDO ral a tho ve ten, General Smith Dun cu suah a si ih, Brigadier Ne Win in February ni 1 ah a sawng. General Ne Win a kai ve ten, Kawlram thlanglam ralkap hotu Brigadier Aung Thin cu a suah ih Kawlram saklam ralkap hotu Brigadier Kyaw Zaw cu Insein ral do ding ah thu a rak pek. Brigadier Aung Thin cu KNU hotu Saw Ba Oo Gyi thawn UK ah tlawngkaikhat an rak si hleiah, rualpi an rak si. Gen Newin hnatuan a thok ni (February 1) ihsin Maymyo ih Karen Rifle Battalion ih meithal pawl an longih ralbawi pawl cu ralkap tlawng ah a kuat. Karen ralkap pawl khal Engineer ralkap ah an kuat. Mandalay ih Karen Rifle Battalion (3) ih meithal pawl an rak lak sak thluh. February ni 2 ah KNDO in Insein an lak fel. Karen Rifle Battalion (3) lakah pa (2) in an dodal in Battalion 3 (Loikaw ih kuat mi ralkap pawl siar lo) cu an meithal an rak long sak thluh.

Karen Rifle Battalion (1) cun KNDO pawl in Insein an lak hlan, January 27 ni ah hram an khuarnak Taung-ngo an lak. Cu vek thiamthiam in Karen Rifle Battalion (2) khal in hram an khuarnak Pyi khua cu February 4 ni ah an lak. Cui Rifle Battalion pa 2 cu Insein ih KNDO thawn kom aw in Yangon khawlipi lak dingin Yangon lam an pan. Cutiih Yangon lam an pan lai ah Burma Rifle Battalion (3) le (6) in an rak kham thei. Cutin, Yangon ih an fehsuak thei lo ruang ah Kawlram salklam lak ding in tim an rak tuah.

Chin Rifle Battalions pawl le Ramsung Ralpi

1948 kum cem lam ah Meikhtila ih hramkhuar mi Chin Battalion (3) ih Company hrekkhat cu Kayah ih buainak daihter ding ah tiah Liokaw ah an rak kuat. Cun Karen Rifle Batallion pawl holiday lakin an um nak hmun lam an rak tlung tik ah, an meithal pawl nan rak long ding tin, tlun lam in thu an rak pek. Liokaw ih um Chin Rifle (3) company in an meithal pawl lon an tum tik ah, Karen Rifle pawl khal in an pek duh lo. Cutin, KNDO le Karen Rifle kom in Chin Rilfe (3) company cu an rak kap. Mi hrekkhat an thi, mi hrek khat kaih an tuar. Himi thu phishin nak ding ah PM U Nu cu Brigadier Saw Kya Doe a rak fial. Saw Kya Doe ih tawlrelnak in Chin ralkap kaih a tuar mi pawl cu an thlah sal, a si nan an mei thal pawl an pek duh nawn lo. Ramsung ralpi a thok ni ah khal Chin Rifle Battalion (1) cun Karen pawl umnak ah meithal licence nei lo pawl an rak long. Chin Rifle Batallion (2) khal ramsung ralpi a thok hlan ih sin Communist le a ho pawl, KNDO, MNDO pawl thawn an rak doawk.

Col. Hrang Thio cu mi dingfel, miziazatha le titsa nei zet a si. Amah cu ramdinkhawm Union Acozah parah titsa nei zettu a si vekin Union Acozah lam lawngin ka do ding tiah thu a then cet. U Ceu Nawn ih nganmi Hrang Thio ih thuantu cabu sung ah “Kei ih Batalian cu Acozah ih hnatuan kan si sungah Acozah ih raal a simi Kawl, Karen le a dang zovek miphun khal va sisehla ka do ding a si” tiah Hrang Thio ih a sim tin a ngan. Chin Rifle Battalion (1) ah ralkap rak tuan dah cu Sargent Pu Za Thluai khal in ‘Lt. Col. Hrang Thio (B.G.M) le Kan Kawlram’ timi cahram sungah 1949 February thla ah Sales Barracks ih kan Batallion zung ah tuanvo ka nei. Zanlam sml 5:00 hrawngah phone a ra. Phone ka kai ih, “Saya Ba Than ka si, nan Batallion ih Commander Office Col Hrang Thio biak ka duh,” tiah a ti. Kei tla Col Hrang Thio inn ah phone line ka peh sak ih cutin an biak aw. “Saya Ba Than ka si, 8th Miles Stone Kokine lansone in ka lo biak. Tuzaan KNDO pawl in Rangoon kan lak ding, ziangtin na ruat” tiah a sut. Col. Hrang Thio cun, “Rangoon nan lak thei lo, Kan lo kap ding,” tiah a sawn’ tin a ngan. Cule Sargent Pu Za Thluai cun Cozah ralkap pawl ziangtin hna kan tuan ding tiah an ruat, khua an khang. Culai ah Lt. Col. Hrang Thio cun, “rawl in pe uh, ziandawng le cerek in pe uh, Kawlrampi thantar cu 1st Chin Riffles in kan phur vivo ding. Acozah ral pohpoh cun kan kap ding,’ tiah a ti tin khal a ngan.

Chin battalion 1 ih ralkap a rak tuan dahtu Captain Than Tawng cun Pu Ro Dinga thawn Hrang Thio thu an relnak ah, Captain Than Tawng in hitin a rak sim. “Nikhat ah Commanding Officer Hrang Thio in in ko ih, KNDO pawl thawn kan doawk thlang ding. Nan za ten nan theih dingmi cu Karen pawl cu Kawl pawl hnakin an raltha. Raltha zet mi ralkap pawl thawn kan do aw thlang ding”. {Captain Than Tawng cu Homaline Myone ah Council Chairman rak tuah dah tu a si. Pu Ro Ding ah cu 1990 Kalaymyo MP, Pu Do Thawng ih fapa a si ih, Chin Forum ah Assistance Co-ordination ah a tuan lai fang a si.}Chin Rifle Battalion (1) le Lt. Col Hrang Thio cun, ramsung ralpi thu ah an dinhmun a fiang zet. Union Acozah ih ral poh poh do ding in an ready ring ring. Chin Rifle Battalion (2) khal ramsung ralpi thok hla in KNDO le MNDO pawl thawn an rak do aw rero zo. A si nan, Chin Rifle (3) cu a laikah ah din an rak tum lawk.

Himi thu hla thawn pehpar aw in Dr. Vum Son ih ngan mi Zo History cauk sungah “Chin Rifle Battalion tuanvo nei tu pawl (Chin Rifle 3) cun Kawl le Karen lak buainak cu an mahten thuthennak tuah ding in a mawi tiah an rak ruat. Union Acozah parah rinum zet in an um duh ko nan, Karen pawl cu an rualpi tla an si thotho. Mirang ralkap pawl le Karen pawl thawn Japan ral an do tlang. Cummunist le a ho pawl le ramsung ti buaitu pawlkom phunkim an rak do tlang. Curuangah Chin ralbawi a simi Colonel Dal Za Kam le Lieutenant Colonel Lian Cin Zam (Chin Rifle 3 Batallion Commander) pawl in khawilam hman tang lo in, a lailak ah din an rak tum. Cutiih KawlUnion Acozah tan lo dingin a dang thuhla pa khat a rak um. Pegu ah Chin ralkap pahnih cu Kawl ralkap in mawn mi Jeep in a pah that hai. Cui thil cang cu Chin ralbawi pawl in tlun lam ah thu an thlen nan zianghman dantat nak a rak um lo. Cui thil cang cu Chin battalion 3 in Union Acozah lam tello dingin thu an thencetnak ih a bawmtu pakhat a si” tiah a ngan.

Karen Rifle Batallion pa (2) in le KNDO thawn komaw in Union Acozah an do. Bo Naw Sai ih homi Kachin ralkap hrekkhat khal in KNDO thawn kom aw in Union Acozah an do. Cutik ah Union Acozah ih Chin Rifle (3) ih bawmnak a tul. Lt. Col Lian Cin Zam ih homi Chin Rifle (3) lailak ah um in, Chinram ah an tlung tum thu U NU in a theih ve ten, Brigadier Kyaw Zaw le Paliament Secetary Captain Mang Tung Nung thawn, an um nak Pegu ah an va feh lohli. Cui thu cu, U Nu ih a mai thuan thu ngan mi “Tatay Sanay Thar” timi cabu sung ah “KNU/KNDO pawl ral ah tho hlan ah Kaya ih kan thlah mi Chin company pakhat cu KNDO pawl in an rak do. Kei mah rori nih Brigadier Saw Kya Doe ka thlah ih ka va sim ter ruang ah KNDO pawl in Chin ralkap pawl ih meithal pawl an long ih, minung pawl an thlah sal. Cui mi Chin ralkap pawl cu Yangon ah kan ko sal ih meithal a thar kan pek sal. Cumi Chin company ih hotu cu a thinbang in, Pegu front ah ral kado nawn lo ding, ka company pawl ka ko ding ih Chinram ah ka tlung ding tiah a rak ti. Pegu front cu a thupi tuk mi a si ruang ah cui Chin company pawl in raldo lo in, Chinram ah an tlung a si le rampi a kuai thei mi dinhmun a si. Hithu ka theih veten Kyaw Zaw le Mang Tung Nung ka koi h Pegu ah kan pok. Pegu fehnak lamzin cu Union Acozah a dodal cu Communits le PVO (White) pawl ih kutsung ah a um ruang ah, World War 2 laiih an rak tuahmi vanzamtual ah ralkap hmangmi vanzam thawn Pegu khua kan lan ih, Pegu thawn peng (15) hrawng a hlat nak ah kan va feh. Cuihmun, Pegu front ah cu thinbang in phurlemlomi ralbawi pawl kan va tong tikah “kan Union pi cu Tapung pawl ruang ah harsatnat naszetin kan tong. Himi harsatnak sung ih luatnak dingah nannih Chin ralkap pawl kan lo rinsan. Cutin kan lo rinsan laiah, nan nih Union pi humhim loin Chinram ah nan tlung le Union pi khal harsatnak ihsin a luat thei lo ding. Nan mah Chin ralkap pawl khal nan hmin a sia ding. Nan nih Chin ralkap pawl cu ram hrang ah nasa zetih tuan, raldo tu, miral tha, titsa nei mi pawl tin nan hmin thangnak khal a hlo ding ti nan mah nih tla nan thei ko. Nan sinak, miih zohthimtlak nan sinak khal a hlo ding tiah ka sim hai. Captain Mang Tung Nung khal in nasa zetin a lem hai. Cuhnu ah Chin ralbawi pawl cun Chinram ah kan tlung nawn lo ding. Hitawk ah titsa nei zet in Union pi hrang ah ral kan do ding tin tiamkamnak an rak pek. Ka lung awi tuk ih, a hmun rori ah paisa Ks-5000 laksawng ah ka then hai. Asinan, cui ka then mi cu nehhnu lam ah ka sir awk zet sal” tiah a ngan.

U Nu ih Chin ralkap pawl hnen ih paisa pek thu cu hmun dang ah a thang ih, ralkap tam pi lungawilonak a suak ter. Cutin, Chin Rifle (3) khal Kawlram pi uktu Prime Minister U Nu ih nasazet ih a dil hnu ah Chin Rifle (1) le (3) vek in KNDO ral do ding in an rak timtuah. Asinan, Acozah in anmah le Chin Rifle (3) karlak ih a rak um mi thil umtu daan cu a hngilh lo. Rampi uktu Prime Minister rori ih zaangfahdil mi dinhmun hi Kawl Acozah in a hngilh lo ih Chin Rifle (3) Batallion Commander cun nehhnu ah a tuar sal leh. Ral a theh hnu 1956 ah Yangon ih ralkap sizung ah rinlopin Lt.Col Lian Cin Zam cu a nunnak a rak liam. A ruak cu Kalaymyo ah phur ding a rak si nan, Kawl Acozah in an vanzam hman an rak siang lo. Amah thawn thei aw tu, a rual pi Burma Oil Company ih Managers pawl in an mah private vanzam thawn a ruak cu Kalay ah an phur sak.

Insein Raldonak

1949 Feb 10 ni ah Brigadier Kyaw Zaw cu Insein front ah a rak thleng. Insein ral do ding ah Chin Rifle Batallion (1), Kachin Rifle Batallion (1), le Sittwe ihsin a zanzan ih cah mi Burma Rifle (5), Kachin Rifle (2) ihsin company hrekkhat le UMP Batallions pawl an si. KNDO pawl khal Feb 2 ni ih Insein an lak thluh ih, Acozah ralkap pawl ih doding hngak in an timtuah ve. February ni (19) ihsin Burma Rifle (5), March thla zarhhnihnak ihsin Chin Rifle Batallions (2) le (3) khal Insein raldonak ah an rak tel……

Peh lai ding …… (Netabik part a tang lai ih, cumi cu thlacem ah kan rak tar leh ding.)

Hminsin:

Some of the most prominient chin leaders of first generation inside Burma timi “Zuk in pek tu Pu Thang Za Dal hnen ka lung awi. A mah khal Dr. Huat Za Mang in a rak pek mi a si”

Rifle 2 officers pawl zuk hi  http://thawngno.blogspot.co.uk/ ta lak mi a si.

Culodang Zuk hmuahhmuah cu Falam ih um Pu Nun Uk ih siannak in kan suah mi a si. Zukpawl in hawlsak tu Za Sui hnen ah lungawinak tampi kan nei.

Na ruahnak