Daan An Tat Tikah

Home » Cahram » Daan An Tat Tikah

By vcth on November 18, 2012.

Daan an tat tikah

Sualnak tuah (or) daan pahbal, a silole sual tuah tu (or) daan pah bal tu cun taksa tuarnak in maw, tangka cawhnak in maw daan tat ding hrimhrim a si. Hlanlai ahcun daan an tat tik ah phu laknak hi a thu pi bik in an rak ret. Tui’h kan san ahcun cuih ruahnak pawl hlon ta hrat in zirhnak pek lam pang in an feh pi vevo thlang.

A tuar tu cun phulak duhnak thinlung thawn daan tat ding in an dil men thei nan a cozah cun sual tuahnak pawl kham thei ding sawn hi a thu pi ah a ret. Phulaknak thawi’h daantat hnak in ruahnak (or) fimnak zirh lam pang in sualnak hi a kham thei sawn.

Daan tatnak ih a thupibik cu sualtuahnak pawl kham theinak ding a sivek in ziangzat tiang daan kan tat ding timi cu tikcu caan, hmun le thil um daan dangdang pawl zoh khawm ih ruahsak ding a si. Sualnak pakhat hrangah veikhat hnih cu zohtthim tlak ding rori ih daan tat a ṭul ko nan cu ti ringring ih daan tat ding cu a si lo. Daan tat tik ah luarzet in daan tat seh la a tuar tui’ hrangah thinnatnak a suah ter ding ih hmuitin mi ngaingai thleng lo in lam a pial thei. Sualtuah tu kha a ṭul mi hnak ih tam deuh thawng sung khumnak in, cu pai’h sunralnak lawng si lo in a cawhtu khal mi sia va a hlawh cih a si. Mi pi khal a sung ih acozah pi hrang khal ah rawl cawmnak ah tam pi a cem ve. Culawng si lo in a innsungsang pawl thil rit phur ter thawn a bang aw ding.

Daantat tikah sual tuah tuih parah huatnak thawn thu ṭhen ding a si lo. Mi dang pawl sual tuah ngam hlah seh ti ih khihhmuh duhnak le sual tuahtu hnen ah sual tuah nawn lo ding in zirhnak tel cih ding sawn a si. Caan rem cang a um tikah sual tuah tu kha a rim ding (or) ruahnak pek ding zat pek ngah zo ti in zumnak neih le ve in kai ṭem nawn lo in a innsungsang, a maih hawikom (rualpi) pawl hnen ah mi ṭha pakhat dinhmun ih ding thei salnak ding in tawl rel sak ding a si.

Daantat tikah sual tuahtu par ah huatnak, phulak duhnak sawn si lo in ruahnak, zirhnak lam sawn her ih feh pi ding a si. A dang lam in sim sile cuih daantatnak in sualtuah tu kha tui’ hnu sual tuah nawn lo ding in, cuvek thotho in sualtuah tum tu pawl hrangah khih hmuh cianak sawn a si ding a thu pi. Cuih daan a pahbal le ziang daantat ding ti ih kai fekfek ding a si hrimhrim lo. A thuhla um daan, a tikcu caan, sual a tuah mi par ah zoh in daan a tam a mal tat ding a si. Curuangah sualtuahnak ah daan ziangtin tat ding ti ih an ngan khum mi cabu pi sungah sual tuah phun mal te siar lo cu a malbik ziangzat ti in ri kaih sak mi a um lo. A tam bik ziangzat tiang ti lawng an ngan.

Ziangah tile thuṭhennak zung in daantatnak ah a parlam ih sim zo bang in thil um daan, sual tuah phun le a dangdang zoh khawm in thu an ṭthen theinak ding ah a si. A dang lam in sim sehla daan tatnak ah thu ṭhennak zung ih hmuhdaan kai hnget ih thu an ṭhen theinak ding ah a si. Curuangah hmuhdaan kai hnget in a ṭul le a ṭul vekin ṭhum asilole ṭhan ih daan that ding a si. Ri khaih cia theih a si lo.

Daantatnak ih a thupibik mi cu sualtuah tu kha rim in, acozah hrang ih fanu, fapa ṭha din hmun in, ra kir sal ih nun thar in a um thei sal ding hi a si. Thil pakhat a tuah sual ruangah thawng tla seh ti men lawng a si lo. Daantat tikah sual tuah tu ih nuntu khuasak daan, a um daan, a ruah dan pawl le a ra lai ding mi a hmai lam caan ah innsang, kiang le kap le rampi hrangih a ṭhahnem mi a si theinak ding tumtahnak thawn dantat a si.

Naunaute

Na ruahnak