Democracy 3

Home » Cahram » Theihkauhnak » Democracy 3

By vcth on February 16, 2014.

Democracy

Lungbawk brother

Political Parties
Milai canpual humhimnak leh zalennak ti siat lo dingin mipi cu kumpi cangvaihnak hrangah hna an ṭuan tlang a ṭul. Cu tin hmunkhat te ih cangvaihnak neih theinak dingah cun political party din a ṭul.

Ramkhelhnak pawlkom (Political parties) pawl cu an mah te lungtho ih dinmi pawlkom an siih, mipi leh hruaitu pawl pehtlaihawknak olsam tertu pawlkom khi an si. Cu pawl cun hnaṭuan tu an hawlih, an pawlkom a cah hnu ah ramhruaitu si dingah hrilawknak ah an zuam. Mipi khal kumpi hruaitu hrilawknak ah telve dingin thazang an pe.

Cutin acozah an ngah asile, an Policy, hnaṭuan ding ih duhdan a neihmi pawl daan ih cang ter ding ah hma a la. Cumi dotu pawkom (opposition party) pawl khal in majority party pawlih tuah tummi thuhla, ruahnak cu zalen zetin an sawisel thei ih an mai duhmi leh ṭha timi sawn kha tuah dingin thu an bur thei.

Cuih pawlkom pawl cun mipi in palai (MP) hrilnak a tuah tikah a felfai zetin zumtlak leh rinsantlak hrilawknak a um theinak dingah hma a lak sak.

Cumi pawlkom pawl cun, an mah party ih thuneihnak an co ngahlo hmanah mipi hrilmi pawlkom pawlih thuneihnak an ngah tikah, an lungkimpi in an pomsak ih hleiah democracy dan le dun pawl khal an thlun ringring.

Democracy vek thotho in, cuih pawlkom pawl khal cun an danglamnak tete cu an umnak hmun leh tlang zir in an nei. Pawlkom caklo fate zetzet tla an tel thei. A ṭhen cu mipi thawn khal in pehtlaihnak nei lemlo, hrilawknak caan lawng ih ra suak dukdi pawlkom khal an um. A cakzet mi, sumpai lam khal a nei ih ṭhate’n din mi pawlkom khal an um thotho.

Cuih pawlkom, a tum maw a te maw an si khal le, pakhat leh pakhat zawi-awiawknak leh thulai ṭhen in um tlang, hnaṭuan tlangnak an nei. Pawlkom dang thawn ṭanpiawknak leh ṭuantlangnak thawn lawngin mipi kaihhruai theinak leh mipi duhmi pawlkom a cangthei timi khal an kai hnget fefe.

Pawlkom tampi cun political views cu thleng theih mi asi ti an pom bakah, zapi lungkim tlangnak cu remdai zet le zalen zet ih mipi thureltlangnak ihsin ngah a theih asi ti khal an feh pi.

Hrilawknak ih a tlinglo tu pawlkom cu, a tlingtu pawlkom dodaltu (opposition party) ah an cang. Dodaltu, kalhkeh tu pawlkom siseh, a nehtu (Cozah) pawlkom khal in democracy ih thuhram a neihmi: zalen zet ih sim theinak, dan hnuai ih bangran te’n um theinak pawl cu an fehpi veve ko. Cutin, ṭumkhatnak ih a tlinglo tu pawlkom khal in zalen zetin an ruahnak kha mipi an simih, neta ah an pawlkom in mipi lungkimnak (Vote) tam deuh a ngah theinak ding khal zuamnak caanṭha an nei ringring.

Democracy ahcun, political parties pawlih doawknak cu pawlkom dang pawl kha hlonhloh thluhih mah lawng tang dingih zuamawknak siloin mipi hrangah zo pawlkom hi riantu ṭha sawn asi thei pei tiih zuamawknak sawn a si.

Na ruahnak