Democracy 4

Home » Cahram » Theihkauhnak » Democracy 4

By vcth on May 5, 2010.

Lungbawk Brother

Mipi ṭuanvo

Mipi neih mi ṭuanvo hi democracy ram ih um mi hmuahhmuah, Laimi pawl in a hleice ih kan theih le thlun ṭul zet mi a si. Democracy ram ahcun mipi hrilmi kumpi cozah cu mipi rian dingah dinmi a siih, mipi khalin kumpi tuahmi daan thlun ding le tlanghna ṭuan ding cu an ṭuanvo a si ti an theihthiam a ṭul. Democracies ahcun mipi hi zalen zetin ret an siih, mai duhnak vekin ruahnak dang pu (Dissent) in a um thei bakah cozah ṭhatnak, ṭhatlonak cu a hmuhdan vekin zalen zetin faksel theinak a nei.

Democracy ahcun, tlang hnaṭuan khawm le khawlak tlandan thiam a ṭul bakah thinsau khal a ṭul.

Democracy ramih a ummi pawl cun zalen zetih thil ti theinak an neih lawng si lo in an liang parah ṭuanvo tampi a ṭhum aw. Democracy hngetkhoh din thei ding cun tikcu can a heu bakah taima zet ih hnaṭuan a ṭul a si ti khal an pom. Acozah milai pawl cun mipi hnenah an lam ṭang ringring ding leh cozah thawn bawm aw ton ding an ngen ve.

Ṭhenkhat democracy uknak hnuai ah khawtlang ṭuanvo pawl cu: thuṭhentu (jury), a si lo le kumtiam ralkap ih lut (conscription) tengteng tivek an si. Dan thlun, siah pek, hotu thulung, midang in a danglam mi ruahnak an neih tik khal ih upat sak thiam leh acozah thuneihnak hnuaiih um, ti pawl hi democracy uknak hnuai ih um mipi pawl ih tuah ṭulmi ṭhenkhat pawl an si.

An canpual humhimsak a si ih, mipi lam khal in khawtlang ṭuanvo pawl cu an liang par ah an phurh tengteng a ṭul ve. Cucu, mipi ṭuanvo kan timi a si.

Ṭong ṭhimnakah: Cozah kan neih mi hi kan mai phu-tawk an si. Democracy a hlawhtlinnak dingah mipi cu an theihmi le an tuah theimi pawl hmang in nasa takih cangvaih a ṭul a si. Ziang ruangah ti le, Acozah tuahmi parih hlawhtling le tlinglo cu an mai liang parah a ṭhum aw ruangah a si. Cuvek thotho in, cozah khalin mipi cu bangrep te’n a zoh dingih nawhthuh (Bribery) pekawknak cu democratic government ah khua a luah thei lo a si timi an theih a ṭul fawn.

Democratic ukawkdan ahcun hotu parih lungawi lo an um a si le thlakthlengnak nei thei dingah zalen zetin hmalaknak an nei thei ih, cuih tlunah an duhlo mi hotu pawl cu hrilawknak ah tling nawn lo dingin thianghlim zetin tuah an zuam thei.

Democracy ahcun mipi ih theihpinak leh an tikcu can seng-in mi tamzetih lungtak te’n an ṭuan lawngah buainak um lo te’n an feh tlang thei ding. Cuih mipi pawl cu kumpi in an canpual leh an zalennak pawl a humhim sak ve thung.

Mipi cu an duhmi pawlkom ah an lutih an hrilmi hotu pawl tling dingah campaign an tuah sak. An party in thuneihnak a nei ringring lo ding ti khal an thei cia.

Zalen zet in kumpi hna an ṭuan theiih, zalen zetin khawlai leh khawtluang thu than dingah radio, zuknung cuang pawl an hmang thei.

Labour unions, vengsung pawlkom le pursum leilawnnak ah an tel thei. Mimal tuahmi pawlkom pawl, biaknak lam, nunphung, zirnak, lehnak, kutthiam, calai, khawtlang ṭhansonak, leh a dangdang cangvaihnak ah an tel. Hih pawl hi, acozah thawn pehzawmaw mi leh pehzawm aw lo mi khal sisehla, democracy ukawknak hrangah ṭhatnak an suah pi thluh a si.

Na ruahnak