Democracy 5

Home » Cahram » Democracy 5

By vcth on July 28, 2010.

Lungbawk brother

Canam Zalennak (Free Press)

Democracy ahcun, cabu suah siannak cu acozah thuneihnak hnuaiah kaihbet in a um dah kel lo. Cozah khal in hih thuthang ca pawl leh a ṭuantu pawl hnenah acozah duhdan lawnglawng ih tuah ding ah a fial theilo ih hlei-ah, acozah thuneihnak hnuai ih an umnak ding hrang ah, mitṭhep lo ih anmah a zohthup tu ding hnaṭuan tu a dang te’n a nei thei lo. Canamnak (Press) pawl cun cozah nembetnak hnuai ah siloin mipi in an ca suahmi a sung thuhla cu a sinak vekin phuangsuak theinak can ṭha an nei theinak ding ah an si.

Canam zalennak cun mipi hna a vang ter ih hruaitu pawl rintlak ah a can ter phah ih tlunah khawlai le khawtluang thuhla reltlangnak, tititlangnak, elawknak hmunpi khal a si cih.

Democracy uknak pawl cun an ram ah canam zalennak (free press) a um theinak dingah thazang tampi an pe. Dan tuahtu, dan hnuaiih ummi mipi pawlkom le zalen zetih mah duhmi sim theinak pawl cun free press um theinak ding hrang kha thazang an pe a si. Free press lak hloh a si lonak dingah acozah daan in a kilhim a ṭul tiin an ruat.

Hih Democracy thawn ukawknak ram ahcun acozah khal in an tuah zo mi thil parah rinum zet in ṭuanvo an la ngam. Cu ruangah mipi khalin an mah aiawh in cozah ih thuthluknak a tuahmi pawl theih ringring an beisei. Cu tiih, acozah ih thuhla pawl mipi ih an theihtheinak ding hrangah, a tlunih kan simmi canam zalennak (free press) cu mipi pawl thu theitertu (informant) ah a cang. Cutin, acozah ih hnaṭuannak ah a thlingthla ih, acozah rinum te’n a um theinak dingah mipi lam ṭang in cozah policies pawl sut fiang tu dinhmun-ah a ding.

Himi pawl tlunah, Democratic cozah pi cun journalists pawl mipi tonkhawmnak ah tel theinak le mipi hrang a thupi mi ca pawl zalen zet ih suah theinak a pek. Journalists in ziangvek ca a suah ding ti le ziangvek in thu a sim ding timi parah cozah in rikhiah (Restraint) theihnak a nei lo.

Cutiin, press khal in a casuah mi pawl ihsin diklo mi le tuahsualnak a um pang a si khal le mawhphurhnak a lak ve a ṭul. An tuahsual pang mi ruangah, pawlkom pakhat hnen in si maw, anmah sung lala ih zohfel tu pawlih nunsimnak an ton tikah an tuahsual mi a si le ṭuanvo an la ih, simfiang ṭulmi a um a sile thu um dan mipi hnenah simfiangnak an nei. Cu tiin, an hnaṭuannak ah rinum an sinak cu an dinpi ringring.

Democracy ahcun mipi in duhhrilnak le thuthluknak an neih a ṭul tengteng ṭheu. Mipi in thuthang an theihmi an zumhnget theinak dingah journalist pawl khal in rintlak thutak le an mah palai pawl ih an hmuh ton rori mi lawnglawng an phuan tengteng a ṭul. Midang ruahnak laksak le thudiklo phaun cu free press hrangah ṭhatlonak a suah pi sawn a si. Hi tiin dikfel zet in an feh theinak ding ahcun, anmah lakah zohfeltu an neih a ṭul ih, cu pawl cu an casuah ding mi zohfel lawng siloin an thuthang pawl kha cozah lam in a ṭha an ti dan in an rem (Edit) sak lo nak ding ah ṭuanvo la tu ding an si.

Cule Journalists pawl khal mipi duhnak lam hawi zawng in feh sawn loin a dikbik tiih an ruahmi thuhla an theihdan vekin phuang sawn ding an si. Ziang ah ti le, Democracy ahcun press cu thuneitu pawl ṭih ṭul lo in le cozah duhzawng le mipi duhzawng siloin zalen zet in thuthang an phaung thei a si. Thudik an phuan ruangah mipi lam in siseh, cozah lam in siseh silo piin mawhphurhnak an pek thei lo.

Cu ruangah, Democracy uknak ah free press thawn pehpar in acozah ih buaipi zetmi cu, a ṭuanvo a simi mipi humhimnak le, mipi ih theihṭul mi hmuahhmuah cu journalist pawl ih sim vekin an theih tengteng ding a si timi karlak ah a buai zet ṭheu. A san cu, a cozah khal, mipi in himi zat lawng an thei le a ṭha sawn ding tiih an ruatmi thuhla a rak um ṭheu tikah le free press a um ṭul tikah khui mi sawn tha kan pek ding, humhimnak maw ri-khamnak? Culak laiah, journalist pawl cu a sia a ṭha ziangvek thu hla khal an theihmi vek in an phuang khal a sile an parah mawhphurhnak pek an si lo.

Na ruahnak