Democracy 6

Home » Cahram » Theihkauhnak » Democracy 6

By vcth on August 4, 2010.

Lungbawk brother

Federalism

Ṭong, zumnak, biaknak le nunphung bangaw lo mi miphun dangdang daanhrampi pakhat (Ram khat) sungah hmunkhat te’n um tlang an duh tikah a thupibik ih an ruah mi cu, an zate’n bangrep in covo an ngah theinak ding ah a si. An khuasung ah siseh, pursum leilawnnak ah siseh, pawlkom dangdang khalah midang thawn bangrep in cozah in a zoh ding kha an duh bik a si.
Federal system hmangih ukawknak acozah pi cun, thuneihnak hmuahhmuah cu hriltlin mi cozah hnaṭuan pawl hnenah a ap. Cuih cozah hnaṭuan pawl thuneihnak cu ramṭhen le khuasung pawl an huap ṭheh. An nih cu rampum huap acozah pi thawn kutzawm in ram le miphun hrangah hna an ṭuan tlang.

Cutin an ṭuan tlang lawng siloin, kumpi acozah cun, ramṭhen acozah le vengsung acozah thawn thuneihnak an hlawm aw (Shared) ṭheu. Ramṭhen pakhat a silo le, khuasung pakhat ah cozah in thuthluk a ṭul tikah, rampum huap acozah pi in buaipi lo in an mah ramṭhen lole khausung acozah hnenah zalen zetin thuthluknak an tuah thei dingin thuneihnak a pek.
Hitin thuneihnak a pek ruangah, vengsung le khuasung mipi pawl cu an ram hrangah ṭuanvo an neih zia le an tel ve a ṭul zia an thei awk sinsin ih, an mah te’n rikhiah -thuneihnak an nei ti khal an thei awk.

Daanhrampi (Constitution) in federal system ih ukawknak cu a hngetkhoh ter ih, ramṭhen le ramsung ah ziang ti vekin thuneihnak an ṭhen aw ding timi khal hih daanhrampi sungah a tel cih.

Vengsung cozah cun an mah vengsung ih ṭul mi a tuahsak thei a ṭul ti cu mi zapi pom daan a si ko. Asinan, thuhla ṭhenkhat cu rampum huap acozah ih thuneihnak hnuai-ah an um. Cu pawl tla cu: ramdang pehtlaihnak, acozah sumpai, rampi humhimnak le carek pawl an si. Himi pawl hi ramṭhen tin le khuasung tin ah a um mi an si ko nan rampum huap cozah pi ih thuneihnak hnuai ah an um.

Khuasung daan ṭhenkhat cu khawsung mipi duhdan in a si deuh. Ṭhimnakah, Palik, meisa kiltu (Mii-tat), tlawng uknak, khawsung harhdamnak tivek pawl cu vengsung cozah kutah an um.

Cozah pakhat le pakhat pehtlaihawknak timi um zia cu, acozah pawl a si mi, rampum huap, ramṭhen le khausung cozah pawl hmun khat te ah hna an ṭuan tlang mi khi a si. An nih cu, upadi ih um cia mi kha hmunkhat te ah an rel tlang a ṭul caan ah lungrual te’n hna an ṭuan tlang ṭheu. Hivek caanah, cozah pakhat le pakhat karlakah buainak le thu-elawknak a um a sile rampum huap cozah (National level govn’t) in an thu a ṭhensak ṭheu.
Ram pakhat nih ramri kau-tuk a nei ih, a mipi pawl ih sumlut kha hmunkhat le hmunkhat bang aw lo in a thlau awk tuk tikah, kumpi acozah in an lakah bangrep te’n sumlut sumsuak a um theinak dingah a bawm. Mipi hnenih an khawn mi siah (tax) pawl kha hmun dangdang ih a um mi ramsung mipi hnenah bangrep mi covo an ngah theinak ding ah a tawlrel sak fawn.

Himi federal system ah, khuasung mi pawl cu an duh vekin politics an tuah thei. Rampum huap acozah hrangah siseh, ramṭhen hrang siseh, khuasung acozah ah siseh an duhduhnak ah an tel thei. Hnaṭuan tam sawn cu ramṭhen le khuasung acozah pawl ih kutsung ah a um.

Federal ukawknak ahcun political parties pawl khal an mah methlaknak bial (Constituents) cio ah an duhtawk in cangvai theinak an nei. Party pakhat in cozah pi ngah lo hman sehla, ramṭhen le khuasung cozah ah MP an ngah asile, daan tuahtu le ukawknak lam ṭuanvo neitu an si thei thotho.

Na ruahnak