Donald Trump ih mi kuatkir dingmi ah Chinmi kan tel pei maw?

Home » Thlirnak » Donald Trump ih mi kuatkir dingmi ah Chinmi kan tel pei maw?

By vcth on November 14, 2016.

deportation

Donald Trump ih netabik interview, US president hirlawknak a neh hnu ih interview, ah US ram sung ih daanlo ih um ramdangmi minung million 2 – million 3 cu US in dawi an si ding thu a sim.

US ah daanlo ih minung lut tambiknak cu Mexico in a si. 2007 ah daanlo ih um minung 12 million tiang an rak kim. Nan immigration lam tuanvo neitu pawl in daanlo ih um pawl an kuat kir sal ih tu ahcun million 12 cu an kim nawn lo.

2012 ah United States Department of Homeland Security in daanlo ih um 11.4 million an si tiah an ti. Daanlo ih lutmi lakah 52% cu Mexico in, 15% Central America in, 12% Asia in, 6% South America in, 5% Caribbean in, le 5% cu Europe le Canada in an si.

US sungah Daanlo ih um a tambiknak state pawl cu California – 2,930,000, Texas – 1,640,000, Florida – 980,000, Illinois – 550,000, New York – 540,000, Arizona – 500,000, Georgia – 490,000, New Jersey – 430,000, North Carolina – 370,000, Washington – 280,000 le State dangdang ah 2,950,000 tluk an um. Hi daanlo ih um lak ah 67% cu Hispanic (Spain tong hmang) an si.

Trump ih simnak ah hmaisabik ih US in dawi dingmi daanlo um million 3 cu mithalo, rittheihsii zuar, gang member ti pawl an si ding ti a si. A dang mitha daanlo ih um pawl cu immigration tuanvo neitu pawl in an ruat leh ding tiah a ti.

US feh Chinmi a tam sawn cu Refugee dinhmun in an si ti sehla a sual lo ding. Mihrekkhat cu sungkhat ko aw ih feh tla an um nan an tamtuk lo.

US cozah in kumkhat ah refugee ziangzat ka lak ding tiih thuthen cetnak parih zir in refugee tam le mal in lak a si. Cu vekin UN lam khal in UN ih refugee a siauktu ihsin, tuah tulmi thil tampi tuah hnu ah, refugee a cohlangtu ram pawl ah kuat sin an si.

Refugee ih um hi tuih Donald Trump ih daanlo ih um a ti mi ah an tello. Daanlo ih um timi pawl cu daanlo in ramri kaan, visa cem zo nan um peh bet ti pawl an si.

Curuangah Donald Trump ih hmaisabik minung million 3 dawinak ah Chinmi hrangah thinphan ding a um lo. US um Chinmi lak ah rammi sinak a ngah zotu tampi an um vekin rammi sinak a ngah hrihlo ti tla an tampi ve. Rammi sinak a ngah hrihlo mi pawl hrangah tla thinphan ding a um lo.

Amahbelte rammi sinak ngah hrihlo tu si fawn si sualnak tum deuh tuah (criminal), rittheihsii zuarnak ah tel, gang member ah tel ti vek kan um pang ahcun kuatkir mi ah tel pang tla an um thei men.

Na ruahnak

One Response to Donald Trump ih mi kuatkir dingmi ah Chinmi kan tel pei maw?

  1. Blackrose   November 15, 2016 at 4:12 am

    Tuah ngam cun tuar khal ngam ding