Dr. Lian Hmung Sakhong Laiza ih Interview

Home » Interview » Dr. Lian Hmung Sakhong Laiza ih Interview

By vcth on October 31, 2013.

8888 Democracy buainak ihsin a suakmi Chin National Front (CNF) palai pawl cu Ethnic Armed Groups Conference kai ding ah Laiza Khua an thleng.

CNF ih Cozah thawn kapawknak colh ter ding parah pomdaan leh hmuhdaan, Nainganyee dinhmun le hmailam hnattuandaan ding ngaihventu pawl ih director le Ethnic National Council (ENC) ih Chairman, Chin National Council (CNC) ih Taba-pattih member le CNF ih Council Member Dr Lian Hmung Sakhong thawn a tanglam vekin tongaw le sutawk a si.

Dr Lian Hmung Sakhong

Sut – CNF dinthok daan insim thei pei maw?
LHS- CNF cu 8888 Democracy buailai ih Yangon, Mandaly University ah fimthiam zirtu Laimi thlawngtapawl Komkhawmih dinmi a si. 1989 kum Kachin State KIO hnen ah Ral thiamnak an zir.

Sut- CNF ih dinnak san le tumtah mi insim thei pei maw?
LHS- CNF ih tumtah mi cu tthensuak ding le Independent hrang khal a si lo. Pyihtaungsuh cu Pang Lung Agreement vekin a tak ih Federal Pyihtaungsuh system ih tundin a duh. A tawi zawng ih rel a si le Democracy ngah ding, Taiyinta miphunpawl Nainganyee le Lumyoyee khal ah covo bangrep ngah ding, Chin miphun mah te tungding awle tawlrelaw thei ding (Federal ngah ding) himi 3 hrang tumtah ih din le do a si.

Sut- Laiza ih tuahmi khawmpi kai dingah zo in a lo sawm, ziangthu nan rel ding tipawl insim thei pei maw?
LHS- Laiza ih khawmpi kai dingah KIO in insawm. A tlangpi in UNFC pawl a sawm a si bik. Kan ni ih a hleice ih kan relpi duhmi cu group pakhat fingfing in kapawk colhnak kan tuah zo maw. KIO cun 1994 kum ihsin a tuah zo. Himi ihsin Rampumhuap kapawknak colh ( Nation wide cease fire) ding thu kan rel vivo ding.

Sut- Ziangmi parah hrampi bun in kapawknak colhtir dingih tuah a si ding.
LHS- Kapawknak colhtir ding tuahnak ah thu 5 in a um. Cumi thu 5 par ih zirin agreement tuah a si ding.1.Ral aw ding ih tawlrelnak colh tir ding. 2. Ralkap umnak bikhiah tuah ding. 3. Hriamhrei keng lo in sukso tlawn theih a si ding. Hriamhrei ken a si le thuhla theih tir aw ding. 4. Pehtlaihnak zungpawl on a theih ding. 5. Ramkhel ( Nainganyee) thuhla rel ding. Hipawl cu a thlangpi in Taiyinta zate thawn a pehthlai.

Sut- Reltlangnak ihsin ziang tuah vivo a si ding.
LHS- Netabik step ih Nainganyee thu relkhawm a si ttheh tik ah lungkimtlangnak pawl a zaten kan kom ding ih Pin Lone vekih Conference pi ko sal ding le Pinlone agreement vekih Pyihtaungsuh Agreement tuah ding a si. Cumi agreement par ihsin kan duh zat zianghmauh kan ngah thei ti ih zirin hmailam hrang ruat a si ding.

Sut- 2008 Daan hrampi thawn pehpar in CNF ih hmuh daan in sim thei pei maw?
LHS 2008 daan hrampi thawn pehpar in tufang ah zianghman kan ruat hrih lo. Nainganyee thu relkhawm ttheh dinhmun a thlen lawngah 2008 daan hrampi thawn pehpar in a thar ih ngan duh maw duhlo ti pawl kan rel leh ding. Cozah thawn biakawk lai ah le Nainganyee thawn pehpar ih relkhawm ttheh a si hlan sung 2008 daan hrampi thawn pehpar in zianghman sim theih a si lo.

Sut- Chin mipi ih pomdaan le duhdaan insim thei pei maw?
LHS- Chin Mipi ih pomdaan le duhdaan cu Federal an duh, Democracy an duh, Taiyinta zaten bangrep covo ngah an duh, Chin rampi tthangso ding an duh. hipawl cu an pomdaan le duhdaan a si.

Sut- 2015 kum hrilawknak ah CNF tel nan tum maw?
LHS- Hrilawknak ih tel dingah hriamhrei kai thawn tel a theih lo.

Sut- Hriamhrei kai ih revolution tuahnak san insim thei pei maw?

LHS- Zohman hriamhrei kai an duh lo. Revolution timi cu ol zetmi a si lo. Mi an thi, zohman thi duh an um lo. Minung sinak ah nun kan duh ttheh. A sinan himi Nainganyee system cun taiyinta miphun pawl ih Miphun sinak, Calai, Nunphung, Ttong, Biaknak, zumnak tipawl Aamahkhaan (guarantee) in pe thei maw. Mai Miphun hamtthatnak hrang mahte tuah theih a si maw, ttuanding inteh in siang maw. Cumi parin Revolution kan tuah. Hitivek ih tuah thei ttuan thei a um a si ahcun zohman hriamhrei kai ih Revolution tuah an duh lo ding.

Reporter- Hi tivekin in sim le sang ruangah kan lung a awi,
LHS – Kei khal ka lungawi ve.
By Reporter News Journal/31.10.2013

James Thang

Na ruahnak