Duhdawt Awtu Pawl Ih Ni

Home » Cahram » Duhdawt Awtu Pawl Ih Ni

By vcth on February 5, 2014.

Francis Cung Bik

February thla kan thleng tinten tlangval pawl cu kan lung a tur ṭheu. Ka lungthlitum hrangah ziang ka pek ding. Pangpar, chocolate maw zaing lak sawng? Cuvek ṭhiamṭhiam in fala pawl tla tu ṭum duhdawt awtu pawl ih ni ah zing laksawng ka co ding. Lole ka lungduh valpa hrangah ziang ka pek ding, cuvekin ka lungduh valpa khalin ka parah a duhdawtnak ziangtin a langter ding ti an hngakhlap ve ko ding ka zum. Ziangruangah Valentine’s ni hi thupit ter in duhdawt awtu pawl ih ni ah kan hmang? Valentine kan ti mi teh zo a si, cu pawl mallai cu kan theih a ṭha ding tin ka ruat (A thuanthu thei phah in na fala pangpar na pek le hmual tla a nei deuh men ding).

Thinlung

Thuanthu pakhat (legend) ah Valentine cu kum zabi 3 hrawngah Rome khuapi ih puithiam a si. Cui san lai ih Siangpahrang a rak ṭuantu cu Claudius II a si. Claudius II in a ram sungih ralkap pawl kha nupi, innsang nei hnak in lawng tlai an si le ram hrangah hmual nei deuh in hna an ṭuan thei ding tin a ruat. Curaungah ralkap pawl cu nupi nei a rak awih lo. Cucu Puithiam Valentine in thu dik lo zetin a rak hmu. Tlangval ṭhat lai, vanglai tak mah duh mi thawn um tlang theih lo, duh aw, le uar aw thei lo ti cu thil har zet a rak si. Cui ralkap tlangval pawl le an lung duhte pawl kha a thup ten kut a sih sak ṭheutu cu Puithiam Valentine a rak si. Duhdawt awtu pawl ih co vo hrangah nasa zet ih ṭan a la tu Puithiam Valentine cu Siangpahrang Claudius in siangpahrang dodal tu tiin a rak that. Tulai san ṭong in kan sim a si le cu Puithiam Valentine cu Human rights activist tiin kan ti thei ding ka zum.

Thuanthu pakhat ahcun Valentine cu thawng an tlak. A thawng tlakpi pa ih fa nu in a rak vehvia ringring. Amah Valentine veh hran siloin, a pa veh phah in cu tin Valentine thawn tla cu an rak thei aw. Cuticun, Valentine le cui fala nu te cu an duh aw. Duh vekin hmu aw thiam le tongaw thiam an si lo. Cakuat hi an hrang ahcun an pawlkom awnak ṭha bik a rak si. A cakuat zaten a netabik ah “Na Valentine hnen in” (from your Valentine) tiin a rak ngan ringring. Cucu tu ni tiang kan hmang. Valentine’s card tampi ah ‘from your Valentine’s’ tiin an hmang.

February 14 ni hi Valentine’s ni ih an hmannak cu Valentine hi 270 CE, February thla laifang, ni 14 ni hrawng ah a thi ding tiin an zum. Valentine ih a thihni kha Christian pawl in duhdawt awtu pawl ih ni tiah an rak sunloih thok. A ngaingai ah cu Feb ni 14 ni hi Rome pathian Faunus an sunloih ni a si. Faunus cu thlairawl kilkhawi tu, thluasuah petu pathian a si. Rome pawl hrangah February thla cu thianhlim thla a si fawn. An inn kha cite ti thawn a kholh, a ker le kawm pawl tla cite ti an thlerh ih thianghlim seh tiin an phun hmurhmo. Cutiih a thupi zet mi Rome puai cu Christian pawl in Christian daan ah an tuah (Christianize an tuah). 498 CE ah Pope Gelasius in February in 14 cu St. Valentine’s ni tiin a rak nemhnget. Cutin neta ah Valentine’s ni cu Christian puai ah a rung cang. Asinan tuni ahcun Christian puai lawng si nawn lo in Leitlun puai ah a cang.

Kum zabi 15 hrawngah England le France ramah February 14 cu vate pawl an pawl aw caan (mating season) a si tin an ruat. Cucu ziang ciamco asilo nan, Feb thla cu duhdawt awtu pawl ih thla si ding ah a rem cang sinsin in a rak ruat ter. Kum zabi 17 hrawngah Valentine’s ni cu Great Britain ah duhdawt awtu pawl karlak ah thilri, laksawng, kut ih ngam mi ca tawite tivek an pek aw thok. Kum zabi 17 cem zawngah cun printed card tete tla an pek aw.

Leilung tlun ih card zuar tam bik mi ah Christmas card a si ih a pahnihnak cu Valentine’s card a si. Valentine’s card ahcun kum zabi 15 lam ih ṭong, ṭongkhun le biazai pawl an hmang sal tam.

Duhdawt awtu pawl ih ni cu kan thleng thlang ding. Hi duhdawt awtu pawl ih ni ah mi van ṭha sihram aw tiah thlaza ka lo cam sak. Kan mai kan duhmi lungthlitum parah a thianghlim le a hngetkhoh mi duhdawtnak thawn duhdawt aw uh si.

Khah le……
A duhdawt aw hrih lo tu pawl tla duhdawt aw hram seh.
Kop a nei hrih lo tu pawl tla an hnakruh hlo tong hram seh.
A duh aw zo tu pawl tla a thianghlim mi duhdawtnak thawn duh aw sinsin hram seh.

Na ruahnak

2 Responses to Duhdawt Awtu Pawl Ih Ni

  1. Anonymous   February 6, 2010 at 6:43 pm

    Na thlacam bangin sihram seh, Tu ttum Valentine's day cu luck ka tum nasa

  2. Cer sin   February 5, 2014 at 2:19 pm

    Heddd cu ti rori maw? nan si ve Minu pawllawng hmang thintur ka tinak lak ah, palam a rak tur ve theu si maw???? Hummmmm Nei velo hrangah. cu,n Thintur thei tu um ve lo ee