Duhdawtnak cu …

Home » Cahram » Duhdawtnak cu …

By vcth on February 14, 2011.

Voikhatah nupa te an um. An pa cu zuu tama a si. Zuu tama ti men lawng siloin nupi thawi, vuak le vel a hmang fawn. Cu lawng tawk lo in, hnaṭuan a zuam lo, buainak a hawl, mi zei lo tak pasal pakhat a si. Cutin a innsang nu a buaipinak kum 7 leng lo a si.

Voikhat cu zuu dawrah a rualpi pawl thawn an buai, a mit sungah zuu an theh ngah. A mit a thip, khua a hmu thei lo. Sizung an feh pi. Sibawipa in tuhnu nazi 24 sungah na mit a rultu, a hlutu an um lo ahcun na mit a caw ding tiah a ti. Mit hlu tu ti cu thil ol lo tak a si. Thi hlu ti sehla a tawk deuh lai.

Bawmtu nei lo zuu tama pa cu a beidong, ka mit a caw thlang ding ti ruat in. Tik cu caan a cem zik te ah sibawipa in mit hlu tu na nei tiah a ti. A lungawi nasa. Cutin operation cu tluang ten an tuah suak. Ni tawk fang a rei in a mit khua a hmu thei sal.

A mang a bang,  a nupi tu lai a hmu dah lo. A thinheng. Mah hman dam lo lai ah khoi ah ha a vak tiah a phun. Innsang pa ih a nun cu a kel te a si ko. Zuu te cu a duh ringring lai ko, a in ringring lai ko. Voikhat cu zuu mawng nawn ten in a tlung. Rin lo pin a nupi a hmu. A kawk cih. ‘Khawiah na vak, a ni ni, a zarhzarh in’ tiah a ti. Amai daan ten a vuak, thawi tum. A kut a hawi. An nu cu a mit a tuam aw. A sup aw lohli sal. Ziang na cang tiah a sut. An nu cun, ‘Duhmi na hrangah ka mit ka pe,’ tiah dimten a let.

1 Kor 13:4-8 ‘Duhdawtnak cu a thin a sau ih mi zaangfah a thiam; duhdawtnak cu mi a iksiik lo, tluang a khawng lo ih a puarthau fawn lo. Duhdawtnak cu nun hel-hlong in a nung lo, amah ih zawn lawng a ruat lo, a thin a tawi lo, cule tisual mi parah thinciin a nei lo. Duhdawtnak cu thil ṭha lo parah a lung a awi lo, a sinain thutak parah a lung a awi. Duhdawtnak cu a bei a dong dah lo; ziangkim a zum, ziangkim a beisei ih ziangkim a tuar thei. Duhdawtnak cu cem ni a nei lo. Sikhalsehla profet thusim thiamnak pawl cu a reh ding; theih lo ṭong ih ṭong theinak khal a cem ding. Thiamnak le theihnak tla an hloral ding. Ziangah tile thiamnak laksawng kan ngahmi le profet thusim thiamnak kan comi pawl hi a ṭhen a hrekte lawng an si. Sikhalsehla a famkimmi a ra thlen tikah cun a famkim lomi pawl cu an hlo ṭheh ding.’

Cui zuu tama innsangpa cu a mang a bang. An nu hitin thu a sut, ‘ziangruangah ka parah hi tluk in na ṭha thei, ka lo vuak, ka lo vel, buainak ka suah pi ringring, nikhat hnih men silo, kum 7 lenglo a si. Ziangruangah ka hrangah na mit tiang pek na siang?’ An nu cun mit hmai panten  ‘sim ding dang ka nei lo, ka lo duhdawt ruangah si ko,’ tiah a ti. Cuticun an pa zuu tama ih nun cu a taw le lu a thleng aw lan ta.

Francis Cung Bik

Na ruahnak

One Response to Duhdawtnak cu …

  1. Chin idol- Danny   February 15, 2011 at 11:23 pm

    VCT ca pawl hi commnet ka rak pek dah lo men… Ka rak siar theu ih thazaang ka ngah in cawn ding tam thei nasa…