Einstein Special Relativity Theory le Nunnak

Home » Cahram » Einstein Special Relativity Theory le Nunnak

By vcth on November 22, 2013.

Salai Van Cung Lain

Ni Siang Zing in kandung kum ah “Einstein Relativity Theory le Nun Diriamnak” timi cahram pakhat a rak ngan. Himi cahram sungah Einstein ih theory kha thahthimnak thawn sim fiangnak a nei. Cui theory kha leitlun kan nun diriamnak khal ah hmang a theih a si tin a sim. A sim mi theory ih a tlangpibik cu “without frame of reference, it is impossible to tell who is right” (zohthim dingih retmi thilri umlo in zo si a hman bik timi sim theih a si lo)” A sim duhmi cu zohthim/tahthim mi minung umlo in leitlun kan nunnak ah ziang tluk in kan hlawhtling timi hi thei theih a si lo. Tuni ah na hlawhtling le tling lo zo thawn na tahthim awk? Na rualpi maw, na sungkhat unau maw, mi farah pa maw? Bill Gates? Tahthimnak ih a hmang mi cu kan Falam pawl bawhlungsit kan rak thiam zet san a si. A sim mi cu Tial Hre ih bawhlung sit mi ciarbek lakah a tang, cui bawhlung a feh zet Hrangthio bualrawn ah pi 300 siseh la, Cui distance pi 300 cu boruak (space) e.g. thlapi parah tah sal seh la pi 300 a si nawn lo ding. Cuhlei ah can khal hi an feh dan an bang aw lo, thla pi parih ni khat le leitlun ni khat khal an bang aw lo tin a rak ngan. Himi cahram hi a tha zet, a si nan tahthimnak a pek mi le a theory fiang lo ahcun a cahram thaw zetin ei theih a si lo tin ka hmu. Curuang ah himi cahram ah Einstein theory le ziang ruangah caan hmun khat le hmun khat an bang aw lo? ziang ruangah thil a sau le tawi khal kan hmuh dan a bang aw lo timi ka sim hnu ah leitlun kan nun dan ah apply ka tuah ve ding.

Einstein ih a hmin cu thei lo kan um lem ding ka zum lo. University a kai lai ah zaran tlawngta pakhat a rak si thu, Degree a lak hnu ih hnatuan a ngah thei lo thu ka thei tikah mak ka ti zet. University a kai lai ah an Lecturers (saya) pawl thu tamtuk a rak sut ruangah an Lecturers pawl ih huat a rak tong. Cu lai ah cun Lectures pawl ih reference letter tel lo in science lam ah hnatuan ngah a rak har zet. Einstein cu an rak ngan sak duh lo tikah hnatuan tha a hmu thei lo. A rual pa ih bomnak in Switzerland khawpi Bern sung ih um Patent (kei mah sersiam mi thilri a si tihih hmatpungtin nak) zung ah cazi hnatuan a ngah. Bern khawpi sung ih a rak um nak zin Salai Tawna ih “Kyauk Khin Lan” a timi ahcun Salai Tawna le Salai BA Thang thawn 2010 kum ah kan va leng. Cui cazi hnatuan phah ih a man can te ah leilungtlun a thleng ter mi papers pawl a rak suah. 1905 (Einstein ih mangbangza kum) ah papers pathum a rak suah.

1) What is Light? Ni ihsin a ra mi tleunak timi hi ziang a si timi a rak sim fiang. Tleunak timi cu “photon” timi thil fate (particle) pakhat a vakvai mi a si tin a rak sim. Cui photon particle cu tuni ah TV, Laser ti vekah kan hmang.

2) The Existence of Atoms? Thil fate tak te a si mi Atom a um thu le cui atom cu khawi mi tiat a si ti khal a rak tuat thei. Leitlun ih thil hmuahhmuah ih atoms pawl komkhawm awk mi lawnglawng an si. Einstein nih cui Atoms pawl nih cun thil fatete (small little dust particles can move like liquid) pawl tidai vekin an cangvai thei tin a rak sim. Cui kum thotho ah lei tlun ih hminthangbik Equation a si mi “E=mc2” Engergy (cahnak/ thazaang) le Mass (Htu-Hte) timi hi an thleng awk thei. “Energy can become matter” and “matter can become energy”. Thil fate atom pakhat nih Energy tamzet a suak ter thei, cui suak ter theinak ding ahcu nuclear reaction a tul. Arsi pawl ziang ruangah an tleu? Ni ruangah, ni ih a suah mi photon particles pawl cak zetin an pahawknak in Engergy tampi a suak ter, cui Engery pawl cu “mass” ah an thleng aw. Himi thilcang mi hi arsi pawl vang ter tu engine a si tin a rak sim.

3) “Special Relativity Theory” timi caan (time) le boruak (space) timi hi pehtlaihawknak an nei. Himi papers pathum a suah hnu ah zohman in an rak thei thiam lo. University ih hnatuan ngah ding ih hnatuan tampi a apply rero lai thotho. A vanthatnak ah a papers suah mi cui san ih hminthang zet scientist a si mi “Max Plank” in a rak hmu ih Berlin ah an ko ih hnatuan an rak pek. Cui hnatuannak in cu leitlun kan hmuh dan a thleng ter mi ( 4) “General relativity theory” timi a rak suah in 1921 an Noble Prize a rak ngah. Hi mi theory nih boruak (space) timi hi a nem (flexible) a si tin a rak sim. Rabal ih tuahmi cabuai parah bawhlung ret aw la bawhlung cu a pil ding, kan boruak cu hivek a si tin a rak sim. Newton san ih kan tlolak cu a hgetkhoh (rigid) mi a si timi zumnak cu a rak sual. Cuhleiah Gravity timi ziangtin hna a tuan timi a sim fiang thei.

Einstein Special Relativity Theory

Einstein’s “Special Relativity Theory” cu a tanglam ih thuhrampi (principles) pahnih parih lak mi a si.

1) Zohthimmi thil umlo in, zo si a hman, zo si a cawl, zo si a cang timi simtheih a si lo.

2) Tleunak ih a ranzia cu ziang tik khal ah a hmun ringring (The speed of light is constant for all observers). Tleunak hnak ih rangin a feh thei mi universal ah a um lo.

Point 1 Simfiangnak

A Point.1 hi ziang tinak a si? Tahthimnak kan lak ve pei uh. Ka rual tha Salai K Tin kha Yangon, Lanmadaw Bahosi veng ihsin Yuzana Plaza tlung dingah lineka (Hilux) a to. A to man cu San Siang nih a pek sak lo. A to mi Hilux kha 30mph (nazi pa khat ah peng 30) in punghman ten a feh kan ti pei. K Tin nih cun motor hmailam in Tennis ball motor a to phah ih hmailam ah 10mph in deng sehla, a mai hmuh dan ahcun tennis ball cu 10mph in a feh ding. A si nan zinkap ih a rak ding tu ka rual Salai Hubik nih cun K Tin ih deng mi tennis ball kha 40mph (30mph (motor) + 10mph (tennis ball)) in a hmu ding. Bahosi veng ih Mawshweli Beer dawr ah bawhlungsit zoh phah in an hmuh dan an rel sal ahcun an lungkim aw nawn lo. An hmuh dan a dangdang nan an pa hnih in an hman veve. Motor kan maung tikah kanmah cak vekin kan feh in kan thei aw lo. Kanmah siloin kan kiang ih lamzin, thingkung pawl cak zetin an feh in kan hmu sawn. A sin nan zinkap ih a ding mi pa cun kanmah le motor kha cak zetin kan feh in a hmu. Vanzam kan to tik khal ah kanmah cu kan cawl ih kan tang ih khua le mero pawl an feh sawn in kan hmu. Tlangleng cawlhhmun ah kan cawl ih a dang tlangleng pakhat kan zoh ih a cancan le khawi mi tlangleng sawn si a feh, kan to mi tlangleng maw, mi dang tlangleng si a feh timi kan thei thiam lo. Kan kiangkap ih stationary a si mi station, dawr tivek kan zoh lawng ah zo si a cang timi kan thei thei. Kan (frame of reference) hi station a si himi ahcun. Cumi station zoh lo in zo sawn si a cang timi thei theih a si lo.

Point 2 Simfiangnak

Salai K Tin ih Hilux to mi kan zoh sal pei uh. K Tin nih tennis ball si nawn lo in motor hmai ah thawsalike (torch light) vang sehla tleunak ih khul (speed of light) cu 186,262miles/s (peng 182,262 kha second pakhat hnung in a feh) a feh ding. Hmai lam siloin passenger lam ah vun cerh lala seh la speed of light (light a vang rang zia) an bang aw thotho ding. Hu Bik ih lamzin kiang in cumi torch light ih a rangzia kha rak tah ve seh la Hu Bik thawn bang aw thotho in a hmu ding. Motor speed, motor a cang mi in light in a ranzia parah thu a nei nawn lo. Tu ahcun K Tin le Hu Bik cu an lung kim in hna ngam ten beer an in tlang thei.

Asinan ziangtin himi a cang thei. Speed = Distance/ Time a siih an pa thum s, d, t cu pakhatkhat parah sirhsan in thleng aw ringring mi an si. Asinan khul timi a hmun ringring ding si le cu distance le time kan tah tik ah kan lung a kim lo tul ding. Speed constant a si ringring dingah distance le time timi hi an milh aw ruangah a si. Himi idea ruangih a pehtlaihmi cu caan hi a feh dan an bang aw lo (time can slow down), distance timi khal kan tah dan a bang aw nawn lo ding (length can contract in their direction of motion).

Time Dilation (Tikcucan timi hi a hnu thei)

Time

Simple bik a si mi thlalang pa hnih le laser light thawn tuah mi nazi kan zoh pei uh. Laser light a tlun (A) le a tang (B) a feh tikah 1 second a kim kan ti pei. Himi nazi hi cang lo ten ret in a kiang in kan zoh a si ahcun laser light cu tlun/tang a feh tikah 1 second a si ih a feh zet cu L+L=2L a si ding. Himi nazi hi vanzam parah ret in vanzam a feh laimi kha leitlun ihsin kan zoh le ziang tin kan hmu ding? Himi nazi cu vanzam thawn an zam, hmailam ah an feh tlang tikah a light a feh dan kha tlun/tang a si nawn lo in V pungsan in a feh thlang. A distance kha sau deuh a feh thlang 2L a sin nawn lo. Speed of light cu constant a si ringring ruangah zuk 2 vanzam par ih nazi cu a hnu deuh in kan hmu ding.

Nazi an bang aw nan caan a siar dan an bang aw nawn lo. Himi leitlun dan ih cang mi thil cu “Time Dialation” tin an ko. This happens as a result of the nature of space and time. Vanzam parih a tomi pa nih cun a nazi a hnu deuh in hmu aw lo in, leitlun ih um pa nazi kha a hnu deuh in a hmu ding. A tlun in motor le vanzam to mi tahthimnak ka pek vekin a cang rero mi pa in a mah siloin, a kiang kap pawl cak zetin an cangvai in a hmu.

Length Contraction (length timi a tawi thei)

Length

Vanzam pathum speed of light tluk cak zetin an zam kan ti pei. K Tin thotho in a lai ta (No.2) a mawng. An vanzam tlun lam ah laster receiver an nei thluh. K Tin in laser light a lai in kap seh la a light cu bang rep ten No.1 le No.3 hnen ah an feh ding ih ziang hman dang lamnak a hmu lo ding. Asinan Hu Bik nih leitlun in rak zoh sehla K Tin ih laser light kha K Tin hmu mi vekin bangrep ten an ngah nawn lo ding. Hmailam ah an feh ruang ah No.1 ih hmaisa sawn a ngah ding, cule No.3 in mal te rei hnu ah a ngah ding. A laster light overall length kha a tawi deuh in a hmu ding. Curuangah Hu Bik cun a vanzam pawl cu tawi deuh in a hmu ding. Himi natural in a cang mi thil hi “Length Contraction” tin an ti, (Moving objects contract in their direction of motion. Like the time dilation effect, this happens as a result of the nature of space and time.) Ziang tlukin caan a sau deuh ding, ziang tlukin length a tawi deuh ding timi cu zaing tlukin na zam cak (speed) timi parah a thum aw. A caan a tawi dan ding le a length a contract dan ding cu Lorrent factor (Lorrent Equation) timi hmangin cekci zetin kan tuat thei. Himi thil cang mi hi theory menmen a siloin experiment tampi an tuah in a hman a si ti ah scientist tampi in an phuang.

Thunetnak

A si le Ni Siang Zing ih article kha kan zoh sal pei uh. Thlapi parih caan le leitlun caan a bang aw lo. Thlapi parih nikhat cu lei tlun ah ni 29.5 a rei. Ziang ah tile thlapi hnak in leilungpi cak sawn in a feh (ni a hel) ruang ah si. Tikcucaan timi cu a luang mi tiva vek a si, hmailam lawngah a luang, cun hmun khat le hmun khat ah an luang rate an bang aw lo. Falam bualrawn ih 50m kha tolak ih a feh mi vanzam cak zet par ahcun an sau dan an bang aw nawn lo ding. Himi theory le tahthimnak pawl le leitlun nun diriamnak a tahthim mi ka uar zet. Anih cun a nauhak lai laizo ih achinthuk a ei mi nun le tuni ih a nun a tahthiam awk ih a di riam aw zet. Kei khal himi theory in leitlun kan nun dan ah tahthimnak ka lak ve ding.

Einstein cun kan universe pi ih kan hmuhdan le kan ruahdan pawl in thleng thluh. Amah rori khal in Pathian ih thil tuah dan hi ka thei tum mi a si tin a sim dah. Kei nih tla thil hmuahhmuah sersiamtu hi Pathian a si tin ka zum. Himi universe a sersiam dan le minung kan nun le kan tlanlennak in sersiam dan hi a bang awk in ka hmu. K Tin le Hu Bik an lungkim aw thei lo vekin, tu ni ah mitampi kan hmuh dan a dang cio e.g politics, religion, ideologies, policies etc.. Mi zapi ih kan lungkim mi thil hi a um thei lo. Kan ideology a hmanbik tin kan hmuh duh ruangah leitlun ral tampi a suak, minung tampi an thi zo nan zo hman kan hmanbik hrih lo, tu ni tiang. Democracy dan zumtu pa in Communism, Dictatorship etc.. hivek view nei pawl hi an sual ti ah a hmu. Asinan Communist pa le Dictatorship pa cun an hmuh dan a dang ih Democracy kha sual tin an hmu. Milai cun kan hmuh vekin mi an hmu thluh lo tikah mi aa tin kan zoh. Mithla ka hmu a si tin a au pa cu mithla a um ti zumlo pa cun mi aa/bum tin a hmu. Asinan a hmu ngaingai maw timi a thei lo. Nun diriamnak khal ah kanmah hnakin mithiam sawn thawn kan tahthimawk tikah diriamlonak a suak ter. Asinan, kan theih ding mi cu zo vek/ ziang vek te kan si khal le kan zaten hruaitu kan si thluh, mi nunnak ah ziang vek ten simaw a dang lam tertu kan si thluh, kan thei awk lo men thei, can tam pi cu. Himi theory cun universe hna a tuan dan lawng siloin minung kan nunnak khal ah apply tuah theih thotho mi a si tin ka hmu.

Na ruahnak