Falam Peng USDP Hotu Pu Kawl Luai Suhtonnak

Home » Interview » Falam Peng USDP Hotu Pu Kawl Luai Suhtonnak

By vcth on August 23, 2015.

Pu Kawl Luai

Falam Peng USDP Chairman Pu Kawl Luai, RFA in Interview Lai

Q. Hmaisabik ah RFA Chin Program Hmin in cibai kan lo buk. Na thuhla tawi simnak in kan thok pei cu?

A. Ka lungawi, hi vekin RFA Chin Program in cibia buknak le thusutnak in nei ruangah. Kei ka suahnak khua cu Falam peng, Laizo tlangkulh, Hmunpi khua, Kalrawn Hmunpi tla kan ti thei, cumi khua ah ka suak. Ka pa cu Pu Con Hnin a si, ka nu cu Pi Zung Par a si, in tansan zo. Tu ah Falam ah kan um. Fangdawr te kan tuah. Fa le 2 ka nei.

Q. Fimzirnak lam na rak hlawhtling mi pawl tla theih kan duh zet?

A. Fimzirnak lam ka rak hlawhtling mi cu, nu le pa harsa zet an si ruangah Phun 4 tiang khua ah ka kai. Phun 7 tiang Laizo ah ka kai. America Poor Childern farah cawmnak in Phun 8 ihsin phun 10 tiang Falam ah ka kai. Cu theh hnu cun cawmtu ka nei nawn lo ruangah Univerity kai thei lo in Cozah hnatuan ka lut ta.

Q. Tu laifang ih tuanvo na lakmi pawl in sim thei pei maw?

A. Tu laifang tuanvo ka lakmi cu Falam peng USDP Chairman le Falam peng nu le pa, cozah ih tuanvo peknak vekin Municiple Chairman ka tuan rero lai. Cumi ah kan khua le ram dik le fel ih hnatuan theinak ding le thansonak hrangah heh le heh tiin hlawhman nei loin pumpekin hnatuan mi ka si.

Q.Falam peng USDP hotu na si vekin PM cuh tla na tum tin kan thei ih khawimi hmunah ziangmi na cuh ding ti in im thei pei maw?

A. Aaaa… sim thei ee. Falam peng ah Blcok No. 1 le 2 tin kan then. Block No.2 ah Ramkulh hluttaw palai ah cuh dingin party in tuanvo in pek.

Q. MP cuhtumtu tampi lak ah nangmah ih hleicetnak hi ziang a si pei?

A. Mipi an fim a si ahcun, thu an theih a si ahcun, thaten thu an ruah a si ahcun mipi in in hril tengteng ding ti zumnak ka nei. Kannih hi kan suah ihsin Falam khua le ram ih um, Falam khua le ram hrangah ah, Falam peng le ram hrangah heh le heh tiah hnatuan mi kan si. Kan hnatuannak khal mipi ih hmuh theih ding tampi a um. Curuangah mipi in an theih a si ahcun in hril tengteng ding tiah ka zum.

Q.Tui MP tuan rero lai pawl parah thazang na ngahmi le thazang na ngah lo mi, hi ti deuh in tuan sehla ti na duhmi pawl in sim thei pei maw?

A. Sim thei ee, tu Falam peng ih kan hrilmi MP pawl hi, MP 2, ramkulh hluttaw palai 2 cu Falam ih ummi an si. Asinan annih hi an kum a upa zo, cuhleiah khua le ram hrangih hnatuan ding rak tumtahmi an silo tin kan hmu. Cun, MP 3, cu Falam ih um an silo. Mikhual vekin an um. An thinlung takin Falam hrangah hna in tuan sak lo. Curuangah kannih USDP cun Candidate kan hril tikah zo kan hril? Falam peng le ramih hna a tuan thei taktaktu ding, khua le ram a duhdawt taktaktu lawng kan hrilmi a si. Curuangah kei khal mipi in khua le ram a duhdawt taktak, hna a tuan thei taktak ding tin in hmu ruangah in hrilmi a si. Cun tu hlan ih MP a tuantu pawlin zianghman an tuan lo ti sehla a suallo ti tluk a si. Kannih USDP in hril tlinnak kan nngah a si ahcun khua le ram hrang heh le heh tin hna kan tuan ding. Cun hna an tuan thei lonak khal hi party fate an si. An party minung pawl in an rinsan nawn lo, anmah lala khalin party zunghman an nei thei lo. Pehtlaihnak ding khal a um lo. Hluttaw palai zung tla an nei lo.

Q. Mitu na relmi ih party fate na timi, tongdang in cu Tualto party kan ti pei cu, le party pi a danglamnak ziang a si?

A. Party pakhat an si vekin ‘kan tuan thei’ cu an ti ko nan tu kum 4 sung kan zoh a silen tu USDP hi hrilmi party cu kan silo nan thilti theinak tampi kan nei. Khawi tawkah kan nei Central cozah ah, Ramkulh cozah ah. Thimnak ah Falam ah kan MP pawl in Falam ah tidai ziangtlukin kan har ti in thei sak lo. Ziang ka tuah, Party Hotu dinhmun in Naypyitaw ih party conference kan tuah lai ah, khah… Falam cu nu le pa neilo vek kan si, Hluttaw palai cu kan hril nan neilo vek kan si ruangah hi tawkih a rami USDP palai, peng dang palai pawl in thu in thunlet sak uh tiah dilnak ka nei. Ka neih vekin Tedim MP in in dil sakih tidai hrangah Falam ah ting 1000 in pek, Rih ah ting 500 an pek.

Q. Mipi tam sawm in USDP hi a ol zawngin ralkap party tin an ti. Cozah kaitu party tla an si. 2012-13 hrawng ahcun mipi in an duh zet nan, neta lam ah Laiza military camp kap thu siseh, Kokang thu siseh, tlawngta pawl thu ah siseh mipi in an uar lo vivo. Himi in nan party parah ziangtluk tiang hmual a nei thei. 2015 hrilawknak ah teh USDP in ziang tluk ruahsannak a nei?

A. Si.. 2010 lai hrilawknak ah ziangah ka rak ngah lo ti asile mipi cun ka minung cu in duh, ka hnatuanmi tla an duh zet nan, ralkap party, Kawl party in ti. Mipi an hmu thiam lo ruangah a si. Kei ralkap ka tuan dahlo pi. Ralkap ka si lo, Kawl khal ka si lo. Ziangtiang in ti tile ‘nang cu na hmin tla Kawl a ti a tel, thleng aw, Lai Luai ti aw la mee kan lo pek ding’ ti tiang in ti. Kei Laimi ka si. Laipa hmanah lai citcit ka si. Thinlung khal ah lai citcit ka si. USDP cu Kawl party tla a silo. Ramdinkhawm party a si.

Q. USDP party cu an lian, peisa tampi an nei na tiih khawi tawk in peisa an ngah?

A. USDP cu pawlkom in kum 20 lenglo a um zomi party a siih party fund tampi a um, party sungah company neitu, milian tampi tla an um ih cumi pawl ih hlumi tla an ngah. Cuhlei ah peng le ramkulh party tla in fund hrangah pursumnak a tuahmi tla a um. Thimnak ah Shwe Chintit bus service kan tuah. Cuvekin party sumpai hrangah tayawin sipuazi hnatuannak tampi a um.

Q. Tu himi nan party zung tla hi ralkap san laiih rak sakmi a si. Ralkap in party hnen ah an lo pek sinmi a si. Hi nah zawnah rampi sumpai diklo ih hmang tiah ka ti thei pei maw?

A. Himi hi mipi tax (Siah) pekmi ih sakmi a silo. A hlu an dih ih, a hlu an ngahmi in sakmi a si.

Q. Mipi hnen ih sawm duhmi le sim duhmi na nei maw?

A. Kan khua le kan ram thansonak ih a tuan thei taktak tu ding party le minung kan theih a tul ti sim ka duh.

Na ruahnak