Falam Surbung Airport Thu Hna-ngam Asi

Home » Thlirnak » Falam Surbung Airport Thu Hna-ngam Asi

By vcth on April 16, 2015.

Surbung Tlang

Kan dung nai Hakha Post ah Hakha Khua Thar khawnu, khawpa in Hakha ih Airport tauh dingin thlacamnak le Hlutdaw ah tla cakuatnak an nei thu a phuang.

Hi thu thawn pehpar aw in thuhla phunphun a leng celcel. Hakha lam unau hrekkhat ih an comment peknak ah Falam Surbung cu anmah ten private in an tuah tum, Hakha cu cozah ih tuah sak dingin kan ngiar ding tiah an ti.

Tuzing, April, 16, RFA Chin program in U Ngun San Aung an interview mi ka ngai ih, Falam  Surbung cu Chinram ih vanzam tual ah a rembik thu le cozah in Kyat 1 billion budget an pek zo thu theih a si.

Surbung vanzam tual cu 1932 ah mirang pawl in vanzam tual cek tumnak an rak nei nan 1942 ah Japan ral ruangah rak thul sal a si. Cutin 1962 tiang ziang thuhla ngai um lo in a rak um. Newin cozah a kai in hi thu a thok sal ih central cozah in vanzam tual tuah sak ding thu a um.

Falam mipi pawl tla an thatho zet ih 1963 ah, cozah ih nem-hngetnak ngaingai a um hlan ah, mipi in thazang in thirfei, pha-hlai le tupheng thawn surbung vanzam tual an rak cek. Kum 5 sungah cozah lam in ziang thu felfai ngai a um lo ih hlei ah 1968 ah Mizo tapung in Falam bank an ruknak le palik zung pawl an lonnak ruangah hi project ṭhul sal a si.

U Thein Sein cozah a kai in Kawlram ramkulh le ramṭhen pawl ih Airport um hrih lonak cu Chin ramkulh lawng a siih vanzam taul tauh sak ding beiseinak a um. Nan, kan thu le hla cu theih cia bangin khat le khat cuh awk le mai khua ih Airport um ding duh cio a si.

Hakha, Tedim le Falam tiin hmun 3 ah thlingthlanak an nei. Cutiih tlunlam in khawi ih tuah ding ti an zoh rero lai ah Falam khawnu, khawpa in mai thazang suah in surbung vanzam tual ceknak an nei.

Falam khawnu, khawpa pawl ih zuamnak ruangah hlutdaw in Chin ramkulh hrangah Surbung vanzam tual cu nem-hnget a siih budget kyat 1 billion a pek.

Falam khawnu, khawpa upa pakhat le vanzam tual cangvaihnak ih nasa zetin a ṭangtu U Lal Tin Mang in, “Airport famkim in ṭheh suak dingin kyat 15 billion a ṭul. Tu kan ngahmi budget kyat 1 million in a diah lamlam lo. Nan, ngah lo hngak in cu a ṭha ko. Step 1 tiang, zaing maw cen tiang, cu in fehpi ko ding,” tiah Myanmar Times ah a sim.

Hakha MP Pu Robin tla in, ” Airport thu thawn pehpar aw in hmuh daan a phunphun a um. Kei ka hrang ahcun khoi ih um tla poi ka ti lo. A rembiknak, a ṭhabiknak ih a um ding a thupi,” taih a ti.

Pathian in Surbung Airport project le thlanhri pawt in a zonzaitu, sumpai a suahtu zate thluasuahnak pe hram seh. A reihlan ah Falam ihsin vanzam awn kan thei cing ding ih vanzam ṭum tla kan hmu cing ding.

Na ruahnak

One Response to Falam Surbung Airport Thu Hna-ngam Asi

  1. Biak Sang   April 16, 2015 at 11:51 am

    Surbung tlangah aremcang bik tiah khuahlan in tuni tiang an lungkim ciami parah thudang relding aum nawnlo tin karuat