Fang Kan Er Ee

Home » Cahram » Fang Kan Er Ee

By vcth on October 18, 2010.

Francis Cung Bik

Mi zaan cu Chiang Mai um mi kan laimi a um sun te hlunghlai zet fang-er puai kan hmang. Minung 15 kuam kan si. Kan nuam aw zet. Fang er puai hmang phah in thu malte ka ruat. Ziangruangah fang kan er. Nunphung, pupa dan kil khawinak maw? Maw kan pawlkom cangvaihnak ha? Loo ka nei lo, thlairawl ka khawm lo, fang-er hi ka hrangah ziang ha man a neihnak? Cutin ruat phah…ruat phah in….

1. Fang-er ti cu hngil lonak thil pakhat a si
Keimah ten, Khrihfa thil um daan ten ka tahṭhim. Ziang thawn ka tahṭhim ti le ‘Bawipa Zaanriah’ thawn a si. Bawipa zaanriah na ei ruangah na piantharnak le vanram na kainak ding cu a silo. Nan kan Bawipa ih a duhdawtnak, a tuarnak pawl kan nunnak ah a thar ih tharthawh salnak, a hranih cingmang salnak caan a si.

Cuvekin Fang Er puai tla Chinmi ka sinak, nun le phung, thu le hla ah ka nun ah a thar in in hlunghlai ter salnak caan a si. Khah sile, Fang Er cu “retreat’ Kan kumkhat sung nun a thar ih thazang kan laknak, thazang kan pe awnak, nunphung hngil lo dingmi, ṭhanso ter ṭulmi pawl a hran ih kan ruahnak caan tin ka ruat.

2. Fang-er cu hmuhsaknak a si
Fang er ti a cang theinak ding ah karbak tam zet a um. A ngaingai ah cu fang er cu cicin thlaithlak thawn a pehpar aw mi a si. Miphun kip in an nei ve cio ko, ‘harvest festival’ le “thanksgiving” ti pawl thawn bang aw zikzik a si ko.

Fang er cang suak thei ding in cu Loo vat a ṭul, loo vat lawng a tawk lo, thlai rawl pawl cing a ṭul bet. Culawng si hrih lo. A kheu mi rawl pawl thlo a ṭul, cu hnu ah khawm a si. Fang er cu a netabik karbak a si. Ol lo. Fang er ti mi in ‘Nehnak’ ‘hluhsauhnak’ ‘aungminnak’ ti pawl in hmuhsak, in khihhmuh in ka thei.

Loo thlo pa na si lo men ding nan, Fang er ih in khihhmuh mi cu kan nun ah a thupi ngaingai in ka thei. Tu lai san ah a laifang ti hi thil har zet a si. Miṭhang so na silo ah cu ṭhangso lo na si tinak a si. Cucu IT san ih “logic” thuruat dan phunkhat a si. Tahṭhimnak ah computer ah software na install ding. Na install duh a si le an terms le policy pawl na lungkim pi a ṭul. Na hrangah click ding cu ‘Yes’ le ‘No’ lawng a um, a laifang thu khiah a um lo. Nehtu nun ti cu kum zabi 21 ah cu thil thupi tuk a si. Curuangah Fang-er puai ih in hmuhsak mi Nehnak cu ka hrangah thazang a si.

Leitlun khuazakip ih um kan Chinmi pawl Fang er nun a nei thei tu si hramuh tiin VCTH in thlaza kan lo camsak. Amen……..

Na ruahnak