Fanger Puai ihsin Fanger Nun Ah

Home » Cahram » Fanger Puai ihsin Fanger Nun Ah

By vcth on September 29, 2013.

Kan dung zarhah Mayland ih um ka rual Mangkuk thawn online ah kan tong aw. “Tulai ziang nan bang” tivek thuhla tete kan sut aw. A liam zo mi ni malte ih hlunghlai zet ih an hman mi Fanger puai thu in sim. Kei cu ka umnak hmunah cutivek hlunghlai zetih fanger puai tuah thei dinhmun kan silo zia ka sim ve. Ka umnak ahcun lai mi pahra kuam lawng kan si ih cutivek puai cu kan tuah thei lo nan fanger puai cu kan thinlung ten kan mang ringring thu, thlacam khawmnak ten caan kan hman thu tla cu ka sim ve. Cui zaan cu Fanger puai thu nasa zetin ka ruat.

Chin Vainim

Fanger tihi khawh daan a phunphun cu a um nan a san, kan hmannak a sullam cu a bangaw ṭheh ko. Fanger puai cu kan Chinmi lawng siloin miphin dang tamtak tla in an hmang ve. Thlaithar puai, kumthar puai, thlaici khawm ti pawl cu fanger puai thawn a sullam a bang aw mi puai an si. Fanger puai cu santhar sanih rak thok mi a silo, hlan lai pipu pawl san ihsin rak thok a si. Kan Bible sungah tla fanger puai thawn a bang aw mi puai tampi kan hmu thei.

Fanger puai cu thlaici khawm, thlaithar khawm puai tin kan ruat asile Fanger puai le Cicin thlaithlak, loo hnaṭuan ti cu a peh aw ding ka zum. Fanger puai kan thlen theinak dingah karbak tam zet a um ding. Fang kan er theinak dingah ziang pawl ha kan timtuah a ṭul.

Ṭiahdai khua ka um laiah Pacang pawl cu thla a rung tang, khuasik a rung tlak cun hmai kum ih a Ṭuan ding mi loo ram kha a hal cia. Cui an zoh mi lo ram cu an lung a kim le khawbawi hnenah an simih khua bawi in loo vah theinak khuan a pe. Lo ram hril cu a thupi zet. Ziangah ti le hna kum an ei in cu cui an vah ding mi lo ram thawn a pehpar aw. An hril sualih rawl a suak ṭhitha lo ahcun cui innsungsang cu an buai thluh, vava an tum thluh.

A dothnihnak ah cui an hril mi lo ram cu an vat. An vah hlanah cun hling le so, thingkung ṭenghnawng pawl lawnglawng a si ih rawl cin a theih hrih lo. Cicin thlaithlak theinak dingah cu an loo ram ṭhaten vah a ṭul. A vat an ṭheh in lo an ur. Lo ur an ṭheh in thlai an thlak. An rawlkung pawl cu duhnung um takin a rak ṭo. Cuti ih ṭha te a ṭo theinak dingah tla vanruah a thupi zet ve. An rawlkung pawl khapkhat cen hrawng an si in cu hrampi sial sak a ṭul thlang. Har an vorh sak a ṭul. An rawlkung pawl mi pil hrawng an si in cu sawn an dawt thok thlang. Cui caanah thli in an rawlkung pawl a siat ter ding ti cu thinphan a um nasa.

An rawlkung pawl cu harsatnak, thlisia, ruahsai a phunphun an pahsuak hnuah an nunnak hrangih um lo theih lo ih an ṭul mi ti le rawl a suahpi. Cui an thlairawl pawl cu mahte inn tlung thiam an silo. Thlam ah an khawlkhawm, cun thlam ihsin inn ah an phur ciamco. Cuti a dotdot in an ṭheh suak hnu ah Fanger ti mi dinhmun an thleng thei. Ṭong dang in kan sim a sile Fanger ti cu Hluhsuahni ti tla in kan ruat le a sual lo ding.

Tuni ah kan Chinmi pawl hi loo kan thlo tuk lem nawn lo. Lothloih pum a cawm aw tu cu Laimi zatekih mi mal sawn kan si thlang men ding. Mi tampi tla cu ram cangkang ah, khawpi tum pipi ah an um. Mi tampi cu zung ah, company ah, sumdawng, mahte dawr zuar tivekin a phunphun in kan cawm aw. Loo kan thlo lo. Thlai kan thlak lo, thlai kan khawm lo. Asile Fanger puai kan hrangah sullam ziang a nei lai?

Fanger puai kan hman daan cu san a thleng aw vivo vekin a thleng aw vivo ko ding. Asinan Fanger puai ih a sullam cu a thleng aw dah lo. Kan nauhak lai ihsin kan nu le pa in tlawng in kai ter. Tlawng cu ca kan thiam maw, thiam lo ah maw kan kai ve ṭunṭo ko. Tlawngkai kan ṭheh, high school kan ṭheh cun lai pacang pa ih lo ram a hril bangin kan hmai lam hrangah ziang ka tuah ding ti hril a ṭul ta. Laimi nu le pa tampi cu te le fa pawl kha Bible tlawng kai le Pastor ṭuan ter an uar nasa. Fa le pawl in an peih lem lo tla le an hnek. Curuangah si men ding kan Chinmi fimthaimnak kan zoh tikah leitlun fimthiamnak (secular education) ah kan tha mal nasa. Hlan lai kan Chinmi fimthiamnak rak neitu pawl vekin Sibawi ṭhaṭha, Engeneer thiamthiam tivek kan mal vivo. Pathian thu zir kha a ṭha lo ka tinak a silo. Keimah tla Bible tlawng kai ka si. Asinan Pathian thu fimthaimnak le leitlun fimthaimnak kha kan khaikhawn (balance) ringring a ṭul. Curuangah fa le pawl ziang an ṭuan duh, ziang talent ha an nei tiin an peih mi lamzin zawh ter hi thli thupi zet a si.

Cuti ih kan hrilmi lamzin kan zawh hnuah kan hrilmi hnaṭuan, fimthiamnak cu ṭhaten kan tuamhlawm a ṭul. Kiangkap ih hramkung pawl kan sial sak a ṭul. Cui kan tumtah mi lamzin kan zawh laiah harsatnak thlisia, ruahsia a phunphun cu a hrang ko. Thlisia ruahsai kan pah tlang thei lo ahcun fang kan er thei lo ke. Cui kan loo ih thlairah pawl tla cu loo ih tanta men a theih lo. Inn ih tlunpit tengteng a ṭul. Hmun dang ram dang ih kan hawl mi fimthaimnak pawl tla cu kan inn, in hringtu kan Chinram ih tlunpit, Chinram le miphun hrangih a ṭhahnem mi a si a ṭul. Culawngah fanger nun a neitu kan si ding.

Fanger puai a cannak karbak pawl cu nitin kan nun ah kan tong ringring. Hih fanger puai in nehtu nun a nei theitu Chinmi si dingin in sawm ringring. Fanger puai cu nikhat kan hmang ih a cem asinan fanger nun cu kan nun sung lam in hruai tu a si. Hih fanger puai kan hmannak thawngin fanger nun neitu in si ter hram seh. Fanger puai ihsin fanger nunah ke kar uhsih.

Francis Cung Bik

PS: 2009 October ih ngan mi

Na ruahnak