Farahnak le Globalization

Home » Cahram » Farahnak le Globalization

By vcth on August 12, 2014.

Francis Cung Bik

south-africa-poverty

South Africa ih buainak hi a tlangpi thu in kan zoh a sile midum le mirang karlak ih a cang mi miphun thleidannak (racism) buainak hi a si ringring. Nan kan dung 2008 May ih a cang mi buainak cu miphun thleidannak hnakin farah le milian karlak ih a cang mi a si sawn. Cui buainak ahcun midum 62 an thi. Voikhat laiih Vangro ram tiih an rak sunloih mi ram cu buainak thawn a khat. Tuiṭum buainak cu globalization ih ruangah lole (symptom) kan ti thei.

Tulia kan san ih santilaun pakhat a si mi cu hramhringnak le ti fimnak ih pem le vaih hi a si. Leitlunpi hi khua fate pakhat ah a cang. Kan leitlunpi a fate vivo vekin miphun ih a thupitnak a fate vivo. Cucu theory a si kan ti thei. Cui theory cu mihrekkhat milian, sumdawng le thunei tu pawl hrangah cu a dik ko. Cupawl cu New York, London, Johannesburg le Tokyo tivek khuapi pawl in leitlunpi a hram ihsin an duhduhnak ah an khal. Asinan hih thil ih ralkhat ah farah pawl ih nun cu pumpi khapkhat hrangah rak bui a si rero ve.

Globalization mifim le khaipa pawl in a zalen mi pursumnak in leitlun bulpak sumlut a ṭhang ter ding tiin an ti. A dik. World Bank ih report ah $2 tang sumlut kha 1981 ah 67% a siih 2004 ahcun 47% a si. 20% cu a kai. Asinan kan ruat hngilh lo ding mi pakhat cu tu hlan kum 30 ih $2 le tu san ih $2 cu a bang aw nawn lo. Ka pi in in sim ṭheu, hlan lai ah arpi pakhat ngamu (50 cent) in kan lei a ti. Tu san ahcun ngamu hmuh ding hman a ol nawn lo. Sim duh mi cu tu hlan kum 30 le tu san kan tahṭhim tikah theithiam a ṭul ti thu a si. World Bank hlei ah a dang pawlkom pawl ih research tuah mi tla kan zoh a ṭul. “World Commission on the Social Dimension of Globalization” in minung bulpak sumlut a sang nan bulpak nuntu khawsak a har sinsin tin an ti.

Joseph Stiglitz, Pursum mifim, in “Globalization ti cu farah pawl in ram lian an tung ding mi a si” tiah a ti. South Africa ram hi hi mifim pa a ti vek an si. South African Institute of Race Relations in 1996 ah nikhat sumlut $1 tang kha 1.9 million an siih 2005 ah 4.2 million an si ti a si.

Leitlunpi hi cak zetin a ṭhangso ti kan el thei lo vekin farah harsa zonzai ti cawk lo an/kan um ti cu el theih a si ve lo. Globalization hi thil um dan ṭha zet a si cu vekin farah le milian nasa zetin a thlei dang sinsin thei ve. Hi South Africa thu zoh in pem vaihnak ih ṭih a nunnak kan hmu thei, farah ih a pemvaitu siseh, neinung dinhmun ih pemvaitu siseh kan ralrin ding le theih a ṭul mi thil pawl South Africa zoh in zirnak la uh si.

Ronmi: http://www.time.com/time/magazine/article/0,9171,1812272,00.html

Na ruahnak