GFYO GS Salai Rih Lian Suhtonnak

Home » Interview » GFYO GS Salai Rih Lian Suhtonnak

By vcth on October 7, 2014.

Rih Lian Thawm

VCTH: A hmaisabik ah na thuhla tawi in sim thei pei maw? 
Rih Lian: Ka hmin ngai cu Salai Thawng Za Hlei Mang ti asinan, mi tam sawn in cu Rih Lian tin in thei sawn. Ka suahnak khua cu Falam a si. Ka Pa cu Pu Thomsa San Thawm Ling le Ka Nu Pi Khin Cer an si.

VCTH: Na fimzirnak lam pang tla in hlawm thei pei maw?
Rih Lian: Kum 2000 ah Falam in phunhra ka theh. Cuhnu ah Kalay Technological University ah Bache-lor of Engineering( Electrical Power) ka zir, 2007 kum ah B.E cu Pathian zangfahnak in tluangten ka theh suak.

VCTH: Singapore ah Engineer dinhmun in hna na tuan rero tiah kan thei ih, tuanvo na lakmi pawl in hlawm thei pei maw’?
Rih Lian: Tu ka tuannak company hi Japan company a si ih a biktakin Electronic connector pawl kan tuah. Electronic connector cu tulai Smart phone sungih an hman mi a si ih a biktakin Samsung le Apple phone sungih hman mi pawl an si.

Kei kan company ih kan tuanvo lak mi cu himi electronic connector tuahnak Cet (machine) pawl tuahnak department ah ka tuan. Machine control system le wiring lam a hleice in tuanvo ka lak.

VCTH: Tlawngta lai ihsin cangvaihnak pawl ah na rak tel tin kan thei ih, pawlkom cangvaihnak na tel dahmi pawl in sim thei pei maw?
Rih Lian: Phunsang Tlawng ka kai lai thei tawkten tlawngta cangvaihnak pawlah ka rak tel ve. Mi duhsaknak ruangah tlinglo cingten hotu dinhmun in FPTP,Kalay & FPTP,Falam ah ka rak tuan dah.

VCTH: GFYO a rak dinsuak dan thuhla teh in hlawm thei pei maw?
Rih Lian: GFYO timi cu ram le miphun hrangah- mino dinhmun in a cang thei tawk in zuam ding timi ruahsannak thawn 2011 Feb (20) ni ah online ah thurel khawmnak nei in rak din mi a si. Falam timi Geography a mawiter ding in kan zuam pei timi hi kan thulu bik a si.

GFYO sungah- tutiang active zetin a tel rero mi ram pawl cu- USA, Canada, England, Sweden, Switzerland, Norway, Singapore, Australia, Korea le ramsung (Kawlram) pawl an si. Tel hrihlo mi Mino pawl tla kan sawm khawm rero lai cu a si.

VCTH: GFYO ih a tu laifang ih hohatu pawl thawn tla theihternak in tuah sak thei pei maw?

Rih Lian: GFYO ih hohatu pawl cu
1) President – Salai Cung Nawl Thawng(Korea)
2) Vice President-1 – Salai Van Cung Lian( UK)
3) Vice President-2 Salai Phun Hre Mang(USA)
4) General Secretary- Salai Rih Lian Thawm( Singapore)
5) Secretary 1 – Salai Van Bawi Lian( Australia)
6) Secretary 2- Salai B.A Thang(Switzerland)
7) Secretary 3- Salai Michael Naing( Falam)
8) EC member Salai Thomas Lian(USA)
9) EC member Salai Biak Tin Cung(USA)
10) EC member Mai Esther Hrang Hlei Dim(USA)
11) EC member Mai Sui Cer Chin(Singapore)
12) EC member Mai Tete Cinzah( Australia)
13) Salai Francis Lal Uk (EC Member)
14) Salai Samuel Lian( EC member) pawl an si.

FYCVCTH: GFYO ih rak tuan suak zo mi pawl ziang a si ti in hlawm thei pei maw?
Rih Lian: GFYO hi kan dinthok pek ihsin thei tawkten khua le ram hrangah kan tuan rero. Kan hnatuan mi sung ihsin a hrekkhat.
a) Falam khuasung um Nu le Pa kum(70) tlun hmuahhmuah upat peknak le laksawng peknak kan nei thei.(13 May, 2011).
b) Feet(440) sau, karbak-169 um mi Sayakyi Van Kyi lamzin tuahsuak ( July, 2012)
c) Online English-Falam Dictionary ( Sayakyi Van Kyi ih English-Falam Dictionary) tuahsuak thei.
d) Leimin tuar Lian Rih Khua pawl hrang ei-in dingah Siti le fangcang thawn tanpinak kan nei thei. ( 2014).
e) Falam sizung hrang tidai khawlnak ding hrangah Ti-inn kan dawlsak thei. (2013).
f) Saya Run Cung Mang thawn online ihsin laica zirnak kan tuah ih youtube ah zoh theih a si. Sunzom ih peh vivo ding a si lai. (2014)
g) 2013, May ah Falam khua sung um mi Nurse kai rero laitu le mino hrekhat hnenah Ram leng ih scholarships thawn tlawngkai peh daan ding Seminar kan tuah sak thei. Himi thusimtu cu GFYO palai Mai Sui Cer Chin a si ih amah hi Singapore ah Nursing thawn tlawng theh mi a si.

Editor Note: GFYO cu 2013 December 28 ihsin January ni 2 tiang Falam ah rak tuahmi Falam Youth Conference cang suak ding hrangah tawlreltu bik an si.

VCTH: Tu laifang GFYO ih nan tuan rero mi pawl te ziang a si? Hmailam ih nan sunmang pawl the ziang a si?
Rih Lian: Tu ih kan tuan rero lai mi hrekkhat pawl cu
1) Kan Chinram ah tourist tampi an rak duh theinak ding ruahsan in Chinland Tour Guide timi website tuah rero lai a si. Falam lawng siloin Hakha, Tedim tvk kim thei ding in tawlrel rero lai a si.
2) Falam Sizung ih tuam hlawm aw theu tu hrangah rawlsuannak coka an tul zet ih 2015 ah sak thok thei ding tuhi fund raising kan tuah rero lai a si.
3) Pipu hlawmthil kilkhawinak Project- Himi cu kan pipu rak hman dah mi khuang, daar, fei tvk pawl hi tulai ah hmuh ding a har vivo. Kan kil tha lo cun kan tefa san ah cun hmuh ding a um nawn lo ding. Cumi ruahsan in kan thei tawk, hmuh ban tawk Pipu thilri kilkhawinak project tuan thok zik rero a si.

GFYO ah ram tin ihsin zirsang le rinsantlak mithiam tampi tla in telpi. Cunah kan ram thansoh thei nak dingah technical support lam siseh, ramsung ih cathiam hrekhat tete ramleng tlawngkai duh maw pawl hrangah ruahnak peknak tvk tete pawl tla hmailam ah tuan thei vivo ding kan tumtah.

VCTH:  Mino hruaitu pakhat dinhmun in- khua le ram hrangah na sunmang siseh, na ruahnak hi ziang pawl a si?
Rih Lian: Tusun ih mino cu thaisun ih hruaitu ding a si bang in mino hi kan thupi tuk. Ahmaisa ah kan ram kan tuah that duh ahcun kan mino pawl kan thuruah daan, kan hnatuan daan kan rem that hmaisa a tul. Kan remtul ih kan hmuh mi hrekkhat cu

a) Thil pakhatkhat kan tuah tikah thupi (serious) in ka lak dah lo. Capoh le ngai poimawh lo zetin hna kan tuan theu.
b) Hna pakhat kan tuah tikah a theh tiang tuah loin laklawh ih cawl kan hmang . A dangdang ah kan kat vivo. (Eg.Pawlkom kan din ih hnatuan suak ngai loin a dang pawlkom thar kan din vivo)
c) Kei hi ziangmi si kan paih ih ziangmi si ka thiam thei zawng ti mah le mah kan thei awk a tul.
d) Ca pakhat ka siar mi sungah “ Mi pakhat kha nga na pek asile a zing khat a rawl ei ding na pek. Asinan nga siau daan na zirh asile a nunsung ei ding na pek ti nak a si”. Fim thiamnak hi thupi zet ruangah mino pawl cun zir bet vivo ding thazang ka pek duh. Fim zirnak ah a tlai tuk zo ti a um lo. Fimthiamnak in a hmaisabik ah kan mah bulpak/innsang hrangah kan hlawkpi. Cutheh hnu ah khua le ram in kan hlawkpi ve thung. Innsungsang hman in hman thei lomi cu miphun hrangih rintlak si ding cu a hla zet.
e) Ruahnak bang awlo mi thawn le a bur(group) thawn hnatuan tlang kan zir pei uh. Kan mino fim zirsang le mi neinung kan tam pi nan a bur ih hnatuan tlang kan thiam lo mi hin thonsohnak ding tampi in dawnkham. Pawlkom pakhat ah mi kan tam deuh le sumpai kan nei deuh cun then aw ding kan man ringring. Cunah a bur ih hnatuan tlang kan zir vivo a cu thlang.

VCTH: Ramsung, ramleng mipi pawl siseh, mino pawl hnenah siseh sawm duhmi, cah duhmi pawl teh ziang na nei?

Rih Lian: Singapore hna ka tuan pekih ka ton mi harsatnak thawn ruahnak ka peh duh mi um. Japanese le Singaporean pawl thawn hna kan tuan tlang hai ih an nih line pakhat ah professional zet in thil a thiam ih thildang cu zianghman an thei lo lawlaw. Kei Kawlram ih rami cun theimi ngaingai zianghman ka nei lo ih thei lo mi ngaingai khal ka nei ve lo lala.
Sim duh mi cu thil pakhat kan tuah mi hi professional lawlaw ih thiam ding ko in tuah ding kan si. Kan ram thonsoh dingah Politician, Historian, Doctor, Engineer, Business man tvk in mah le zin te ah thiam thei bikin zuam cio sehla fimthiamnak thawn a khat mi miphun cu thangso tengteng ding ka si.

T’himnak ah kan Falam ah Private Bank, Mawtaw tuahnak Factory pipi rak din sehla kha mi factory ih hnatuan thei tu ding skill workers paziat kan um pei? A tuan bantu ding kan um lole mi phundang in an lak theh ding.

Cunah kan mino pawl ready thepthep kan tul zo. Kan ready lo asile opportunity a ra thlen tikah midang in lak sak cing cing. Ramleng ih ummi mino pawl, Pathian in Laimi si dingin in sersiam zo ruangah khuinah ram kan um khal asile kan Laimi sinak (Identity) hlo loin kilkhawi cio uh si.

Na ruahnak

6 Responses to GFYO GS Salai Rih Lian Suhtonnak

  1. Thawng Thawng   October 21, 2014 at 4:25 am

    Thu suttu le thu sawntu nan tawk riai.
    Salai Rih Lian, Ram le Miphun hrangah Pathian in lo hmang vivo hram seh!