Hlansan Tlaisun Pawl ih rakbiak mi Khuavang: Kim Lian

Home » Cahram » Hlansan Tlaisun Pawl ih rakbiak mi Khuavang: Kim Lian

By vcth on September 20, 2014.

Kimlian Tlaisun

Thuhmaihruai:

Mi nung kan thuanthu kan zoh tikah, Biaknak hi kan nunphung ih amuril ah kan rak ret ring ring. Hlan lai san khal ah kan pi le pu pawl cu Khuavang/ Khawsia biaknak in caan an rak hmang. An dam lo khal ah, puai an tuah khal ah, khual an tlawng ding khal ah, ral an do ding khal ah, ziang tin kim an tuah nak ah Khawvang biaknak hi a tel ring ring. Siatnak an tong tik khal ah Khuavang ih hremnak a si tiah nasazet in an rak zum. Tusan khal ah, Christian zumtu pawl in Pathian kan nun ah kan telh ring ring vek in, an nih khal Khuavang biak nak hi an san lai ih nunphung muril ih um pakhat a rak si ve. Khuavang a rak biak khal an um. Khawsia a rak biak khal an um. Khuavang cu minung hrang ih thatnak lam deuh a tuah tu tin ka ti seh la ka sual ding ka zum lo. Khawsia cu minung hrem paih, huatsuak deuh pawl an si tin ka ti le ka sual ding ka zum lo. Khuasia le Khuavang khal ah characters phun phun in an rak um. Khua pa khat in an mah te biak mi Khuavang/ Khawsia an rak nei cio. An biak dan khal a rak bawng aw lo. Tahthimnak ah Tlauhmun in Uiko lungpi an rak biak. Tlaisun pawl khal in an khawtaw ih um lungtumpi Kim Lian an rak biak. Cun, Van Khawng timi khal an rak biak. Cui, lungtumpi um nak cu an um nak inn tiah zum a si ih, hmin an rak nei cio. Himi cahram ah cu, Tlaisun pawl ih rak biak mi Khuavang, Kim Lian thu ka rak sim ding. Van Khawng thu khal ka rak telh phah phah ding. Kim Lian cu khuavang hmin a si ih, a rak um nak inn ti men seh la, Lungtumpi cu tuni tiang a um lai.

Kanauhak lai ten Tlaisun khua ka tlung theu ih, Tlaisun khua lut nak “LuOng” timi kan thleng in, Run lam kan zoh theu. Run ti cu blue colour in a rak lang theu. Thing keuh thei lo nak kham hrat zet khal hmu theih a si. Cui kham cu Zawngmual tin an ko ih kum tin nasazet in lei a min ring ring. Ka nauhak lai ten khihmun cu a huai tiah in rak sim ring ring. Ka u pa hnu ih, thuanthu lam ka zingzoi tik ah kan laidan pawl hi kan interest zet. Falam Youth Conference lai ah, Tlaisun ah nauhak hrang anki hlu ding in ka feh lai ah, hlanlai ih kan rak biak mi Lungtumpi, Kimlian timi va zoh ding um so khaw tiah khawpi pawl nih in rak sim. Ka nauhak lai ah a hmin an rel hman ka ttih theu mi, tuahcu va hmu ding ka phur tuk. Kim Lian va zoh dign in cu, mei thal, namte, tidai pawl keng in kan suk. Kim Lian cu Tlaisun khawtaw, Run tiva kap ih um mi a si. Tlaisun khua, Pu Con Bik rak um dah nak hmun in sin minungs 45 hrawng kan suk hnu ah, tupi sung ih um Lungtum pi pa khat ah kan thleng. Ka mitthlam ih ka rak hmu cia vek a si lo. Ka hmu dah mi si lo nan, an sim nak pawl in, ka ruat ah lung thuam pi ih support mi Lung pheng tumzet pi khi va hmu ka tum. Nan, cui lungpi cu cang ih a benawk mi lung tum pi cu a si. A tum zet. A sau lam ah pi 70, a sang lam ah pi 50 hrawng le a thuk lam ah (a lang zet) pi 20 hrawng a si. A kiang kap ah lungto dang khal an um lo, a mah pi lawng tum tak tak in a to. Ka thelng pek te cu ka ttih zet, ka ning ttih ciamco. Nan, malte ka um in ka ttih nak pawl a hlo thluh.

Ziangtin thil an ti thei?

Himi hmun kiang ah rua le thing hau ding a rak tam zet. Cui thing pawl hau ding ah Kim Lian hnen ah rai thawi ta lo si len mi a hrem hlei ah thih nak tiang khal a rak thleng ter thei tiah ka Pi in I rak sim theu. A duh zawng tuah lo le, khua sung khal ah natsia a phun phun in a thleng ter thei tiah khal thuanthu thei u pa pawl in an rel theu. Cun, ral an do zik ah, bawmnak an tul ah Kim Lian hnen ah vok, ar, arti, arsa thawn rai thawi hmaisa ta ring ring a si. Kim Lian le Van Khawng cu kum 7 ah voi khat siapi thah ring ring an rak si. Kim Lian in thil ziang kim cu a tuah thei lo. “Tipi thuanthum nan lan hnu cu ka lo kil khawi thei nawn lo” tiah Tlaisun upa pawl in an rel theu. Van Khawng cu Kim Lian hnak in a thil ti thei mi a mal deuh. Tlaisun mi pawl Kawlram ih an feh khal ah, Kim Lian an biak ta ih, Kim Lian in a kil him hai tiah an rak zum. An rel theu ih, pakhatpa cu Mawlike ah training kai ding ih a feh ih, Kim Lian cu an kil ter. Cupa cu a huat suak tuk lawm mam ih, Kim Lian in hi vek mi huat suak lawm mam cu ka kil paih nawn lo tiah a kil nawn lo ti si. Khuavang hman ih kil thei lo khop khop ih huatsuak pa tiah cupa cu a hmin a thang.

Japan ral lai ah, Tlaisun khaw sung cu Mirang pawl in vanzam thawn bomb an rak thlak ih cuilai ih Taisun miuk Pu Van Hmung cun Kim Lian le Van Khawng hnen ah bawm nak a rak dil. “Kim Lian aw Van Khong aw” voi sahra khua a sam ruang ro.

Ziang Tin Kim Lian an rak ko/biak?

Khuavang/ Khuasia le milai rak peh tlaih awk dan cu an rak bang awk deuh thluh. Khuavang le minung kar lak ih a pehtlaih sak tu Raithawitu lole ‘Pol’ timi an rak um. Cui, ‘Pol’ cu a mah Khuavang in a hril theu. Pol cu mi bang lem lo an rak tam. Cui Pol hnen ah Khuavang pawl in milai pawl ih dil mi tuah sak nak ding ah, ziang tuah a tul tivek a sim. E.g. Tlauhmun ih an rak biak mi Uikio khal in a mah ten pol a rak nei. Hlan lai ah Tlauhmun ah hin, Cikhur pa hnih a rak um. Cikhur pa khat sawn ih um Khawsia cun “hmul nei lo mi” in pek uh tiah a rak dil. Cutin, a dil mi cu ‘pol’ in mipi hnen ah a sim. Mipi in hmul nei lo cu ziang si pei tiah an ruat ih, arti an rak pek. Cun, Arti ka ti mi si lo, minung ka ti mi si tiah a sim ih minung cu khuapi pawl in an rak pek duh lo. Curuang ah Cikhur a pit/kang tiah thuanthu a um.

Kim Lian khal hi vek tho tho a rak si. Raithawitu an rak um. Raithawi tu pa in zuuthawl (haiku) sung ih zu a hmawm ih voithum a phuut hnu ah

“Aarte thin aw, Kim Lian aw, Van Khawng ruk ko law,

ka zu hai khat rung zawh law,

ka zuu hai khat aw, hai hra ah cang seh law,

ka sa sem khat e, sam hra ah cang seh law,

a lei vak a van zam in e, ttung u law,

ka sing tuk law, ka tuang tuk law”

tin a ti hnu ah zuu a in sal ding ih voi nga a phuut sal. ‘Mualpi Buan’ an ti ih, santhar tong in cu ‘kumtin thlacamnak’ kan ti pei cu, Himi mualpi buan tik ah sia cang kum tin an that ring ring. A can can le siacang kha a tial tel lo ding, a dum teng teng a si ding ti vek in Khuavang ih an dil theu. Siacang an that ih khuasung mualpi tang ah hitin thla an rak cam.

“Kan hmual pi ah aw, ka pa Kim Lian ee, ka pa Van Khawng thawn e

sia cang sa i tawm za pung khi ee,

ti lu ruah thawh ka hnik e, van khawng ruah thawh ka hnik e,

cah nak ka hnik e, nun nak ka hnik e,

ka khua sungah e, nat sia am reh seh law,

ka fei e sau seh law, ka nam e sau seh law,

na khua ah e tha ten ping law”.

Cun, kum 7 dan ah Kim Lian le Van Khawng hrang ah a cik pak ten buan nak ‘Kim Lian buan’ le ‘Van Khawng buan’ tin khal a um. Kim Lian an buan tik ah sia cang pa hnih kum sarih ah voi khat an that ih, Van Khawng an buan tikah sia cang pa thum kum 7 ah dan in an that. An ko dan cu a bang awk. Raithawn tu pa in Haiku (zuuthawwl) sung ih zuu voi thum a hmawm in a phuut hnu ah

“Aw, ka pa Kim Lian/ Van Khawng aw,

na thuam e lo tuah ha lang law,

kan ta hang ben ha lang law,

nate na fa thawn e, na lo ri e na suah pi e lo sawm ha law” tin thla an cam theh in zuu voithum an phui.

Khawsia/ Khuavang biaknak ziang tin a rak cem?

Falam pengih Christian zumtu hmaisabik hi Lumbang ih Pu Thang Sin a rak si. Tlaisun mi Pu Sim Tei khal cu, Pu Thang Sin ih Pathian thu simnak thawng in 1927 kum ah a rak piang thar ih tipil a rak inn. Tuni tiang a mah u pat nak ah “Pu Sim Tei cu nineteen twenty seven ah tipil a in” tin khuate hla vek ih sammi a um. Pu Sim Tei cu Tlaisun khua ah Pathian thu sim ding a feh ih, mipi in an rak duh lo. Lung in an rak deng ih buai nak an rak pek ciamco. Mipi in, miuk Pu Van Hmung an rak dawn ter nan, Pu Van Hmung cun Pathian thu khal a sim ter lo, a si nan a sim khal le a rak kham lo in a rak zoh men. Darkhing pakhat Pu Sim Tei hnen ah a rak then. Cutin, Pu Sim Tei ih Pathian thu sim nak thawng in, Tlaisun khua cu Pathian zumtu ah an rak cang. Tlaisun khua cu Christian ah an lut vivo ih, Kim Lian le Van Khawng khal cu biak an theih nawn lo tiah Pu Thang Dun in i sim. A biak tu an um lai ko nan, WW2 theh hnu lam in cu, ko khal a theih nawn lo tiah i sim. 

 Tuck and Carey ih simmi Kim Lian

Tuck and Carey cauk ka siar hmaisabik ah, Kim Lian thu an sim mi a um nak ka rak thei fiang lo. Kim Lian lungpi ka va zoh hnu, a thunthu ka thei hnu lawng ah an sim mi hi fiang ten ka rak thei. Tuck and Carey cun

“The Falam Chiefs have a sacred grove, within which is a large and curious rock which is used as an altar, on which are laid food, Sacred grova of feathers, and odds and ends. This grove happening to be near the place where the suspension bridge is built. We cut some of the trees for bridging material; the Chins were much alarmed and prophesied disaster and, when an accidental fire shortly afterwards destroyed a large portion of their capital, they at once exclaimed that the disaster was the result of our inconsiderate conduct to the spirit of the village, who had naturally avenged the insult not on us, but on them, as they are under his control”.

Himi an sim mi ih “large and curious rock” timi hi Kim Lian lungpi a ti duh nak a si. Cun, “suspension bridge” a ti mi cu Tlaisun pawl in “Suangpi” lilawn tiah an ko mi a si. Kim Lian lungpi ih sin Suangpi li lawn cu a nei te si. Kei khal cui lilawn cu ka va zoh ih, lilawn cu hmuh ding a um nawn lo, a cang ih tlakrawh dawl mi pawl lawng hmuh ding a um. Cui, lilawn cu Wim Verest: The Lost Dictionary timi ih cauk sung ah, memory ih sin suai sal mi pakhat a um. Van Khawng lumtum cu hmun dang deuh ah a um nan ka thleng man lo. Kim Lian thu video ka tuah mi khal a tang ah zoh theih a si.

Thunetnak:

Tusanah cu Tlaisun khua cu Christian zumtu ah an rak thluh. Khuavang/ Khuasia biaknak ih sin a nungmi Pathian biak tu ah an rak cang thluh. Hitin an rak cang thei nak hi lairam sung ih a ra lut tu Missionary pawl ih teimak nak in a thok mi a si. Tuniah, zumtu kan si thluh zo nan, kan pi le pu pawl ih thuanthu cu, ziangvek a si khal le, an fim nak ih a rak daih sun, a tha bik tiah an rak ruat mi daan in an rak uk awk, a tha bik tiah an zum mi biaknak pawl hi theihtha a si tiah ka rak ngannak a si.

Ref:

1)      The Chin Hills by Tuck and Carey

2)      Capt Tha Lung notes written in 1976.

3)      An interview with Pu Thang Dun (100 years old) currently living in Tashon village.

4)      Collection of Tashon culture and history compiled by Pu Siah Luai & XXXX.

Na ruahnak