Hminthannak

Home » Cahram » Hminthannak

By vcth on October 30, 2013.

Francis Cung Bik

Hminthannak ti hi Pathain thluasuah pakhat a si ti sehla a sual lo men ding ka zum. Ziangah tile hminthan a duh ta piang le a zuam tu poh in tla hminthan a theih loih hminthang ding hrang a ruat lo nan an sinak le nun in hminthannak a sarsuak tu tla mi tampi an si ve.

Vincent Van Gogh– Zuksuai cu an nunnak ih ṭhenkhat a si. Hminthan ding a tum ding tla ka zum lo. Modern zuksaui dan tla a sarsauk tum ding ka zum lo asinan leitlunpi Santhar (modern) ih a her aw tum rero lai fang, ruahnak lam (philosophy) in tla siseh, Calai le ram kaihhruai aw daan in siseh, cui san ih dilnak, ṭulnak in a hnaṭuannak cu man a nei zet mi ah a can ter. Santhar leitlun ih hmuhnak le tuarnak (feeling) thawn a deng aw mi a hnaṭuannak in leitlun sandeng tiang ih a tang ringring ding mi hminthannak a pek.

Kurt Cobain– Laiphunsuah ni or Chin phunpi Feb 20 ni ih a suak mi pa te, mi saul pa te, nu duh lo pa huat an ti bangin duhdawt tu ṭhiṭha nei lo pa, leitlun Alternative rock (Grunge) ih pa dinhmun in leitlun Rock awnmawi thuanthu ih hngilh theih lo mi a rak cang. Tisuar bang ih a let aw rero mi kan san ih dilmi thawn milh aw in a khir a zuang ngah tu a rak si. Cobain cu Alternative rock tuah a tum dah lem lo ding nan nitin ih a nun, a cangvaih le a thisen cu alternative rock a rak si sawn.

Leitlun ih a tlangleng rero tu mi pakhat dinhmun in kan hmailam hrang le kan ṭhatnak ding hrang cu khua kan khang cio. Ziang maw caan ah milian mak ta ra tla si kan tum, hlasak hminthang tla maw si kan tum, bawhlung sitthiam maw a phunphun cu kan it hlan te ah maw kan sitkuzin ve ṭheu.

Kan idol a si mi pa maw nu cu kan uar zet ih cu vek cang ding kan tum ṭheu. Kurt Cobain uar zettu ka theih mi mi hrekkhat an um. Amah vekin leitlun alternative rocker hminthang an cang tum, asinan a cawng thei sun cu zuuvatnak lam lawng ah a si . Van Gogh uar zet tu hrekkhat zuksuai ṭhaṭha suaisuak thei ding in Van Gogh vekin an um tum, nan zuksuai ṭha lamlam rilrawng le tairek in an tlung. Isaac Newton vekin gravity maw physic theory pakhatkhat sarsuak tum in apple kung tang ah to rero sehla mitkuh in kan sing sawn men ding. Archimedes vekin Mathematics theory tong tum in ti sung ah dawp sehla tu lai khawsik thawn raibur in ka tlung sawn men ding.

Cu pawl ruangah si men ding hminthannak thawn ka rak hlat aw……….

Hminthannak

Na ruahnak

4 Responses to Hminthannak

  1. Justin   January 10, 2010 at 6:21 am

    Francis,

    Himi na cahram hi cu ka duh tuk~ Na titha riai ! Run ngan vivo aw. thukpin siar le thukpin a thei aw..

    Justin

  2. Pabawih   January 10, 2010 at 3:31 pm

    Duhdawtmi Ca Ngantu

    Na ca ngan mi hi ruat ding ih tlak (thupi zet) pa khat in ka hmu. Na ca ngandan a ttha zet ruang ah na simduh mi leh hi ca sung ih ruahnak ummi ka thei fiang in ka thei´aw aw. Tuluk philosopher Yang Zhu (370-319 BCE) thawn tla nan ruahnak nan ttawm´aw zet a bang. Yang Zhu cun, "minung ih kan zuamnak/tuahnak hi zianghman a si lo, kan van (destiny) sawn nih ziangkim a tthencat." ti´n a rak ti.

    Himi ruahnak hi ttawmpi in ruat vivo sehla "minung nih zianghman kan tuah a ttul lo" tihmi ruahnak lam ah a feh thei kei maw? tih mi ka rawn lo pawlh duh a si.

    Upatnak thawn..
    Pabawih

  3. VCTH   January 16, 2010 at 3:38 pm

    Ka ti duh mi cu, minung ih tuahnak ttuannak a thupi lo ti asi lo, kan tuah ttuannak lawng a tawk lo ti sawn asi. Kan tuah kan ttuan mi sentiluan thawn a deng aw a ttul a milh aw a ttul. Kan san thawn "timing" rual rem aw zet a ttul. Cu tin ka ruat.

  4. Pabawih   January 19, 2010 at 9:32 pm

    A yaw. A tthat daan cu, na sim mi cu. Ka lo tthauhkhan nasa. Mah le mah thei awk hi a har tuk ngai, kei tla a hlan ah hlasak thiam ve zet ah ka ruat aw ih hla ka rak sak paih nasa. A si nan ka aw a tthalo tih ka theih fiang hnu, tu cu mipi hmai ah a ttul tuk lawng ah ka sak ttheu. 🙂 In sim fiang ih ka lung awi.