Hnawm in Sui le Ngun ah

Home » Pursum » Hnawm in Sui le Ngun ah

By vcth on October 1, 2010.

Francis Cung Bik

Nauhak pakhat in zin kapah Plastic dawng sia a hmu, a sit. Hnawm sar pa in a sar, a zuar ih peisa ah a can. Nauhak pa ziang ih a siar lo mi, hnawm sar pa hrang sum lut. 

Leitlun milain hminthang tampi lakah ziang ciamco lo ten a rak hangso mi an tampi. Kan mah vek mizaran an rak si dah ve ko. Asinan kan hrangih ziang a si lemlo mi an nih in sui leh ngun ah a can. Mitampi kan thinlung sungih a um mi cu a ziin( sum hrampi) nei lawngah pursum theih, len a thei ti zikzik in kan ruat.
A si tuk lem lo ding a bang. Leitlun milain pawl zoh hnik sehla mi paziat ha milian sungsang in an suak. Leitlun kan ti duh hril lo ding, kan Falam te zoh hrih sehla, kan Falam Milain na theih sun tete kutzung khiak in hril hnik aw. Mi pa ziat ha milian fa an si. A ziin(Sum hrampi) tom hlom thawn an hnauan an thok maw?
Kan hmuh mi, in mi ti, ei mi rawl, ni le khua, kan ngah mi caan a bang aw ciocio nan mi hrek khat cu cungsang ah in zuang san. Vuk tin an hangso. Ziang ruangah si pei, na ruat heu maw? Maw, an van nei ha! Hih hansonak ah hi fimthiamnak sang zet nei fekfek tla cu a ul tuk lem lo, nan khurkhua ruat thei cu a ul. Kei cun an van nei ti ongfang ka hmang lo, an kiangkap ih ul mi thawn a deng aw ih thil a tuah thiamtu le a tuah ngah tu ti sawn in ka ruat.
Kiangkap thil um tu daan khaikhawm thiam in, teimak, lungdong lo in a zuam uno tu cu dinhmun pakhat khat tal cu an hluh suah ding ti ka zum, milar bik le thiam bik ti an si lo hman ah. Ram hangsonak um pawl hrangah caan ha zet a si, silo bik in computer, internet, meisa, tidai, ei le in ah kan buai lo, a hangso mi thil le ri, nunphung, ruahnak, minung pawl thawn um tlang uan tlang ti mi man a nei zet mi experience kan ngah fawn. Teimak ten kan zuam ahcun kan hrangah lamzin a um. Cuvek hiamhiam in ram hangso rero lai ram ih um pawl tla kan hrangah caan ha zet a si ve thotho. Ran hangso ram ih um pawl hnak in tik cu caan kan nei tam sawn. Kan siar thei kan zir thei, kan hlet hlai thei, training tete kan kai thei. Cutin kan teimak ah cu dinhmun pakhat tiang thleng thei cu kan si ve. 
Cutin kan hmai ih a um mi thil, thli lak ih a um mi thil Sui le Ngun ah can uh si………
Na ruahnak