Hnihsuak Thungai (7)

Home » Cahram » Hnihsuak Thungai (7)

By vcth on May 16, 2010.

Johnlsl

A fim sawn
Sherlock holmes a hringsuaktu mirang canganthiam K.Doyle(1859-1930) cu dawi thuhla lam a paih tuk ruangah a man tinten nasa takin a zingzoi ringring. Voikhat cu Barnard Shaw tla a lamṭang ve vivo dingin a hei relpi tum. “ A mak tak ko lo maw, ka baan ka pharh veten hih cabuai hi dungah a kir cih mei”
Shaw nih, “ Mangbang ding a um sawm, a fim sawntu cu dungah kir hmaisa ringring a si ko lo maw”

Man nei
Taluk philosopher Mozi cu a dungthluntu pakhat nih ‘ṭong tam hi ṭhathnemnak a um maw?’ tiah a sut.
A let sal mi cu, ‘Sullam neilo mi hlir tlawk rero cu ziangsi a ṭhahnem sapbei ding. Kawkorh khi zoh hnik, sun zaan in a au, a dang hmuah kuai zik ṭheh, nan, mi nih ziang an sair cuang lo. Arcang khi vun zoh hnik, nikhat ah voi hnihthum lawng a khuang, nan, mi nih an ngai ṭheh, khua a vang thlang ti an thei, man a nei mi lawng ṭong ding kan si’

Timtuah nun
Nikhat cu Alexander siangpahrang hnenah khuat-hai mawi taktak pawl laksawng an ra pek. A zoh ih mawi a ti tuk, a duh ngaingai. Sinan cui phan-khuat pawl cu khuai ṭheh uh tiah thu a pek. An theithiam lo, an mangbang ti a theih tikah a khuai ter nak san a sim hngai.
“Caan a rei vivo le hi khuat pawl cu ka hnenum pawl nih an thlak ngah leh ding, an ti sait tengteng leh ding, an kuai ter leh ding, cu tikah ka thinheng ding, ka kawk hngai ding, ka riahsia ding, khuat pakhat an ti siat tinten kan buai tuk ringring ding ruangah a tu voikhat thinnuam lo nak in ka cem ter sawn mei”

Thukam phelh lo tu
Russia siangpahrang a pakhatnak Alexander ih rinsanmi a kut-hnuai ih bawi pakhat nih voikhat cu siangpahrang hnenah thil pakhat tuahsak dingin a ngen. Siangpahrang in, “I sim aw, na duhduh ka lo tuahsak ding” tiah thu a kam.

A rak kenmi cazual parah a kut nam dingin siangpahrang cu a hei pek. Cucu, ralram ah a kut-hnuai ralkap pawl tansan in a tlan ruangih thawng a tlak mi ralbawi pakhat kha thawnginn ihsin kumkhua luatter ding ti a si. Siangpahrang cun ṭong loin a kut a nam. Cui luatnak cazual cu a milai pa’I kut ah a hei pek phah ah “Nangteh ka duhnak pakhat ten i tuahsak thei pei maw?” Anih in, “Na duhduh i fail aw, tuah dingah ka man ringring”
Siangpahrang cun, “Na kut sungih cazual kha thlek aw”. A mithmai a sia, nan, tingaihnak um lo, a thukam vekin a thlek ve ta riai.

Lungawi
Poland mi, khawvel ih violin tum hminthang Wieniawski(1835-1888) cu a music thapektu milian pakhat nih a music alak ih ngai beisei phah ah a inn ah suncaw ei ding le lakphak in dingin a sawm. Cule, “A remcang le na violin tla rak keng phah hmem” a ti.
Anih in, “Ka violin tla na sawm cih ih a ai-ah lungawi thu ka lo sim, sinan a nih cu suncaw a ei thiam lo ruangah suncaw ei nak ah cu a tel thei lo ding”

Curuangah panteh
Asangci, milian pakhat inn ih tuahmi violinist thar theihternak le a awnmawi hmuhsuahnak puai ah ra tel ve dingin Barnard Shaw cu an sawm. A thiltum ṭheh ah inntekpa nih Shaw hnenah, “Ka mino pa ih awnmawi thiamnak le kut-awn parah ziangtin na hmu, khawvel ih hminthang si ding ko in ka tuah sak ding, ziangtin na ruat” tiah a sut.
Shaw in, “Hih mino pa te ih kut-awn ka ngai in pianist hminthang Pederewski ka mang rori”
Inntekpa nih mangbang in a sut, “ Pederewski cu ziangtik hmanah violinist a si dah ual lo”
Shaw in, “ Curuangah panteh ka lo ti”

Na ruahnak