In Duhdawttu Ka Pi

Home » Cahram » In Duhdawttu Ka Pi

By vcth on June 28, 2013.

Francis Cung Bik

Minung pakhat kan sinak ah ziang hi a thupi bik tiah sut aw sehla, thulehnak a phunphun a suak ko ding. Kei tla mi in hih thusuhnak in sut ve sehla, “tlaitluan ih duhdawt ringring tu, thlawsuah pe ringring tu neih hi a si,” tiah ka let ding. Duhdawtmi kan nei, cu vekin miih duhdawtnak co ngah ti hi a sunglawi ih Pathian thluasuah pakhat a si. Kan leilungpi kan zoh hnik pei, minung ziang maw zat cu duhdawtu ṭhiṭha nei lo in an riang an vai, mual za an liam. Hih thu ka ruatah kei cu mi vannei tak ka si, ziangah tile tlaitluan ih in duhdawttu “Pi” catbang lo ih thlaza in cam sak ringring tu, thlawsuah in pe ringring tu “Pi” ka nei.

Leilung thlu pitar hmuahhmuah lakah ka pi hi ka uar pawl a si. Zohṭhimtlak pitar pakhat tla a si. Pitar tifam in zingpit ten, ar viohnih khuan hrawng in cu a tho zo. Cun ziang dang a tuah hlan ah a tu le fa pawl hrangah thlacam a thok. A caancaan ah kan itthat lai ah a ra ih kan lu parah kut suangin thla in cam sak. Leitlun ih minung pawl lakih mi pakhat si thei ve dingin thlawsuah in pe.

Culawng sihrih lo ka pi cu mi law zet a si. A pasal (ka pu) in a thihsannak a rei zo. Ka nu te an nauhak lai ten a si zo. Ka pi cun nuhmei dinhmun in a fa le panga an pi tling tiang, amah lawngin a cawm. Thufim 31 sungih zohṭhimtlak nu an timi bangin fa le hrang, tu le hrangah khua a khang theitu a si fawn. Cun hnaṭuan a teimak, a law ngaingai. A tar kuun tiang, a mit khua a hmu nawn lo tiang hman hnaṭuan ding a hreh lo. Tu le fa pawl in hnaṭuan hlah ti ih dawn rero hman ah a theih lo. Ṭongdang in kan sim le Challenge timi a ngam nasa. Hih sinak, hih ka pi ih ziaza te hi kum zabi 21 minung pawl ih kan ṭul bik mi asilo sawm. “Ka pi hnaṭuan na duhnak, na lawtnak, harsatnak a thlen tik ih ngam zet ih na nor ngamnak na thisen ka ṭul.”

A tlangpi thu in minung pawl hi kan tar lamah kan thluak a molh vivo. Thu ol ten kan hngilh. Tar lam ahcun ti a si ṭheu nan ka pi cu si hlah, mi danglam a si. A thluak a fim, thu hngilh, thil hngilh a nei lo. Arte keuh ni, Me fate nei ni, Vok kan lei ni tivek pawl kan thei duh le ka pi hnenah kan sut. A thluak cu computer vek a si. A cing ringring. Ram ṭhangso ih suak si sehla scientist lole technician a si men ding ka zum.

Mifim pawl cu mi sual palhnak an hmu ih zirnak an ngah, nan mi aa pawl cun an mai sual palhnak in fimnak an ngah an ti bang in, mi aa dinhmun ih a rak ṭhanglian mi ka si tin ka ruat aw. Sual palhnak tampi thawn ka rak ṭhanglian. Mi tampi in nasa zetin in mawh thluk. Cucu an mawh lo, mawh thluk phu ka si ko. Asinan ka pi cun hih thli sualpalh ka tuah mi pawl ruangah in mawh thluk dahlo. Thil ṭha tuah thei dingin thazang in pe. Ka parah ruahsannak le zumnak a nei zia in theih ter ringring. Tulai ṭong in kan sim ahcun Care and Counseling a thiam lawlaw. Professional rori a si ko. Cui a thazang peknak pawl thawn caan tampi thazang thar ka lakih ka tung ding aw sal. A thim mi ka hmai lam a thle tertu, a pit mi ka sunmang a ong tertu zo dang an silo, ka pi a si.

June 3, 2008 ah zohman ih thleng theih lo mi ka pi in mual in liam san, thihnak parih thunei theitu ka silo, ziang ti ṭha ti bak ti ding ziang hman ka nei lo. Khua dang, ram dang ih um ka si vekin a dam lai ah ka pi cu ka ngai zet ṭheu, ka hlam ṭheu. Nan, mual in laim san hnu in cu ka sung ah a um tin ka ruat ih ka bu in hlum ter, ka hna in ngam ter.

Ka nauhak lai khau ka tlung le ka pi in kan khuahnar ihsin futluan le arti thawn in rak hmuak ṭheu. Ka tha bang mi hmuah a tlung tertu a si. Ni nikhat kei tla a umnak vancung ramah ka feh caan a kim tikah vancung khuahnar in futluan le arti thawn in rak hmuak ding ka zum, cun “Pi tu pa si nana,” in ti ding ih in pom ding………..  kei maih pi in.

Na ruahnak