In Ngaithiam Aw

Home » Cahram » In Ngaithiam Aw

By vcth on June 30, 2010.

Naunaute

Zozo khal sual a tuah asile a sual man a rul sal tengteng ding ti mi dan ih tang ah rak ṭhanglain mi ka si. Cuih dan in thudik a suak pi tiah ka rak zum.

Doctor degree ka ngah le ve ten Falam sii zung pi ah hnaṭuan in fial. Ka thleng pek ah thlatang zan dai lak ah ṭang na nat in mi pakhat siizung a ra to. Kum 6 kiang kap mi pa te a si. Ṭangna natnak ruangah a khak pawl in a thaw thawknak an phit ih nauhnak pa cu tuar har ngaingai in a um. A dang in thli lutnak ka tuah sak hman ah a vanṭha tuk lawng ah a dam cak sal thei ding.

Culai ah kei khal tuah thiam mi ka nei ve lo. Thli ka ong(thawthawtnak) tuah cu a ol vekin a ṭha hnem zet mi a si. Sinan ka tuah dah lo.

Sister tar nawn pakhat le hnaṭuan zir rero lai mi nurse sayama nu cun nauhnak pa cu operation cabuai parah an it ter. Mina pa te cu a thaw harsa zetin a thawt. An hnaṭuan ka zoh phah in ka kuat zim le ka ke zim pawl an dai. Ka thir, ka ṭih vekin ka um.

Ṭih phah nawn in a dang cu ka vun rai thok. Ka thiam lo ti mi ruahnak in ka kut a thir ter. Cutin harsa zet ih ka um rero lai ah hi nauhak pa te ka run a ṭul ti mi lungput ka thinlung ah a suak ih run duhnak, zangfahnak, lainatnak le tlawmngai duhnak pawl ka thinlung suang ah a ra suak vivo.Ka tuah thei ding ti mi ruatnak i pe. Ka rin aw deuh ngaingai.

Cutin remcang ten ka theh suak. Ka lungawituk. Au ciam co ka duh. A dang ah pipe cu ka bun ih ṭha zetin ka ṭhit sal. Cun mina kha hlum ten ka it ter. Ka khan lamah ka feh. Ka tuah suak thie ih ka aipuang (Hakha aipuang silo) ngaingai.

Ka tuah hnu na zii 4 rei hrawng, zing pahnih kiang pkap ah ka sang ka khan nasa zetin an king. Ka tho. Nurse nu te a si.

Mina kil phah in a rak sing. A ṭhang tikah ka bun mi pipe sung ah khak a khat. Pipe cu a pit. Ziang tuah ding thei nawn lo thin phang in a ra tlan, “Doctor….Doctor…zam rang ten “ a hmai hmuah a rang ṭheh. A ṭong khal a hak ṭheh.

Ngaingai ten ti sehla thinphang ding ziang hman a um lo. Pipe sung ih khak kha lak sak sehla ṭheh zo mi si ko. Sayamah pawl hrang ah thil harsa a si hrimhrim lo. Tuah kel a si. A tuah ding mi kha tuah sawn lo in thin phang in a tlan ciam co ruangah zum lo mi thil a cang .

Mi na khan ka ve thleng cun naukhak pa cu a thaw a rak cem zo. Kan hlon lak, kan sung zo. Pam hmainak thinlung thawn “mipakhat nunnak na cem ter” tiah au ciam co ka duh. Ka tuah ṭha zo mi thil, nang mah pakhat daithlannak ruangah a siat theh zo. Cuih ruatnak cu ka thinlung sungah a cam ringring ih tur a har nasa. Ka thin cu a ling in a ling, hi thu hi ca ka ngan ding ih U pa pawl ka pek ding. Hnaṭuan dawi hngai seh ti mi ruahnak ka nei.

Zaan ah ca cu ka ngan. Ca sung ah a tuah mi hnak in uak deuh in ka ngan. Cun zung khan ah ka ko ih ca cu ring ngaingai in ka siar sak. Daiten a ngai. Cu nu cu falam mi a si. Mi fate, mawi tuk le duh nung tuk pawl cu a silo. Mi khua ruat nei lem lo mi khi a bang. Ning zaknak le riahsiatnak thawn lungmit zikzik vekin a um.

A mah in thu i let sal lo tik ah ka thin cu a so sinsin. Thu ngai ten ti sehla ka hnaṭuan a tam tuk ih ka bang deuh ruang ah rin lo pin thil a cang pang mi si ti hrawng tal ti sehla. “Ṭong ding na nei lo maw?” tiah ka hro. A lu a thing. Cu le ngam ngai lo in, “ voikhat ten in ngaithiam aw sayapa”tin dimten in ti. Sim ding khal ka lo. Ka rak ruat ban dah lo. Kei ka theih mi cu sual tuah man cu daantat ding, co ding, kuan sal ding. Ka thu ṭhen mi hi a dik ngaingai maw ngaingai lo. Khua hlan kan pupa san ih ral awk nak, phu lak duhnak vek a si pang pei maw. Ka thin in hnai hnok zet.

Hi thu hla men ruangah maw it thei lo in ka um. Ka thin a eng. Sinan zing lamah ca cu ka lak sal ih mei ah ka ur.
…………………………………………….
Cucu kan dung lam kum 20 lai ih a cang mi a si. Culai ih mina pa te thi ding khopkhop thiang a rak dai thlawng tu sayamah nu cu a tu ah falam ih nauhak khil khawinak thlawng ih rinsan mi hotu sayamahgyi ṭuan vo a lak. A mah cu a hna ṭuannak ah thinlung tak sa za ten a pe aw ṭheh. Zohṭhim tlak mi pakhat a si.

Kan dung zarh ah zuk pakhat ka ngah. Nurse uniform thawn fala upa nawn pakhat. A kiang ah nauhak pawl in an kiim velvel. A hmai ah thinphannak, donharnak thawn a khat. Asinan a mah a zohtu nauhak pawl ih mit hmai ah duhdawtnak le rinsannak pawl a cuang.

“Mi dang mawhnak kan ngai thaim bangin kan maih mawhnak in ngai thiam ve aw” ti in thla kan cam ṭheu. Cuih thlacamnak cu a ol sam vekin tuah ngaingai ding ah a har zet. Sinan kan tuah thei a si ahcun a man nei zet mi a si.

A.J Cronin ih Reward of mercy sirhsan ih ngan mi a si.

Na ruahnak