India Technology le Outsource Thlirnak

Home » Cahram » Theihkauhnak » India Technology le Outsource Thlirnak

By vcth on August 23, 2012.

India cu Aug, 15, 1947, Kawlram hnak in thla 4 tuan in zalennak a ngah. Hmaisabik Prime Minister a ṭuan tu cu Jawaharlal Nehru a si. Nehru in India hrangah thil thupi zet pathum a tuah ih lakah pakhat cu a ti sual ih pahnih a ti fuh an ti.

A ti sual mi cu rampi pursum leilawnnak ah Democratic Socialism system a hmang (ram sung thil suak lawng ring, ram dang thil dawr lo le hmang lo) ti si. Hih pursum leilawn daan ruangah India hi ram lian ah a cang thei lo. Mipi tampi cu farah zonzai dinhmun ah an tang.

India Technology le Outsource

A ti fuh mi cu Uknak lam ah Democracy ṭhaten an hamng thei. India cu leitlun ram pawl lak ah democracy hnget khoh zet ih a hmang theitu an si. Uknak hrilawnak ruangah ralkap ih aanating nak voikhat hman a um dah lo.

A pahnihnak a ti fuhmi cu fimthiamnak (education) a si. Kan Kawlram zalennak ih hohatu kan pu le pawl in Mirang fimthiamnak cu an rak dodal. Sal fimthiamnak an rak ti (ကၽြန္ပညာေရးစနစ္). Asinan Nehru cun cutin a hmu lo. Mirang fimthimnak hi san a man mi le zir ṭul, thiam ṭul mi a si tin a hmu. Curaungah nasa zet in Phunsang tlawng pawl a din. Zalennak an ngah hnu kum khat 1948 (Kawlram zalennak kan ngah kum) ah India ram ah MIT – Massachusetts Institute of Technology tluk a si mi Technology lam le Management lam Phunsang tlawng pa sarih a um zo ti si. Cutin dengfel fimthiamnak (technology) lam ahcun Asia ramdang pawl hnakin a kekar a rak tuan.

Pursum leilawnnak a ṭha lo ruangah technician, computer programmer tampi cu hnaṭuan nei lo in an um. Computer science ih master a ṭheh tu pawl hman hnaṭuan an nei lo ih zin kap ih keden ṭhi, nithawng rem ti vek, Kutrin zoh, ku li, hnaṭuan khung pawl an ṭuan a ṭul, an pumcawm awnak ah.

Ziang in India Technology a sar suak? A tawi zawng in sim a sile Y2K  in asi. Y2K thu a thei cai kan tam ding ka zum. AD 2000 a kim tikah Computer program pawl a thar in ngan thluh sal a ṭul. Cutikah, nitlaknak technician, computer programmer pawl an daih aw lo. An hlawhman le a khung vivo. Company tampi vaivuan in an um lai ah, Fimthiamnak lam ah a sang fawn, man le ol fawn mi India technician pawl an tong. Tuan ih kan sim mi keden thi, nithawng rem programmer pawl hnaṭuan an ngah thlang. Y2K in Technology leilung pi a pian hmang a dang ter. Nitlak in Ni Sauknak lam an pan thlang. Leitlun Outsource technician hawl ding ti si ah cu sim ṭul lo in India lam pan a si thlang. India cu Fimthiamnak a ṭha ruangah Leitlun Outsource pi an kut ah a kai thei.

Tu ahcun India cu Leitlunpi ruang in fimthiamnak lamah a tlan thei. Thimnak ah Bangalore ti vek tla cu Silicon Valley thawn ruang aw in hna an ṭuan thei ti si.

Kan kawlram mal lai thlir sehla, Mirang uk kan si laiah kan fimthiamnak system cu a ṭha pam ti sehla a sual lo ding. Nan ṭhanso lam si lo in, Communist uknak le ralkap uknak in kan fimthiamnak cu an that ta riai. Cutin a um cia mi kan Phunsang tlawng pawl tla cu vaihsan mi ram bang in ṭhingriang mang in an rak um ta.

Tu kan cozah thar kut sung ah hin a hloral ṭheh zo mi kan fimzirnak pawl tungding sal thei ding beiseinak, ruahsannak le thlacamnak thawn saduh ka thah. Hi a thleng aw a rang zet mi IT san ih a um tu nang le kei vanṭhatnak sim thil maw, zothli bang in a hran tikah thlihran a dawi theitu si ve ding a thupi. India cu Caanṭha (vanṭhatnak thlipi) an hmai ih a thlen tikah an ral ring aw cia zo. Thli a hran tikah thlihran thlun thei dingin nasa zet in timtuah aw cio uhsi.

Francis Cung Bik

Na ruahnak