Viokhat ah mi pakhat kan inn ah ra in innsunsang pakhat rawl ei ding an nei lo thu i rak sim. Fangfai le ei ding dang mallai keng in ka pok. Cui hmun ka thleng tikah rilrawng zetih a ummi nauhak rual cu ka va hmu. Asinan riahsianak le thinnaunak pawl cu an mit hmai ah a um lo.
Ka kenmi pawl cu innteknu hnenah ka pek. Lungawi zetin i cohlang ih rawl pawl cu hmun hnih ah a ṭhen lohli. Cun a hrek cu kengin inn lengah a va suak ta. A ra kir sal veten mangbang in ka sut, “ Khui na feh”. A nih in olsam zetin i letmi cu, “ Kan innhnen pawl tla an ril a rawng ve” ti a si.
Ei ding an nei lo na cingih an neihsun sungin a hrek mi a va hlawm bet kha ka mang a bang lo, ziangah tile mi farah tam sawn hi an tirh a fak lo ti ka thei. Nan an rak rilrawng ve ti a thei hi cu ka mang a bang nasa. Ziangah tile zozo khal kan harsat caan ah kan mah ih harsatnak lawng kan thupit ter bik ih midang hrang ruatnak ding caan kan nei ṭheu lo kha!
Johnlsl
Source: : Mother Teresa ih To My Neighbor
