Internet Marketing

Home » V-Tech » Internet Marketing

By vcth on October 12, 2010.

Francis Cung Bik

Internet Marketing ti kan zoh hlan ah Marketing ti ziang a si ti kan zoh ta pei? Marketing kan ti tikah caan tampi ah cu hmun le hma kan thluak sungah a lut cih. Kei hi Marketing lam Business lam zirsang ih zir ka si lo. Ka zir mi cu Theology lam sawn a sinan, man caan tete ah pursum lam le marketing lam mal tete ka hlethlai phah, bulpak, innsungsang sumpai tla a remcang ter deuh pang ah ti ruahsan in.

Marketing ti cu hmun le hma, thil zuar, zurnak ti hnakin mipi, tuannak, mi ih an ṭul mi hawl sauk sak (action and demand) ti sawn sehla a sual lo ding.

Bible lam rak zir ti cu keimah ten biaknak lam mit in ka rak ruat ve. Marketing ti cu Kawhhran thawn a bang aw in tahṭhim ah theihthiam a ol. Kawhhran ti cu Biakinn, Hmun le hma a silo. Pathian mi le fa, Pathian a thangṭhat duhtu pawl kha a sawh duh sawn. Cui Pathian ih kawhhran, a mi a fa pawl pumkhawmnak ah cu hmun le hma cu a ṭul ve sal. Marketing ti tla cu vek a si. A thu hrampi ah cu minung le mipi ṭulnak sawn a siih cui minung pawl ih ṭulnak service tuahnak ah hmun le hma tla cu a rak ṭul ve sal.

Internet Marketing ti cu internet ih minung pawl ṭulsamnak service pek, rian ti a si. Kan laiṭong ih rian ti ṭongfang cu man lo ding a bang. Hinah ah Rian kan ti tikah man nei ih rian, man la ih service pe a si. Internet Marketing ah phun tam zetin mi rian dan a um cu pawl lak ah a tlangpi thu le mi ih an hman tam mi mal lai kan tar lang hnik pei.

1. Affiliate Marketing
Affiliate ti cu thil zuar ih commission man ngah kha a si. Tu sanah mi tampi cu dawr, shopping feh an man lo, hnaṭuannak le inn ah an caan a cem tam. Tahṭhimnak ah kor te ka lei duh, cui kor lei ding hrang ah nazi 1 or 2 pek in shopping ka feh peih lo, online in ka lei duh sawn. Lole Cauk lei ka duh. Ipad or Kendle hmang ih siar ka duh, printed version lei cu a cang thiam lo, ebook ka lei ṭul. Internet ih lei a ṭul.
Duhtu, ṭultu a um ruangah zurtu tla a um ve. Mahte zuar hi thil ol a si lo, curuangah a zuartu pawl kha agency pawl a si mi Click Bank, CJ tivek ah an thil an ap, agencies pawl hnen ihsin la sin ih cutin zuar sak, blog, website tivek tuah in zuar sak, na zuar ngah le commission fee na ngah ding.

2. Ads
Mi tampi an website, an tuah ṭuanmi, an thil pawl mi theih ter an duh. Cutin mi ih an theih theinak ding ah cu an tilar a ṭul. Ads thawn pehpar aw in tuanvo a la tu company tam pi an um, cu pawl lak ih a larbik mi cu Google AdSense a si. Cui company pawl hnen ah member si ding in na apply pei ih siannak na ngah in code an lo pek ding ih na blog, website ah na tar thei, mi in cui na tar mi tilarnak cu an click le peisa na ngah ding. Na blog lole website kha lengtu tam na nei le peisa na ngah mi a tam ve sinsin ding. Curuangah Tarffic= money tiah an ti. Hih Blog le Website ih information pek in Ads zuar cu content Marketing tiah tla an ko.

3. Articles Marketing
Dawr ih thil kan lei tikah dawr zuartu awka thiam te thawn kan tong ahcun lei kan tum lo mi hman kan lei ngah pang ṭheu. Online thil zuar ah cu awka ih ṭongnak caan a um lo, ca ih ngan a ṭul. Ca ngan thiam cu ṭong thiam, zuar thiam a si. Mi tampi cu article ngan kha pum cawm awnak ah hmang in, cafang 100 ah cu zah, cafang 1000 ah cuzah ti in ca an ngan.

4. Email Marketing
Mi tampi cu blog le website tuah an harsa aw, curuangah email kha thupi zet ah ret in thil an zuar. Email ah an zuar mi thilri ih link an ret ih, cui link ihsin thil na lei le peisa an ngah ding. Blogger, Internet Marketer sayakyi tampi tla email an thupi ter zet. An thil thar update mi pawl mi an theih ter. An email ah thil an zuar lo nan an email ihsin an blog/website ah mi an hruai. An blog/website lengtu tam le sum an ngah tam.

Ok! Internet Marketing thawn pehpar aw in ri khiah ding cu a har zet ding. A kau nasa. A par lam ih kan tar lang mi cu titekti fang lawng a si.

Na ruahnak