Ka Chin Phunsuahni

Home » Cahram » Ka Chin Phunsuahni

By vcth on February 4, 2014.

Francis Cung Bik

Tu hlan kum 2 hrawngah cu Chiang Mai ah Chin/Laimi 100 leng lo kan rak um nan kan boruak thlihran daan a phunphun ruangah Malay lam feh na, a tlung na, nitlaknak ram lam feh na cutin cu kan si ih a tu cu minung 30 vuakvel lawng kan si. Cui 30 vuakvel sung ihsin hnaṭuan a cawl theitu, khuan a lak theitu, caan a pe theitu cu minung 18 hrawng lawng kan si.

Thuthang tete, groupmail pawl ka siar, hmundang ramdang ahcun Chin Phunsuahni sunglawi zetin an tuah ding ti ka hmu, kan Chiang Mai dinhmun ka zoh, ka thanau phah. Nan ka ruat sal, Chin Phunsauhni cu a ṭha bik in ka sunloih ding, minung kan tam ah mal ah, ziang program a va si-ah tin thazang ka lak. Ka Chin Phunsuahni hrangah ka tim ka tuah. Cutiih ka tim tuahnak in hipawl ka ruat suak….

Chin phunsuahni sunloih ti cu Chin miphun sunloih a si. Cucu Chinmi pakhat sinak in a ṭul hrimhrim mi a si. Chin Phunsuahni ka sunloih cu keimah le keimah ka upat aw, man a nei mi ka si ti ka cohlawng aw a si. Curuangah ziangvek dinhmun a si khal le Chin Phunsuahni cu a sunloih hrimhrim ding mi ka si.

Cutin Chin Phunsuahni a cang daan thu tete tla ka ruat phah. Chin Phunsuahni cu Lal uk daan cem ding hrangih mipi 5000 lenglo Chinram peng tin in mi burkhawm aw in sandah an piah ni a si. Lal Uk aw daan, mi pakhat ih thu thupit ter bik uk aw daan cu cem ter tahrat in uk aw daan thar a suahni a si. Chin Phunsuahni cu tu hlan kum 62 ih thil cang a si. A cem zo mi thil a si. Asinan Chin Phunsuahni ih a sullam cu tu ni tiangah Chinmi pawl hrangah cu man a nei ringring. Chin Phunsuahni cu tharthawhni, thleng aw ni, a ṭha deuhmi, a tleu deuhmi uk aw daan, kaihhruia aw daan hawl suah caan a si.

“Thleng aw” le “a thleng aw mi” ti hi Chin Phunsuahni ih a thu tlangpi a si in ka ruat. Cucu kan Chin Phunsuahni ih a thlarua, a lungput diktak cu a si. Chin Phunsuahni a hmang tu kan zaten hih Chin Phunsauhni lungput “thlengaw” (kan kiang le kap, kan ram a thlengawknak) le “a thleng aw mi” (bulpak kan nun a ṭha sinsin mi nun, nehtu nun) si thei cio hram uh tiah thlazacamnak thawn ka Chin Phunsuahni cu man nei zetin ka rak hmang ta pan lo maw.

CND1

Hminsin: Feb 22, 2010 ih rak ngan mi a si

Na ruahnak